星期四, 2月 27, 2014

劉進圖君遇襲,大家真知道真相?

昨晚為劉進圖君遇襲一事反覆思量。坊間討論,八九不離十中共所為。你睇,呢頭李慧玲被人燉冬菇,個邊廂劉進圖就掉職兼被人斬,唔係咁天真相信阿爺仲會錫住你班友下話?

相當然耳。

自忖阿爺雖然於國內橫行霸道,但對於香港地方,仍然忌憚非常,劉君是否足以令中共扯破臉皮,開始動刀?說實話,如果阿爺真要動刀,以其一不做二不休性格,肥佬黎是否應該係第一目標?

有某些傳媒、網評已經一面倒將矛頭指向中共,又話劉進圖揭發溫爺爺家族海外罪證,死罪難逃。又相當然耳。溫爺爺家族之事,海外傳媒早就報道,而如此高度的國家領導事宜,決不會以咁下三濫手段解決,惹來香港及國內一片輿輪審判。真的要處理,劉進圖應早人間蒸發了。

我唔係刻意要為阿爺辯護。阿爺的確係嫌犯之一,但唔好又黎一次民粹公審、未審先判。政治一向比大家想像覆雜。當有人認為連串打壓傳媒事件係巧合呢個說法膚淺,又有無諗過劉進圖被斬即阿爺所為係武斷?

單以近日新聞提出幾單有可能令劉與人結怨新聞,最吸引我眼球就係明報早前揭發一群承建商圍標,以遠高於巿價進行維修重建工程獲利。需知呢班友,一向有背景,例如令你好放心個集團,賣行廣告,講到公公婆婆點開心,實情係點,大家應該知道。呢班人搵劉總秋後算帳,不足為奇。話說回頭,劉總掉職是否因此,亦未可知。

需知呢個時候,任何人出手都好,輿論都會一面倒指向阿爺。精既都識而家就郁啦。

另一狂想:簡單講,香港通過政改,天下太平,阿爺少左個負擔,邊個最擔心?世界霸權,要令你外憂內患,雞犬不寧,有何出奇?借此事為導火線,挑釁全港民眾與阿爺對立,某啲人可能躲於暗角抿嘴暗笑了。太誇張?咁閣下應該翻翻歷史書,睇睇老美既惡行了。

2 則留言:

魔術師 提到...

你寫呢篇,唔怕俾人圍插咩?

余若虛 提到...

魔術師兄:
隨波逐流寫大眾意見,缺乏獨立思考,就如施老闆所講既「自我審查」,咁不如唔好寫啦,又唔係搵食要討好班網絡大佬。

況且,我既名氣應該未使擔心有人班馬黎踩場住,哈。