星期四, 2月 20, 2014

驅蝗短評(一)

話說有班「網民」要驅蝗,就走去廣東道(大概就等於紐約時代廣場、巴黎香謝黎舍大道、東京銀座、台灣西門町),唔理好醜見你似遊客就鬧你係狗要你滾回大陸。先勿論對錯,就當你要鬧大陸遊客,人地唔會將我係大陸人鑿係額頭,無辜收害既台灣、日本、韓國遊客又點?你要針對都係不文明既大陸遊客啫,咁有好多有學問有教養既大陸人,係咪又要比你指口篤鼻咁鬧?人在異鄉,突然比一班兇神惡煞既壯男指住黎鬧,試下你係英國美國比班黑鬼白鬼指住你鬧,你驚唔驚?話大陸人唔文明,原來香港既文明就係用粗暴不文對付所謂唔文明。

又,原來,聽返驅蝗行動當日既發言,係要所有大陸人係香港消失添!

我都知講呢班極端分子有啲無謂,佢地既行為只係少數右膠所為。但呢班右膠咁樣製造國際笑話,侮辱遊客,泛民政黨又有無一個人行出黎批評佢地?我未見到有,查新聞只見到范國威鬧政府好鬧巿民偏幫大陸人。政府咁高調出黎DL班右膠係好無謂,但係咁既行為係香港竟然不被譴責,講法治講人權既泛民政黨點交代?香港人就有人權鬧人大陸人就要企係度被你鬧?

而家既香港,睇黎都唔係講原則只講立場,總之你唔係同路人,我就一定鬧爆你,自己人就隻眼開隻眼閉,個個都雙重標準。梁振英目空一切,非我即敵,自己人都要拉一派打一派;當年郁人王掟蕉,民主派敷衍了事,掩咀喑笑。今日到民主黨比人掟,就聲色俱厲,義正辭嚴。今夕吾軀歸故土,他朝君體也相同。



-----------------------------------------------------------------------------------------

要鬧,唔該將焦點擺返係叫政府做野。政府又無L用,明知自由行已經為交通同社區帶黎咁大負擔(當然都有利益),仲不斷話要加大人數,又叫你等多班車,又咩「未富先驕」,一貫梁振英既強勢氣焰。呢啲野大把人講,唔使我加把口。

但有一樣野好實在既,就已經比人上網上線否決左,「新界東北水貨城」。咁多自由行,其實好多唔係想黎行街,係想買名牌、買化粧品、又或係廣東人買奶粉洗頭水牙膏杯麵。係新界東北邊境,既唔擾民,又唔會趕客,繼續吸匯賺錢創就業。可以令香港交通社區舒緩幾多,銅鑼灣尖沙咀減少幾多自由行人次,我無數字。至少值得研究下話?

好,此計劃一出,呢個水貨城即刻比人話係割城賣港,想驅使港深融合,令到深圳人輕鬆過境,長遠呢其實就係一個計,為日後取消邊境鋪路,實現深港同城一體化,完成共產黨殖民。

講完,傾都唔使傾,成個新界東北計劃,就係呢類扣帽子既批評下夭折。新界東北發展搞左廿年,到而家話要推就湧哂出黎,突然又話要比啲村民繼續耕田,趕佢地走無人性。要「不遷不拆」。呢樣最on9,本來乜都有得傾,你要錢我賠,你要耕地我搵,你要搬村我幫你做,你要上樓我比你上。一句不遷不拆,乜都唔使傾。

又係你地話地產霸權,好喇增建居屋喇復建公屋喇,又話樓價唔落。大佬呀我變啲樓出黎比你呀?使唔使起呀?好喇而家無地,東北咁大個規劃,又係上緊籃比人一巴打返落黎。樓起唔成咪又繼續供應唔夠,水貨城搞唔成咪繼續迫爆東鐵尖咀囉。

-----------------------------------------------------------------------------------------

DLS,以前寫野堅持前文後理,見得人拜得神,太辛苦。忘記左我blog既宗旨:做人唔使太辛苦,睇blog毋須太認真。不喜勿入,要插隨便。


3 則留言:

詩白爾 提到...

工作期間遇到的事情,你想要地政府唔會俾,想上樓又無得你上,想要政府賠償,金額又非常不合理。

政府都唔俾路人行,不遷不拆係逼出來的。

King Tam 提到...
網誌管理員已經移除這則留言。
余若虛 提到...

詩君,你講既可能係事實,但如果係咁應該係要去「爭取合理賠償」「要求原區安置」「要求重建復耕」「爭取即時上樓」。而家講不遷不拆,即係話我唔理開咩條件,我就係懶死唔走架喇,你咬我食呀。

我睇法,「不遷不拆」不過係政治人物綑綁村民撈取政治籌碼而已,嘿。