星期二, 3月 10, 2009

評大笨象走勢

大笨象今日收巿勁假時段做左一口勁假既低價33元,被mark低至跌10%。再抨擊勁假時段都無用,證監亦己落實稍後會將勁假時段波幅限於收巿價2%。若虛試從大戶角度分析匯控走勢。

首先,大家要明白大戶現在係淡倉底,做左淡倉自然要搵口好價平倉。若果係巿場買貨,以大戶龐大既淡倉數量勢必會掃高匯控股價不少。此亦以往渣打供股後彈升接近五成之原因。

既然如此,大戶就向散戶埋手。首先將匯控不斷質低,營做「匯豐已死」之象。今日mark至33元或跌逾10%,相信已令不少持貨者心驚肉顫。皆因匯豐散戶股民除一部分係持貨多年外,好大部分其實係匯豐跌穿100元後追貨欲作長線投資,5x元血肉長城價更囤積大量蟹貨。呢批股民守貨已久,意志力開始減弱,愈守愈心驚。初時堅信匯豐絕對唔會出事者,到今時今日都開始幻想匯豐究竟會唔會步花旗、美銀、AIG後塵。前日見電視新聞中一批專業人士(有醫生律師等)組成之投資會討論是否供股,一個月前該批人仍把握十足一致咁話一定供,到前日已開始動搖,有人已開始質疑再渣匯豐落去無意思。

其實大戶正要令散戶意志消沉至絕望,繼而拋貨。大戶不斷質低股價,若最後無人跟風沽,佢地既淡倉仍係要平,結果只會自己蝕價。所以大戶一定會仍營造出慘淡至匯豐末日的氣氛,令散戶一時意氣沽出諗住有返啲渣拿唔使好似8號仔股民咁。屆時大戶先係低位接貨。情況就好似好多人係恆指跌至萬二三點就見底既時候先將強積金轉做保本基金。其實呢啲決定好多時只係一時因抵受唔住巿場既壓力而作出,回頭一看必呻笨。

大戶更會係11號前大量接貨,因趕及係除權前有股份就能獲供股權,到時就能不影響巿場下,以28元供匯豐以平淡倉。亦因此,大戶係23-31日供股權交易時,盡令令匯豐唔會升得太高,最好係3x元左右徘徊,令散戶唔敢供股之餘,賤價買供股權亦有渣拿,大戶就能低價大量購入供股權作平倉。亦有可能大戶再質低匯豐,令供股權唔值錢,到時大家唯有放棄供股,而包銷商(其實即係高盛、大摩)就可以明正言順「包銷」供股,順勢平淡倉。

因此若虛相信,3/4正式供股前,匯控有反彈無上升,好大機會比大戶壓係低位,震走磨走散戶,繼而掃供股權,鑿返一筆大既。當一切塵埃落定,匯豐好大機會就會好似渣打咁,黎一個大反彈。

P.S. 一切只係若虛猜想,後事如何,還待巿場告訴大家。

沒有留言: