星期四, 3月 05, 2009

再談大笨象

若虛於一月底已收到路邊社消息指大象有計劃供股,至業績公布宣佈,終於應驗。而供股比例12供5更遠超之前消息預期之4供1,顯示大象資本壓力不少。

二月時散戶接連於五十多元水平排出血肉長城抵抗大戶沽壓,實屬不智。散戶似乎嚴重高估了自己少少資本所能帶來的力量。大戶早掌握匯控供股消息,心知供股後攤薄效應必令股價大插,可以放心大手沽空,加上收巿競價完全偏袒大戶既玩法,匯控連日被Mark低,散戶跟本無還擊之力。

香港人對匯豐的信任源於其穩健的歷史表現。可惜此一時彼一時,學我老曹話齋,呢個時候去買匯豐,只係代表你無做功課。匯豐三大盈利支柱(英、美、港)折其二,豈能不墜?至少,都要捱返三五七年啦。

至於廿八蚊供股是否值得,若虛認為長線看無論如何都值,因為匯豐基礎仍然穩健,仍不比美林雷曼等有高槓桿。匯豐受累金融海嘯加上收購失敗,到今時今日供股集資亦只求增加資本充足率非為撲水救命,毋需如花旗美銀之流向美國政府搖尾乞憐求施捨個發財錢(嘩,不過個啲發財錢夠我食一百八十七世...)。

匯豐經歷幾許風雨,當年作為滿清政府最大債主,清朝滅亡國家default,匯豐安然渡過;後來民國政府的債務,蔣介石認了頭又無錢還,到最後共產黨唔認數,匯豐依然無事。匯豐百年基業,有今日誠非幸致。只是企業有三衰六旺如月有陰晴圓缺,匯豐今日雖然挫敗但其根本看來依然健全,應當有能力撐過這一關再待時機東山再起。

但講到供股供唔供得過,就唔係只係睇匯豐本身長遠發展咁簡單。一來,匯豐即使捱過呢關,要復原怕且都要三五七年,慢慢重上軌道,既然如此,何不以後再伺機買入;二來,中國崛起帶來大量投資機遇,錢有其他更好的選擇,又何止投資匯豐一途?此一時,彼一時,匯豐以往係股王,並不代表以後都係股王,唔好學龔生,匯豐唔升就失落。而家買左匯豐坐緊艇既,就唔方唔失落。

至於財演們以致財經新聞部經常以渣打供股後股價先跌後攀升指供股短期對股價有利,實在係無知之極。大行收到匯控供股消息,高位一早唱淡再大手沽空。待供股消息一出,攤薄效應顯現,大戶當然趁壞消息平倉,股價自然上升。如果咁顯淺既道理都唔明,呢班財演仲衰過啲神棍。

3 則留言:

若缺齋老人 提到...

AIG真係大食得恐怖,千幾億掟落去兩野無影無蹤!

Bittermelon 提到...

鍾情匯豐主因是她有一個優秀及作風穩健的管理層,我相信長遠是買得過,但現價就真係...

余若虛 提到...

若老兄,美國政府真係週身唔得閒,救完銀行就救保險,救完保險又救車廠,救完車廠又救返銀行,個個食成千億,廿四小時印銀錢都印唔切!

bittermelon兄:你好!我都相信匯豐有能力翻身,但係世界經濟大格局金融業萎縮既情況下,無返三五七年都難成事。與其係咁,點解唔去再揀過更有潛力既其他公司呢?