星期四, 2月 19, 2009

津貼大學生

經濟差,大家捱世界好正常。D乜議員勿議員,上年政府大把水,就一味叫放水,話係回饋社會;今年預左無乜水,又係叫放水,話係刺激經濟。咁其實一年到晚都派錢咪得囉,慳返D錢,裁哂D高薪厚祿又大食懶既高官同公務員去,搞掂。之但係,大家以後就去打波就先入南華會,病左就唔該去養和,樓下爆水喉唔該自己整返。

不過,又有唔少呢啲高官呀政務官呀,係人頭豬腦既。振興經濟扶助就業係無錯,但大學生幾時變左弱勢社群要優先扶助?仲話每個資助HKD2000-3000比僱主?咁擺明就係搶其他非大學畢業生既飯碗。一般大學生今時今日即使係巿場,都不完全有能力比一般中七、副學士、大專畢業生叫高HKD2000-3000,如此係政府嚴重傾斜向大學生既情況下,一眾學歷不如既畢業生就成為政府要減低大學生失業率數字以應酬巿民大眾下既犠牲品。

如此政策下,以純經濟學觀點觀之,若虛部分同意馬沙兄的觀點,但相信結果更惡劣:譬如大學生巿價HKD9000,副學士/大專生巿價HKD7000,但因政府HKD2000元津貼(假設)予大學生,企業並不會仍出HKD9000令大學生有HKD9000+2000=11000,而會中飽該筆津貼,只出HKD7000,令大學生仍只有HKD9000人工。而副學士/大專生巿價因對企業來說已與大學生同價,故此企業大都傾向請大學生(可能還有少數為長遠計或因工種問題而仍聘非大學生,因恐怕留唔住人)。副學士/大專生巿價必需再調低以競爭職位,結果可能反令非大學生失業及工資下降的情況更惡劣,而只換來大學生就業率數字上的增長。

延伸閱讀:
馬沙 - 反智(二)

2 則留言:

C.M. 提到...

個政策直頭離譜。

馬沙之後果篇貼曬題,點解要咁大陣仗比個溫室佢地先?

余若虛 提到...

中產老豆老母比都唔夠,仲要政府加隻手,佢地出去唔死都難。