星期五, 2月 06, 2009

為富不仁 富而不貴(一)

8號仔私有化終於通過,過程峰迴路轉。先有大股東於原先預備表決私有化方案的股東大會中忽然提價,再大條道理押後表決。期間種票疑雲不斷。到點票日,一片噓聲中竟有九成多小股東投贊成票,壓倒性通過方案。

大股東出價4.5,對於高位入貨持貨多年既小股東尤如雞肋。但電盈尚坐擁現金,收購方案通過後,大股東小超人及網通均能獲派息,變相無本私有化。不少小股東當年已感覺受騙入局,今日尚要拱手將股票退回換返雞碎咁多,無怪噓聲震天。

小超財技高超眾所周知,可惜其人發財卻不立品,為富大大不仁。當年鯨吞香港電訊,負債入主,將大量以買香港電訊收息的小巿民財富掠奪過來。繼而8號仔成為全港公認的最無良僱主,得此銜頭可謂不易。之前8號仔拒絕紅籌教父6元出價,如今卻4.5元全面收購,對小股東可謂不公之極。其實小超早已密謀將核心資產轉移,卻遭反對而擱置而已。總之其所作,無非將自己的利益最大化,完全無將8號仔的前途、其他股東的血汗錢放在眼內。如今此方案既可私有化8號仔,更無需付一分一毫。以後將其中賺錢資產再分拆上巿,又再袋袋平安,不可謂不高明。

竟然8號仔有176億特別股息可派予大股東,為何又不派息予小股東?咁唔係搵老襯係咩?提價以後又湧現大量「一手股東」,司馬昭之心路人皆見。可惜香港證監向以無牙老虎著稱,人言報陳焱多有論述,只怕最後仍係陰聲細氣「讉責」兩句,然後束之高閣。至於老廉又點?走著瞧。

其實各位散戶亦係爭唔落。小超入主後的經營手法,已在在顯示其只為牟利。人家財技如此高明,又無企業道德,每每都以資訊及財技上既不平衡優勢黎剝削小股東。買佢股票無異與虎謀皮,實在早應斬纜止蝕。不過守到今時今日,仲要被佢不費分文私有化在斬件圖利,相信不少係8號仔身上賠上半生財富既人實在氣難下。

其實,小超之父李超人,經營生意賺錢亦絕不手軟,號稱賺盡一分一毫。超人亦自言:「係我既錢,一蚊我都要;唔係我既,送上門都唔要」。而多年來佢亦言行一致,生意上的確賺盡,但對股東既回報唔會少。而且超人亦捐唔少錢作社會慈善、山區教學、教育基金等,算係對社會一點回餽。可惜其子只知其一,不知其二;好既學唔到,衰既青出於藍。

為富不仁 富而不貴 之一

4 則留言:

匿名 提到...

又話富不過三代...

匿名 提到...

未夠三代,呵呵。

君子之澤尚且五世而斬,李家如此治業,可推知其治家。家運將薄。

若缺齋老人/陳潢 提到...

一說企業唔駛理社會責任是假的,形象不佳絕對影響盈利表現。

余若虛 提到...

匿名君們:且看其子若何?李超人不世營商奇才,但也許上天都是公平的,給他太多始終要再別處收回多少。

若老兄:且看小超以後如何。嘿!