星期五, 11月 07, 2008

鬱悶

心情很鬱悶。好一段時間無睇blog寫blog。

自問唔係順風順水既人。自細做事都係一波三折多,每事常不稱心。但當情況去到都幾惡劣既情況既時候,偏偏又會有返啲好消息打救,正式係一啖砂糖一啖屎。



就攞我呢一年呢份工為例。最初以marketing畢業生身份畢業想搵金融業,成績又麻麻,搵工起步太慢,搵左成兩三個月,除左個啲保險人壽基金sales(即so called financial planner/management trainee/portfolio manager/retirement planning consultant etc)之外都無乜消息。但撞左好耐終於又比我執到間期貨公司,而且個時幾有前景咁。諗住行運,點知搞左半年間JV就拆夥,大陸接手,大陸佬做事一塌糊塗,跟本唔知咩叫管理(可見另文另文),間公司搞到好似倫敦金個啲架步咁。

本來香港老闆臨拆夥時講話會再開檔野,會搵返我地。但金融海嘯又殺到,大家當然都無咩期望。諗住衰衰地有個架步痞下,唔使返屋企痞躉都算好。但呢檔野搞搞下竟然就係而家上馬,我地幾位同事計劃前後腳過檔(因初籌備毋需太多人手,另外香港老闆念舊情,唔想整死呢邊也),係而家經濟不景金融業人人自危既情況下,仲可以調返早班再加人工。但呢件事傾掂左而家又可能有變數,真係幾煩人。



當然,煩人既仲有其他事。好似呢種起起落落,打你一身然後又淋返醒你既日子,很累人。但呢種日子,總有一日會過去。運不可持,沒有人能一生好運/霉運。

7 則留言:

C.M. 提到...

朋友,呢d經歷雖然未必對你將來有好大幫助,但按照經濟循環,早,好過遲。到經濟好番,就冇咁累人架勒。遲d先玩,年紀大,就唔係咁心情咯。

Hana 提到...

唔使養妻活兒又唔使胭脂水粉,磨練下都好,既來之則安之。

若缺齋老人/陳潢 提到...

雖然我唔係教徒,但服膺我那位大長老老師常說:關了門的話,上帝總會在某處開隻窗畀你(講到咁似爆格?)~ XD

波蘿游 提到...

行到水窮處,坐看雲起時
take it easy 喇
後生仔

余若虛 提到...

Thx all. 反正我都好樂天知命,呢個遊戲仲有排玩,哈哈。

Karen (Sze) 提到...

好運有時, 霉運有時。

人唔會行一世順境, 但唔會行一世逆境; 就當自我磨練。

有得返工, 總好過做量地官。

人生沒有起落, 真係唔多好玩; 所謂"山窮水盡疑無路, 牧童遙指杏花村", 希望您不要累壞自己, 祝您好運!

Choi 提到...

ching,我同你都係差唔多bg,但我宜家仲量緊地呀,老豆名都話句,"未見過風浪都未算係一個人"