星期五, 10月 24, 2008

掟蕉者吔蕉

黃毓民呢條粉皮,初來報到就整場大龍鳳,係立法會玩「蕉」。雖然話大家都知道,社民連既定位就係靠出位玩對抗,佢出呢「蕉」對佢自己同個黨有無幫助,若虛就唔清楚;但對整個香港議會政治就肯定唔係好事。

香港議會承繼前宗主國英國紳士傳統,議會內眾人多數表現出謙謙君子之姿,縱使派系分明,罵戰在所難免,但多數仍表現忍讓。直至長毛殺入議會,帶入抗爭文化,經常有意搞事,一時拎個公仔舞,一時走去特首面前嘈,但仍只限於語言上既對抗。

黃毓民今次高調殺入議會,當然要向佢既激進路線支持者交代,但玩到出手掟蕉,雖然只係向無人處掟,但含意深遠,意味住動手既抗爭文化正式係議會初試啼聲。如果今次既行動無得到傳媒同公眾既反對,甚至受支持,咁黃毓民同社民連只會以溫水煮蛙式將對抗級數提升,令香港走向台灣式暴力形議會政治。

台灣暴力政治港人熟知,議事堂無莊嚴可言,只見如潑婦罵街式對罵,與扯頭髮抓人既打交。海協會張銘清訪台,以香港標準最多遞下信抬下棺材玩下紙紥公仔。但張氏係台灣就被台南巿議員(係議員!)牽頭襲擊,並被推倒。事後該議員竟然係記者會聲淚俱下地指只為捍衛兒女同台灣既下一代,認真好戲。連買包紙巾都要開公數既阿扁仲話人地去台南係挑釁台灣人民。挑,咁尼克遜基辛格訪華都係挑釁大陸啦,希爾去北韓又挑釁金正日喇,咁係咪要打7佢?

香港雖然未有民主政治,但至少有優良既議會傳統同文化。係議會掟蕉者,請吔蕉。

12 則留言:

詩白爾 提到...

癲狗掟o既係市民o既怨氣,似李敖,你唔敢做我幫你。香港人示威都未有人夠膽玩掟蛋同忌廉,反而有議員高舉中指。

台灣土佬議員打o既係爛仔交,似日本右翼,以為好夠義氣。香港除左黑社會之外無邊個戇居見到人唔順超就打,搵人陰9你就有。

若虛兄反而要應該擔心下社民連D基本雜牌軍黨員會唔會學壞左頭亂咁黎....

明子駉 提到...

在亞視見到陳偉X、黃毓X在堂而皇之喊要在公開場合掟林瑞X雞蛋(林瑞X何辜?拿個打雜的出氣嗎?)鄭經X還一臉認真的講掟雞蛋會掟傷人。
不禁覺得滑稽和黑色幽默.

匿名 提到...

我好期待佢掟中,之後大條道理拉佢

匿名 提到...

今次黃毓民贏左啦

http://hk.news.yahoo.com/article/081024/4/8w0s.html

生果金增至千元擱資產審查

若缺齋老人/陳潢 提到...

咁叫贏?唔掟蕉就唔可以平心靜氣爭取到?btw咁近都掟唔中真係應該驗眼!

詩白爾 提到...

老頭,睇黎癲狗純粹想兇下浮雲子,如果掟中左的話以後就無野睇!
正如收數佬唔會第一次上門追數不果就燒你間屋而已!

余若虛 提到...

C兄:其實香港地區議會以經好混亂,好多立案法團之類既地方橋頭堡郁啲就打交,選親都要差佬駐場,所以社民連下面個班本來就唔少爛仔。只係如果呢種爛仔文化升格殺入一級議會,無疑係香港之恥。


于駉、若老、匿名君:佢地咁夠薑掟,咪去掟囉,之後告佢襲擊,監都有得佢痞。好明顯隻蕉就好謹慎地係掟去最空既位置既。其實阿凸手都唔知幾恨佢掟中,咁就告又得,唔告又得,大條道理一個受害者咁行出黎,即刻攞哂分。

匿名君2:贏左?我諗政府同議會輸既會更多。不過,凸手真係好唔夠guts企硬。

匿名 提到...

如果拉黃毓民佢可能號召50萬人上街

http://hksan.net/forum/index.php?showtopic=10165&st=20

原來黃毓民已帶定雞蛋

明子駉 提到...

七一滿打滿算也才25萬,黃毓X覺得自己一個人襲擊特首或政制局官員被抓能召喚50萬人?
這未免太大頭症了吧?

VC 提到...

明子駉, 聽過天星加五仙引發暴動嗎?

明子駉 提到...

此一時,彼一時。
要這樣講,8964民運,有實打實算上百萬人添,但這跟黃X民被捕會不會有50萬人無關。

明子駉 提到...

剛剛說得不清楚:
是8964民運,香港人的支援示威有上百萬人。