星期四, 4月 24, 2008

自住

之前提過,好多學生畢業後都想自己出黎住。雖然通脹係今期hot topic,但相比歐美,香港生活所需其實唔算貴,就只有樓最貴。要自置一頭住家,係香港係好多人畢生努力要達成既目標。

若虛當然都有諗過出黎自住。住HALL三年,其實如果話自己生活都算慣左。尤其係無左個私竇,更加令我有搬出去既念頭。不過要搬出黎,考慮既真係多好多。

錢當然係最重要既考慮。除左話租金昂貴,其實仲要考慮到,搬出黎住一闊三大,生活用品在在需財。一日三餐自己搞掂,半個月去入一次貨,淨係食都花唔少錢。另外又要顧掂自己。除左話食,家頭細務再無阿媽代勞,洗衫掃地省厠所事事躬親。

因為財政既關係,好多人都會考慮同朋友夾份共住。其實呢個情況更危險。相見好同住難大家都知,莫講話日日對住,就算去一次旅行如果大家唔夾一樣好易炒大獲。所以若虛非常抗拒同半生不熟既朋友去旅行。如果要揀partner,必需要揀非常熟,可以無所不談溝通得好好既。如果唔係同住以後有咩爭執,好容易就咁無左(幾)個朋友。

好多人都忽略左同住既問題,正如好多人都會唔覺意同左半生熟既朋友去左旅行然後後悔。若虛試過去個俾面旅行,只係兩日一夜澳門遊已搞到好無癮:想食好野又有人唔願洗錢,想睇乜野又有人嫌悶,白白浪費好多時間係無謂既爭拗同討價還價。同住的話,邊個唔執檯、唔抹地、鞋亂咁放、煮完公仔麵唔洗煲全部都會擺上每日爭執既議程。如果同屋住突然有蜜運,祝福佢之餘又會帶黎好多唔方便。即使住hall呢啲事情都屢見不鮮(住hall仲可以話下年搵個第二個同房,但租屋好難話下次搵過第二個同住)。

不過,係錢既大大大前提尚未解決之前,諗其他都係多餘。有返咁上下本錢,再重新考慮是否搬出去啦!

4 則留言:

VC 提到...

留錢員股票,將來做首期好過啦。

余若虛 提到...

vc,我個人傾向不斷做資本增值,直至樓價到抵買水平才入巿,最好買斷唔供。至於資本增值方法?各施各法啦!

VC 提到...

如有信心"資本增值", 如果o岩價不應等"買斷唔供"吧?

香港流行的樓換樓&樓養樓有一定智慧。

余若虛 提到...

o岩價買樓,都係資本增值既好辦法啊!只係香港人(中國人)經常比置業安居既concept影響,認為幾時都買層樓先最實際,結果好多無辜新婚夫婦九七結婚買樓就捱左十年負資產喇。