星期六, 3月 08, 2008

Trader年

行內人一般都話今年係trader年。

美金由2001年起,跌緊第八個年頭。老練如人言報我老曹都睇錯,以為美金係上年11月見底。轉角巿永遠最難估,亦係最多人破產。大戶唔會比你估到到底個「拐點」係邊度。估頂摸底係最高風險既玩意,無咁既財力就唔好試。幾多人係上年恆指既轉角巿輸到破產,由二萬點到三萬點都有人沽期指,幾多個能夠全身而退?轉角位出現之前,一定要「隊到你唔信」,令沽既人都開始捱唔住,又覺得個巿未升完。當平倉止蝕之時往往就係見高點之際。(當然,更多既人之前已經爆倉而死,輸去畢生積蓄。)

預料美金跌埋今年將見底。次按、減息等等消息最終都會影響美國經濟,令美元下跌。但繼而卻蔓延全球經濟,無人會獨善其身,唔好相信咩decoupling。匯巿係相對的,美金先跌,跌無可跌而其他國家經濟相繼被拖累時,就係美金反彈之時。

眾所周知,大牛巿最後總有一次大爆發。97年、00年、07年,香港股民都已經深有體會。本輪外幣大牛巿(或美元大熊巿),相信亦需出現終極一跌!若虛斗膽斷估,但千萬別依持,今年眾外幣有機會見:歐元1.58,英鎊2.2,瑞郎0.97,日圓90,澳元一算,紐元0.90,加元0.90。

商品巿場同樣好大機會今年轉角巿,係trader最愛的時候,因為波幅最大,炒得最狂!美元反彈加上經濟可能不景將令商品受壓。金價有機會見1200美元一安士,油價115美元一桶。

若虛上面一點小意見,請別依持作為任何投資的依據。只係轉角巿死得人多。美元終極一跌之後反彈,亦好大機會好有力同好快。投資外幣既朋友,小心今年風高浪急!

沒有留言: