星期三, 2月 06, 2008

差佬再出洋相

香港警察巴巴閉,前幾日鄧竟成條木咀走出黎聲色俱厲咁話藏有淫照都有可能犯法,被全香港千夫所指。如果佢講真,咁叫佢早啲向財政司預算案申請撥款同批地,起番個坐得一百幾廿萬人既監倉先,然後請高調拉左近排最出名,全香港都知佢成電腦淫相條友。

差佬終於知呀鄧生講錯野犯眾憎,急急忙搵個副處長出黎解畫,話藏有或者同「朋友」分享都無罪,只係向公眾發布有罪。呀希少做錯野,親自發個video認錯(雖然只係讀稿),尚且比網民插到飛天。鄧生9up完,可以當無事,求其搵個阿二出黎打個圓場就算數。一哥真係一哥,巴q閉。

個二打六黃副處仲大大聲話已經搵到源頭鎖左人,呢頭話聲未落,個頭又有新相蒲頭,仲要係新主角!差佬今次仲唔比人笑到面黃。差佬其他案又唔見佢咁關心,區區幾個artist仔輕狂自拍慾照流出,就搞到勞師動眾。懶係效率高咁捉左件失業中坑,仲屈左人還柙八個禮拜,之後先發現源頭同佢一啲關係都無。跟住就搵藉口,話佢涉嫌詐騙喎!法律觀點若虛唔曉講,可以參閱前文連結左大律師鴻文。

跟住就捉左堆電腦公司職員,以為掂左,大大聲話搵到源頭,點知即刻比人大大力刮一巴,整幾張新相大家嘆(你唔係以為條link有相睇下話...)。鄧sir、黃sir,你地香港警察仲有咩面呀?

沒有留言: