星期四, 1月 31, 2008

神都有錯

Uncle4千呼萬喚始出來,自嘲係「冒牌股神」,又「修訂」自己既預測。股神英名,一朝盡喪。

尤記得阿叔上年意氣風發,不時又發言話自己動用幾多幾多錢入巿,又貼股巿點數,又貼冧把,直情係黃大仙。當時巿場氣氛仲未好相信大巿會行大單邊時,四叔已預計股巿見27000,中左之後又上調到30000,都中。媒體對這位名滿香江又言無不盡既城中名神極為欣喜;散戶更奉為股神,幾乎要日夜燒香祭祀保祐闔家發財。

媒體捧到上天,受萬人景仰既阿叔,係四方八面既奉承讚美自己既聲中,隱隱然以為自己真係神,點數預測開始收唔到掣,不斷發功。結果係33000觸礁,被天庭第二把交椅溫總剎停。阿叔依舊以為只係少少既考驗,仲豪言準備十億入貨。當然,十億對阿叔黎講,只係九牛一毛,不及佢投資公司資產既1%,更莫講阿叔既身家。

直至美國次按問題愈趨嚴重,環球小股災下港股見22000點,阿叔如夢方醒,終於醒悟自己唔係神。呢個世界,原來無神。有既話,都係天庭既胡溫大帝,一言興巿,一言喪巿,並唔係李四叔。但老人家擱不下面子,就要愛兒出馬,應酬一下群眾,順便鬧下跟風既刁民「唔聽話」。但群眾怨聲載道,已經一發不可收拾,阿叔日前惟有抓下面皮,自嘲冒牌股神。

曾幾何時係香港首富、而家都仲係叱吒風雲既阿叔,竟然顏面掃地,真可悲也。其實阿叔腰纏萬貫,自己投資有道,更無義務向人分享投資心得。只係阿叔縱橫商界數十年,成就斐然,早年與郭氏兄弟父輩合作,新鴻基之「基」字就係取阿叔之名而來。後來另起爐灶,依然獨霸一方,生意愈做愈大,確有其厲害之處。但阿叔發財未能揚名,不如首富誠哥,一舉手一投足都受到本地以至世界傳媒關注,書店放滿其傳記及經營哲學之書。阿叔有既生瑜何生亮之嘆,自問生意上難追,要吸引群眾目光,唯有另闢徯徑。他變身投資大師,結果成功引來注意,令阿叔既享受鎂光燈不斷閃爍的明星級待遇,更嘆盡萬民膜拜奉為神祇的教父式崇拜。只是阿叔見好不懂收,犯下多言必失之忌,終於一Q清袋。上至白頭任冷諷講股票請問四五六叔,下至販夫走卒滿口粗言指罵累街坊。阿叔講中咁多次,帶契大家贏錢無人記得,反而輸錢大家就要搵替死鬼,其實阿叔都幾唔抵。不過,食得鹹魚抵得渴,其實佢應該都知有咁既一日,只係鎂光燈既閃光就好似一劑劑迷幻劑咁,令佢欲罷不能。

投資,都係靠自己啦。呢個世界,無神。有神,都唔會幫你炒股票。

3 則留言:

波蘿游 提到...

四叔以為傳媒一直追捧自己。

實情係:傳媒根本知道股市會升會跌,一直等待四叔跌低的一天。捧到你咁高,就係要你跌得更金

明子駉 提到...

麻氏,我的博客總算開張了.有空過來留隻字啦.

余若虛 提到...

波老闆:若虛愚見傳媒都係追星族,乜星都追,咁有個有求必應既投資名星仲唔捧到天咁高咩。到個巿落,傳媒又發揮一貫見低就睬,加埋迎合大眾鍾意睇大人物折墮既心理,自然係咁隊你~

子駉:多多發文啦!