星期二, 11月 27, 2007

阿叔發功

股巿好呢,個個都股神。呢個出黎講話睇30000,個個話33000,呀邊個仲話40000。講下咋嘛,又唔使負責任既。唔知有幾多人誤信呢D神棍而係近排呢個巿中奶左野。

有個唔三唔五既阿叔,三日唔埋兩日就講野,呢頭話年底睇28000,到左28000就話30000,到左30000就話33000,好啦,神左幾獲,比溫總一野掟返落黎。信左佢入巿個班友已經唔死一身潺。近兩日阿叔又發功,話準備左成百億入貨,而家就買住十億玩下咁。

阿叔個幾廿億,對佢黎講跟本唔算係咩錢。佢每注入十億,仲可以分十注買十隻八隻股,兼且唔怕佢跌,大不了坐下艇。反而無知既羊師奶們,有幾多個有分十注既本事,買十隻八隻唔同既股?買得一隻半隻又驚睇錯巿買錯貨,買得一注兩注又驚低處未算低,兼夾D錢可能唔係咁閒錢,要捱一年半載可能周轉唔黎咁。呢位阿叔又無厘信用,講幾點就幾點,中左又講多D,終於有次唔中。小心佢高位出左貨,唔記得同大家單聲喎。

係喎,仲有位阿叔話四萬!信不信由你。個堆阿叔同大家散戶,跟本唔同玩法,跟人之前,用自己個腦諗過先。每逢巿旺,總有無數人走出唱好個巿。陸東力排眾議,好彩溫總發下功而家仲有人理佢,到個巿開始行佢仲係咁淡個時,佢就會比人鬧死,罪名係阻人發達。或者佢真係阻人發達,但更可能有一日羊師奶們會後悔無聽佢既忠告。

2 則留言:

波蘿游 提到...

今日到彤叔開口,真係驚死冇人知佢地仲度

無論點比較,老一輩富豪,都係超人D質素高幾班

余若虛 提到...

非常同意!超人除左係高位已經減持南航同中海集運幾隻股外,係前幾日亦公開話唔會評論見幾多點,只叫大家小心。雖然有同鍾意tip點數既阿叔對著幹既味道,但明顯做法好好多。