星期三, 11月 21, 2007

人工

見到CK談人工,若虛都想插把口。

若虛和朋友們係畢業前已經不斷反覆討論未來發展既路向。係不斷既互相交流同詰問之下,大家都建構到一套對於工作既睇法。所以若虛初出茅蘆亦不至於盲中中。

一個人既天資、興趣、能力、才華,係到你出黎搵工呢個年紀既時候,好多野都塵埃落定。正所謂三歲定八十,去到一個年紀要求變好唔容易。有好多人一世盲中中,就係因為對自己唔了解,亦比唔到一個目標自己。若虛其實之前都懵懵下,只知自己想係商界做,唔想做technical既野,就走去讀business。Business咁多科,糊里糊塗就揀左科原來都唔係好match自己既(另外,就係呢個其實係third choice啦...)。係不斷既探索同討論之間,我先叫做自己開始摸清個方向。每次既討論都將我想揀既工種縮窄,直至我認為淨返既行業同工種適合自己。

好簡單一個方法係,試想像自己進入某一行業,然後每日既工作會係點,自己又會有咩感受。一個唔鍾意對住數字既人唔會想像到自己可以日日對住D上上落落既價;一個唔鍾意講野既人唔會認為自己係一個好好既前台服務員。每個人有自己興趣同能力,應該盡量去了解自己既興趣同能力係邊。係自己唔鍾意既崗位上工作,再努力都難有好成績,皆因過唔到自己個關也。

若缺齋老人經常講搵工最忌跟紅頂白,若虛好同意。而家有太多人見到金融業好景、會計佬好賺,個個仆哂入去,有無諗過自己既感受呢?人比自己最多既藉口係:「興趣係陪養出黎」、「學學下就識」云云。若虛唔排除有部分人係咁,但大部分人既character其實都幾rigid,去到呢個年紀(都係廿零歲)已經定哂格。見過好多人搵到份工之後覺得人工好似唔錯都無考慮其他,入到去先知自己完全無興趣,日日返工好似上刑場,放工好似打完仗。況且,時移勢易,呢期紅既工,唔知邊期會變返一窮二白。金融業係最好既例子:巿旺人人賺好多,巿淡個個裁哂出黎,唔會有情講。

若虛搵工個時,人工,已經唔係major concern。份工既工種係咪合我、對我既resume有咩影響、對我之後既career有無幫助先係主題。話需說回頭,人工,我覺得應該有條底線既。若虛覺得太低既人工某程度上係代表僱主對呢個職位、或者呢個僱員既唔重視甚至係唔尊重。試問不受老闆尊重既工種同僱員又邊有機會係呢間公司發展?至於點為低,要自己去定義。用巿價既同級職位去比較。搵工唔做資料搜查必死。唔知價自命不凡開到天咁高仲以為人地孤寒財主睇你唔起無人救到你。

若虛而家亦都未試過同朋友比較人工。我諗我算係不過不失見得人既,但我覺得無謂攞出黎比。個呢一刻你贏我三幾百甚至三幾千意義都唔係咁大。Career,係一生的。

不過,after all,要想做自己適合做咩首先係要了解你自己先。太多人對自己唔了解,連自己咩野好、鍾意咩都唔清楚。其次係搵工之前對自己搵既工種一無所知,唔做資料搜查,盲中中。有基本功,先好練上乘武功,唔係以為自己行緊正途,其實走火入魔。

5 則留言:

若缺齋老人 提到...

好老實講,會計E家野只有捱得到同捱唔到、有冇同冇用(Local Firm學既點睇都唔覺得有用),鬼會真係「有興趣」?

(唔客氣講,如果唔係人云亦云而真係知會計係乜,咁都覺得有興趣真係有少少心理XX。)

余若虛 提到...

嗯,或者咁講:會計呢行難頂呢,就係人都知架啦。但起碼係入呢一行之前,都搞清楚自己,唔好話有無興趣,但頂唔頂得順先。

VC 提到...

有無想過將來自己創業?

余若虛 提到...

vc兄,若虛的確有咁既諗法,但係未有條件之前,作太多天馬行空既諗頭亦無意思。

匿名 提到...

管理費疑問:
為什麼香港法例第344例,物業管理條例內註明管理公司可以按照管理支出收取10%之管理人酬金。點解不可以由業主立案法團自行訂定。