星期四, 10月 11, 2007

綜援議政?

比個謎大家猜下:一個人,人到中年,無乜成就,領綜援渡日,忽然搖身一變,以為總有一日龍穿鳳,唔使日日褲穿窿,想係政壇撈返個位。

相信大家有睇新聞都估到,呢個就係因為近排訓碼頭而聲名大噪,呢兩日話要選立法會個位何來女士。咦,咪住,好似仲有一個人都符合哂呢堆條件架喎。係邊個?咪巴士阿叔陳乙東囉。

何來靠so called保育行動「揚名」,之前話要出戰觀龍同葉生死過。不過睇黎未選到,區議員呢個位已經滿足唔到佢既胃口,又要再進一步選埋立法會。不過,佢又唔夠巴士阿叔威,人地選特首添呀!巴士阿叔掉轉,選完先黎靠一段六分鐘對話(或獨白)而揚威國際(youtube十大,死未?)。

無巧不成話,兩位都係綜援人士。佢地係咪社會蛀米大蟲若虛唔敢講。本來何來有個九歲既女,佢如果為湊女而未能工作,靠單親綜援渡日都情有可原;但佢表明係唔滿意香港既經濟模式咁話。原來係咁,所以就唔打工,但就走左去攞綜援,蠶食納稅人既金錢、社會既資源。

何來個女,今年九月開始停左學。原來呢,何女士雖然每個月得六千綜援,但卻堅持女兒入讀每月五千學費既國際學校,錢更係由友人資助咁話。而家友人唔再資助(長貧難顧?貪得無厭?),何來就向緊其他友人埋手攞sponsor。佢又唔滿意香港教育,堅持個女要讀國際學校唔係就索性唔好返學,有兩間中文中學收佢個女比佢一律峻拒。

其實,何女士,如果為個女咁偉大,點解唔考慮向社會低頭出黎做下工,貢獻下社會呢?司法覆核個百幾萬堂費,政府都幫你墊埋,其實都唔爭在供養埋你女兒讀書。不過,何女士既然對香港咁多不滿,點解又唔挺直腰板,唔好向香港政府攞錢呢?向政府攞錢,同向你唔滿意既經濟模式低頭,有分別嗎?如果係咁有骨氣,都可以考慮移民出國呀(當然,錢又係問題)。

嗯,諗黎諗去,巴士阿叔都好似好過佢。

P.S. 講起巴士阿叔,不得不來個經典重溫:巴士阿叔(內有「廣東粗口」,貴客自理)。
呀仲有,呢篇呢,係唔中立持平架喇。Sorry,我對呢個人真係好反感,主觀呢啲野,我唔否認既。

4 則留言:

波蘿游 提到...

何來同佢好多兩手空空的戰友一樣,都可能因為冇私產,先咁積極去保護公產,有“懷舊戀物狂”先兆,可參閱

http://pineapple-farm.blogspot.com/2007/08/blog-post_06.html

巴士阿叔出選,當然好過何女士,最少她的女兒(或許)會受惠,得到應有的照顧

若缺齋老人 提到...

都係社會既錯,點解哥倫比亞大學唔畀full scholarship(通常美國既full scholarship會連生活費,當然undergrad少好多)佢個女?哥大都唔係第一日收年幼學童,今日佢搞成咁都係幾間Ivy League逼害而成要佢留在香港對住「咁既」教育!

余若虛 提到...

波老闆,你既文章好精警!香港已經病入膏肓,睇下幾時有得救。。。

老人你好!我係佢個女,就真係唔知話邊個錯好。可憐小孩子仲認為媽媽永遠是對的。

VC 提到...

波蘿游, 你錯了, 何來當選, 她女兒便有錢交學費返學, 何來還可以為我們爭取夠交國際國校的真自由學卷呢!