星期五, 8月 03, 2007

XANGA

XANGA呢樣野興起都唔知係幾耐之前既事喇。若虛只記得,唔知幾時開始,XANGA同MSN(或之前既ICQ)一樣,都係學生必備既證明文件。

MSN作為溝通工具,瘋魔全球電腦用家,係互聯網時代既產物,其作用就好似電報機係大氣電波時代同電話係銅線傳輸時代一樣。

XANGA唔同。XANGA既定位係一部網上日記。咁話明日記啦,照計係應該寫比自己睇架啫。不過,偏偏就有好多人,將佢地自己既私人日記公諸同好,等大家可以深入自己既內心世界,探討摸索究竟你係一個點既人。

聽落,係咪好好呢?可以等人同人之間既了解加深,拉近人與人既距離喎。

但,日記,之所以真實,就係因為寫既人係自己,睇既人亦只有自己。自己忠於自己,自己對自己負責,所以日記裏面既就係最真實既自己,係赤裸裸既。每個人總有啲野唔想比人知,總有啲陰暗面,就好似每個人都唔會赤裸示人。

當如果明知日記係公開既時候,有幾多人仲會將最真實既自己放上去呢?如果明知個地方有人睇住,仲有人會係個度換衫任人睇嗎?Well,唔係個個都咁鍾意跳光管舞掛。

咁既情況之下,XANGA就變左一個比人寫一本比人睇既日記既地方。寫既野,亦都係一個人想比人覺得既真我。偷換左日記呢個概念,XANGA上面既野就令人覺得可信。好多人就用XANGA去塑做一個形象、一個佢想人地覺得自己係點樣既形象。

尤有甚者,XANGA成為左一啲人虛偽、中傷、造謠既地方,是非處處,流言滿天飛。寫過一排,我都對XANGA呢個是非之地敬而遠之矣。

3 則留言:

X力臣 提到...

好好既題目...

其實都唔單只係xanga, 其實所有blog都遇到你所講既情況...

某程度上, blog已經成為左我地既pr department...

但是, 在日記中, 又係唔係個個都可以暢所欲言呢? 我地每日發生咁多事, 可能有d係唔想寫響日記... 寫唔寫總有原因...

想記低的, 就寫...

始終, 手寫日記都有機會比其他人睇到...

xanga都一樣... 如果放棄寫, 會很可惜的.

(p.s. 我唔寫xanga... 因為覺得xanga個layout好ugly)

余若虛 提到...

嗯,咁日記唔assume比人睇既。有野唔寫,可能係自己情感上抗拒。日記比自己睇,對自己唔忠誠,咁係呃自己。

X力臣 提到...

多謝回應...!

係呀... 仲有,唔單只係情感抗拒,有時人係唔會認自己做過既野,唔想留低任何痕跡。

***

blog有時真係可以為生活添上意義。

話說呢,我有個朋友喎,咁佢係中學同學黎既。但係,佢中五果時就去左澳洲啦。佢日日都寫日記,佢仲放埋上網tim。我初頭都覺得佢好白痴。因為,佢寫日記好似say prayer咁,好長氣。

如是者過左幾年,我都間中有睇佢日記,了解到佢響果邊既生活,心路歷程。

到左今年,佢終於返到黎香港啦,因為佢結婚了。我同d朋友都相當高興,因為大家都有睇佢日記。我地終於有機會睇下佢日記入面既人物啦。大家都好開心見到佢結婚。

果種感覺真係好正。

好似同d兄弟響度一齊經歷緊好多野,好有意義。