星期四, 8月 09, 2007

ABCDE Vs 54321

會考放榜,今年中英文轉制,由以前分ABCDEFU,變成5*, 5, 4, 3, 2, 1,同埋不予評級。Grading數目其實無變,A=5,U仍然都係unclassified,不予評級。變既係制度,由以前拉curve變成所謂水平參照法。

呢個變化好壞下面講。但有一樣野一定係改好左,就係廢除左一試兩考既syllabus A & B既制度。以往會考分兩個syllabus,A比B大概低兩個grade咁。但無論係A卷定B卷,合左格就叫英文合格,有資格升中六同考政府工,而外面既公司尤其中小企有部分都唔知其中既分別。呢種雙重標準不單混淆視聽,仲令好多英文跟本唔達標既人得以魚目混珠繼續升學,破壞成個教育體制。中六收生要計分數亦要求中英文合格,除左唔合格變合格外,如果考syllabus A既同學,一般就可以拎多2分。如果就係差呢2分達到14分呢個門檻,咁對syllabus B既同學都唔公道。係街巿買餸,你都要知一斤十兩定一斤十六兩架,而呢兩套標準,跟本無理由可以並行既。取消呢種雙重標準可以話係德政。

政府又放言,話新計分方法更能反映學生語文能力云云。若虛對此就不敢苟同。舊制係依據學生比例分grade,例如頭3%學生係A,咁佢地幾多分都會A。呢個對考生既不公之處,就係每年既考生水平可能有所不同。例如今年強,85分有A,明年75就有A,A唔到既唔代表就一定比上年A到既差。意思係,如果你生不逢時,撞著個年人才輩出,咁你就只好怨阿爸阿媽點解要個年生你。

而新制就係劃定分數評級。即係例如定左80分有A,咁只要夠分就A,如果全世界都80分,就全世界一齊A。咁做好似就話,只要達標,就有呢個成績,人地勁好差好,做好自己就攞到成績。

但呢個論點忽略左試卷難度既問題。需知年年試卷難度都有分別,今年既卷,就可能比上年深,咁今年A既人數,就可能要比上年少,可能你既能力足以係上年拎A,但今年就,sorry。

若虛就覺得,每年學生人數愈十萬,人數足夠多既情況下,分配其實都應該唔會偏離normal distribution太遠,每年考生水平應該會相約(當然,呢啲問題可以留比數學家或社會學家)。而水平參照呢,每年分卷唔同,若虛唔清楚標準分會唔 會就住作調整,而要比較試題難度再去計算標準分實行上亦睇黎唔易。

其實呢個問題就係牽涉到絕對標準同相對標準問題。更深層既意思係呢個A既象徵意義。到底呢個A,係代表你係呢群人之中既精英,定係代表你能力達到某個程度?

P.S. 仲有,都唔明點解要轉做54321,混淆視聽。其實grade又係分7個,又係2分英文入到中六,咁用返ABCDE都得丫。我硬係覺得好唔順眼。

5 則留言:

Patrick 提到...

我諗,其實新制用54321而唔用ABCDE,其實係為左令人知道你係新制既產物。

可能有些機構對新制下的中英文分數有唔用既要求(例如以前C就入到,但現在5分先得),照咁睇,佢用唔用既form表達出兩者其實有分別並無不可。

「英文C級或以上(06年或以前)/B級或以上(07或以後」此類有長有複雜既句子最少唔會出現。

余若虛 提到...

你講得啱呀!只係我情感上真係好唔鍾意咁轉。

Camiseta Personalizada 提到...

Oi, achei teu blog pelo google tá bem interessante gostei desse post. Quando der dá uma passada pelo meu blog, é sobre camisetas personalizadas, mostra passo a passo como criar uma camiseta personalizada bem maneira. Se você quiser linkar meu blog no seu eu ficaria agradecido, até mais e sucesso.(If you speak English can see the version in English of the Camiseta Personalizada.If he will be possible add my blog in your blogroll I thankful, bye friend).

明子駉 提到...

老實講
我不太同意語文類用這種絕對標準。

因為這是自己綁死自己。

會有人覺得語言科的試題有可能真的標準化,難度長期穩定?

即使是過去的試卷,亦會隨時代改變,社會需求改變而改變試題側重。新制不可避免要降低這種靈活,不然不公平的大帽必然罩下。

語言根本很難說有一個永遠客觀的分數標準...重點是學生的語言能力能適應當時的社會與否,知道考生在全體新一代的相對水平已很足夠。
文學,歷史等的人文學科與此相類近。

反之,數理類科目倒是合適弄絕對標準。
不過政府似乎打算把所有科目都這樣辦...@@
算了,反正香港人文學科本來就弱,再弱一點也不算非常可惜。

VC 提到...

更笑能死的是這系統只用幾年, 她不兼容3-3-4制的!