星期四, 7月 12, 2007

絕版銀紙

前幾日推出左一堆膠十蚊銀紙,竟然有大批蟻民去排隊換領,唔知仲以為又有咩新股招股。

膠銀紙係香港的確係新野黎既,見新奇換黎睇下都無可厚非。但有啲人就話銀紙係絕版,有收藏價值云云。

點絕版法?原來話因為有唐政務司司長既親筆簽名,可一不可再喎。

財政司司長既位子,係特首既左右手、內閣成員,基本上每個特首都會委任自己班子既人出任,以特首五年一任兩任十年咁計,頂多做夠十年都要掛官歸田。回看回歸十年,都已經有四個人坐過呢個位:曾蔭權、梁錦松、唐英年同曾俊華。

記得當年松爺都有簽過新一批十蚊花蟹架喎,有無乜聽過人話有咩價值咁。

唔通真係跟紅頂白,亂買車個啲就唔值錢,下任特首既就可能一登龍門聲價十倍,花蟹都變紅衫魚?

中銀之前劉金寶簽個批銀紙又有無價值呢?睇黎無喇,貪污既人睇怕都唔多會升值。

係香港反智?定係咩都炒得?

4 則留言:

Gideon 提到...

前兩日响 CWB 見倒有派 "I'm not a plastic bag" 既地方送/換兩張膠銀紙添呀,不過要排成個幾鐘,都唔知發生咩事。

余若虛 提到...

嘩,歡迎鐵鎚兄!

香港人,好鍾意排隊,乜都排一餐,排咁耐換膠銀紙,真係膠膠地。

Patrick 提到...

唔好講膠幣或者松爺張花蟹

十年前夠有人話D英女皇頭硬幣有「收藏價值」喇,

宜家?係街市買下菜隨時仲搵到一兩個。

余若虛 提到...

patrick:哈,間唔中就有啲咁既野,過幾年諗返大家都只會得啖笑