星期一, 7月 16, 2007

大學生就業率

每一年大家都會聽到關於某某大學今年畢業生既就業數字,大概內容都係話有九成幾幾既畢業生都係三個月內升學或搵到工咁。

對於都仲搵緊工既我,有啲感受囉。

其實我既profile係畢業生之中都算阿駝行路中中地咁,唔算太惡劣啦,但到呢一刻,雖然係有offer,但始終去唔到令我滿意到可以即刻止賺離場既程度。

而我認為大部分畢業生既情況都相約。撇走一堆一早accept左offer既學生,實有不多不少一大堆人係個就業巿場度等緊機會。情況就好似有一班人係股巿度投資,有啲人到價上岸,而有一班人始終都係度望緊價。

但當時間一日一日咁過而始終都到唔到價,悲觀情緒就會係呢一班仲係個巿場玩緊既投資者之中蔓延。去到一個臨界點大家覺得再唔離場分分鐘蝕清光既時候,大家就會爭住走,出現恐慌性拋售,本來望緊萬二蚊既大行trainee,而家中小企八十蚊文員仔都頂住先。三個月咁長,無好多人有咁既能耐同決心係個巿度呆落去。所以,個就業率,咪一路頂住咁高囉。

By the way,我自己都唔可以係度長等。有offer,就當係一個止蝕位。即使到唔到價,起碼唔使一Q清袋嘛。巴菲特都話保本、保本、保本。

2 則留言:

Patrick 提到...

講得好。

個堆數據成日都好概括咁俾個數字你,但係實際係點真係自己先知。

去M記做18蚊又叫做搵到工,去補習社做暑期part-time又叫有野做.....

我既情況可能好少少,offer都係叫我幾遲先開工,可以邊accept offer邊繼續搵工(好似好shxt咁),慢慢推高個止蝕位。

共勉之!

余若虛 提到...

Patrick:無錯啦,聽埋報紙新聞個啲統計多餘,始終身在其中先知。

共勉之!