星期四, 5月 24, 2007

閉路電視Vs宿舍管理

POLYU HALL裏面每一個角落(除左房間、厠所同後樓梯),基本上都係閉路電視(CCTV)既覆蓋範圍。

我唔知香港仲有邊個地方係咁,除左酒店同監倉。

基本上,由你踏出房間既一刻,你既所有行縱都會被紀錄。而且,閉路電視既清晰程度,足以係特定資料庫裏面辨別某人既樣貌。

若虛唔係好搞得明,一套咁監倉既監視系統放係一所大學宿舍所為何事。

Hall係有好多形形式式既guidelines,例如唔准食煙飲酒賭博喧嘩滋擾他人,11-7唔可以留係異性樓層等等。我唔明白呢堆guidelines係依據咩標準去set,但hall management點執行呢套guidelines其實可以探討下。

我既意見係,如果係影響唔到人既情況下,其實,又需唔需要管得咁嚴重呢?

即係我係我自己房夜晚同幾個男女性朋友飲酒,飲完酒各自返房訓覺,係無嘈到隔離左右又無醉酒鬧事滋擾他人既情況下,其實又需唔需要去管呢?又或者,我地係房喧嘩,但隔離左右並唔介意,仲可能嘈埋一份大家開心,咁,又需唔需要去管呢?

當然,係法律上,每個學生入hall都已經係contract度簽左名接受呢堆條款,咁應該係要跟既。有人會覺得既然hall有咁既rules,又唔可以有法唔執既。呢個論點當然無錯。

我想講既係合理唔合理既問題。撇開所有合唔合法既野黎講,大學宿舍,究竟需唔需要咁樣限制、監視、管促學生。除左CCTV,仲有看更不定時巡樓(約莫一至兩個鐘一次),實行睇到你實。

大學生基本上都係十八歲以上,手持三星香港永久居民身份證既成年人。佢地有自己既自由意志、思想,亦都需要為佢係社會上所作所為負上刑責。大學係咪應該要好似董腳痛治港咁,實行家長式教育,好似阿媽教仔咁,話埋比你聽邊樣做得邊樣唔做得?

大學係培育學生獨立思考既地方,可惜大學宿舍偏偏要壓抑學生既個人意志,立下不平等條約,禁止學生做社會同法律接受佢地做既事。

當然,自由意志不等於為所欲為。學生所做既事必須合法,而且不影響他人。

所以,有看更見到你飲酒都唔會理,in case你無醉酒鬧事嘈喧巴閉,我覺得係好事喎,有人情味!不過,管理公司(外判左)同看更講人情味定請佢食無情雞就唔知喇。

好似飲酒、賭錢(有限度)呢類合法活動,若虛覺得實在無理由禁。唔係個個飲完酒都醉酒駕駛、醉酒鬧事架喎。如果因為有人會飲完酒鬧事而禁酒,咁應該全香港都要禁酒啦。

至於吸煙,由於二手煙不能避免會擴散影響其他人,所以禁係有道理既。硬係要講既,咁可以劃吸煙區既。(不過,咁做個社會又會發癲亂吠)

好似夜間探訪異性房間呢類行為,其實應唔應該禁呢?走到街上求其捉幾個師奶阿叔問,都應該會話:「禁啦禁啦,唔係佢地咪亂咁黎?」

但其實同hall共住,有時坐埋一齊傾計、一齊玩、飲酒,好平常架喳喎?日頭要返學,咁梗係夜晚先坐埋啦。你幾時見人地會朝早係酒吧開party架?

唔講玩,夜晚相訪可以係傾功課、做project架嘛。你知啦,有好多野唔到最後一日都唔識黎急。但如果問hall management,佢會答你:要做project,出common area做。大佬,我要用電腦,部desktop點算呢咁?

好喇好喇,的確有男女真係夜晚係房幽會,翻雲覆雨。但係,佢地都係成年人喎,咁做又無犯法,點解要禁呢?你話驚搞出事,拿,呢D咪家長囉!要出事,駛乜夜晚,日光日白照搞可也,又管到幾多?難道要男女全面禁止互訪?係唔影響同房宿友既情況下,其實有咩問題呢?係婚前性行為合法並已經被普羅大眾接受(當然會有人唔同意呢個論調,但至少大家認同係毋可避免),其實,係咪應該好似外國宿舍咁加部condom售賣機先係正途呢?相信而家賣condom唔會再比人話係鼓吹性行為喇掛?如果有唔知X光社會唔會又要出招呢。

到底,香港既大學係想教D點樣既學生出黎?係咪要以six-sigma標準倒模一批佢地覺得合格既?

8 則留言:

Justin 提到...

唔淮出現於異性樓層,都防止唔到鐘意同性既人响自己果層度幽會/搞野/𥄫野。

宿舍路人 提到...

師兄您好。小弟看了你的博落一段時間,一直未有留言。但看完你這篇文章後,實在身同感受,故略抒己見。

理工學生宿舍保安之高,絕對是凌駕於其餘七大。所以小弟平時也放心放著房門,因為幾步路之隔便有閉路電視,出入更有嚴密保安,故我從來不擔心有失竊之虞。

這宿舍保安之高實在令人驚訝,我時常也在想究竟一座大學學生宿舍有沒有必要需要如此保安。

最近快要 quit hall突然想到一點,原來宿舍暑假會租給外人住,尤其是內地人,忽然恍然大悟為何保安要如此高了..

余若虛 提到...

Justin:係呀,所以有人話宿舍既規矩係岐視異性戀。

宿舍路人:你好!宿舍暑假要搵錢租外人住我係唔反對的,保安亦有必要。但係今年發生好多單係用CCTV去主動出擊捉人事件(捉人出入異性房間然後發警告信之類),我就覺得幾過分,感覺係無時無刻監視住學生囉。如果CCTV係用黎係有事發生後追溯事件經過,例如捉賊咁,咁既用途我覺得無問題。

宿舍路人 提到...

竟然此事?!我完全唔知,可能是我摺 hall 吧!

最近每層樓都加設了告示牌警告異性宿生不准出入異性房間,我還以為只是造給外人看,原來內裏確實有捉人,嘿!

香港的大學,真的是越來越中學化....

題外話,師兄您是否 hall 莊人? 仰或是身懷絕技的校隊? 何以可住足三年 hall,我下年不能住了,真有點捨不得!

siuwan 提到...

a nice blogger.

余若虛 提到...

宿舍路人:我係hall莊老鬼,所以比你知多少少啦。
呢兩年個hall真係越黎越無人情味,以前好多野都有情講,而家就淨係識講埋D無道理既規矩。搞到我都唔多留戀喇。

你既hall life好開心?恭喜你啊,唔係個個個住hall住得咁開心架!

siuwan:多謝讚賞!請多來留言!

L 提到...

所謂的觀點真係白痴
怪唔之得你只可以讀poly

匿名 提到...

裝曬CCTV, 仲要成日check住, 真係好過分! 每一分鐘都比人check住既hall, 無法忍受! 你竟然可以住三年粒聲唔出!

已經過左n年了, 你好我係2011某大的學生.
我地呢邊舊hall門口已經裝左讀卡機, 要插卡先比入. 屈蛇已經變得困難. 看更夜晚先有, 而且好多時都係隻眼開隻眼閉. 但近日有位officer鬧看更叫佢地執嚴d唔好比人唔插卡! 只怕遲d佢會越做越過分24小時有看更.
真係好嬲, 我唔知可以點樣抗爭!
乜大學hall屈蛇唔係傳統的一部分咩? 當年Steve Jobs無錢都係靠屈蛇!(remark1) 蛇唔需要交租亦唔需要同蛇主好熟, 靠的係一種大家都係"x大人"互相接濟的精神.(與蛇主較熟當然比較好)
07年朱經武明明講過唔再打蛇!

究竟點解香港人要比人處處食住, 逐小逐少咁剝削自由同尊嚴! (e.g.二次創作條例) poly的hall果然真係社會的縮影.

亂咁up請見諒.

remark1: It wasn’t all romantic. I didn’t have a dorm room, so I slept on the floor in friends’ rooms...
http://onemansblog.com/2010/02/01/steve-jobs-outstanding-stanford-commencement-speech-from-2005/