星期一, 12月 31, 2007

普選

煲呔曾向人大遞交既報告書,既如實表示「超過半數人支持2012普選」,亦成功地以一句「2017年實施普選更容易取得社會共識」揣摩上意,以兩句互無衝突的fact,平衡左兩種對立既民意,可謂既機關算盡,更用心良苦。

其實,超過半數人支持2012普選確是事實,但香港主流意見經常將支持2012普選說得太死,忽略了機會成本。很多巿民大眾(若虛相信是大部分)支持2012普選,意思是如果任揀之下,無條件之下,最好就2012。但若果話係2012唔普選,不過2017就普選,其實好多人都願意接受政治現實,退而求其次,畢竟權在中央手,普選遲到總好過唔到。所以如果問題係問「你會唔會支持2012普選」,會有過半數答「會」;但若問若果以「與中央抗衡,甘冒放棄2017普選之代價以實現2012普選,你會否支持」,相信現實的香港人都情願多等5年,而不願令2017有普選的大局有變。2005泛民以綑綁議題來令政改方案被否決,就不獲多數巿民支持(而多數巿民是支持普選的,即至少有部分人雖支持普選卻不願見方案被否決令政改原地踏步)。

另一樣被傳媒(尤其是生果報)綑綁誤導公眾的例子,就是支持普選、支持民主就等於支持泛民主派,而不支持泛民主派就等於不支持民主,是左仔、土共,隨時仲要比人話左毒上腦、土共赤化。所有批評民主派的,都被扣上「左仔」、「土共」的大帽子。而以往扣上民主派頭上的「通敵賣國」、「借外國勢力干預」反而少聽了許多。


名Blogger馬沙最近一篇於am730論普選的文章說得很好,亦惹來不少人攻擊,說馬沙是沒良心的知識分子、只管銅臭不理民主的生意佬。馬沙兄用詞的確辛辣了點,但亦遠不及生果報的橫蠻粗鄙。對於馬沙兄的觀點若虛讚同不已,亦佩服他敢於冒被醜化的危險於專欄中如此批評泛民政棍的勇氣。

白鴿黨近日的絕食行動,真個大笑話。絕食,還要輪流,更可吃流質食物。區區24小時絕食,與喜帖街女士3日絕食至不支送院相比真可笑。當然我並不是鼓勵絕食至身體不支,而係政客高呼絕食之後,卻雷聲大雨點小,作作樣子就算,令人覺得只為做show,嘀笑皆非。而社民連四政棍做show之意更明顯,成功闖關的羅就明言跟本不預期能通關,故此大失預算。不預期能通關卻要求過關,通關後不知所措一臉茫然,不是做show為何?

如今人大終允2017普選,想必如師爺曾話齋,不敢輕易食言。若人大當真食言,香港還不反轉嗎?何不姑且相信人大一次,就放長雙眼,睇下中共係咪好似以前一樣講過可以唔算數?

星期六, 12月 29, 2007

恭喜CK老闆

繼眾人大佬渣老闆後,CK老闆既人在中環終於結集成書。祝人在中環一紙風行!

星期五, 12月 28, 2007

兩電的「聖誕禮物」

香港經濟好,個個趁聖誕假期大過好多年無過過既揮金如土癮之後,電力公司都大送聖誕禮物,就係見大家手鬆,伸手落你袋攞多6-8%。

仍然係所謂利潤管制既問題,而呢個問題,則係英國佬當年同兩電簽協議書既時代留落黎既歷史文物,但相信唔會有保育人士要求保留。而陳方議員昔日既為在位者,今日卻反轉槍頭對利潤管制制度大加鞭撻,可見政客之人格分裂。

兩電盈利豐厚,但電費通縮時無減,通漲時卻猛加,任誰都知於理不合,加之其先天的壟斷地位,再有合約保證,連政府也奈何不了。兩電中又以港燈電費比中電高三至四成,皆因成本較高。

利潤管制以兩電資產投入作為釐定利潤準則,造成兩電的瘋狂投資,港燈更於南丫島興建多座電廠企圖再謀暴利,卻因電費過高導至商舖紛紛如東柏林巿民般逃到九龍,令總用電量不昇反跌,多座電廠遲遲未能投入盈運(因用電量不足),令港燈冒受損失(因未投入供電的電廠投資不能用作計算保證盈利),遂連年加費加到盡企圖榨乾合約準許下的一點一滴利潤,十足的超人作風!

順帶一提,令李氏風生水起的海怡半島,當日為電廠。李氏將電廠遷到南丫島,卻將土地私授與同系公司,其地產投資盈利之豐眾所周知。

而本港的電力其實係有剩餘產能,如兩電聯網,則電力不致浪費(電力不能儲存),而巿民卻可享受平電,電網亦會較穩定,減低局部停電的可能。只因港燈一己之私,聯網令其失去藉口再投資以增加盈利,故一直反對。

兩電借殖民不公條約剝削巿民大眾,如今合約將到期,政府寧無一策以救香港蒼生哉?

星期五, 12月 21, 2007

Tequila

前排有位朋友生日,叫左大家一齊去遊船河。講起呢位朋友,年紀輕輕就有大盤生意,名副其實既「廠佬」,係大陸有好強既網絡。近排有個鬼佬同佢聯絡上,傾緊有關大陸設廠之類既生意,苦無門路就搵朋友合作。朋友遊船河個日就請埋佢黎。

鬼佬係中年美國人,非常幽默。當日帶左一枝Tequila來,叫Patron。價錢就唔清楚,但鬼佬豪言話飲過呢隻Tequila即大部分平時飲到既Tequila都係垃圾,大有曾經滄海難為水,除卻巫山不是雲之意。

Tequila,中譯龍舌蘭酒,其實係墨西哥既土產。只有係墨西哥指定產區栽種既龍舌蘭黎釀製既先叫Tequila,尤如只有係法國Champagne區生產既sparkling wine先叫Champagne,其餘一律叫sparkling wine。

平時飲Tequila,通常都係溝soda一shot shot,或摻片檸檬。鬼佬話此法只適合下品。上品應該乾飲,不摻雜任何其他成分。切片檸檬,先用嘴唇輕舔些檸檬汁,然後再喝一口酒,香氣四溢,確是上品。

喝著Tequila,與三五知己迎著海風,夜觀晚星,為被都巿污染的心靈洗個溫泉浴,若此乎復何求?

星期三, 12月 12, 2007

匯豐的敗筆

匯豐前幾天宣布將提款卡提款下限提高至300元,但一天後旋即宣布撤回,繼百佳唔派又派膠袋後又一大機構公關敗筆。

匯豐聲稱只有一成提款提款低於300元,所以提高提款限額可將排隊時間縮減一成。若虛敢說此說跟本不成立!有用過ATM的人都知道,用戶提款所用時間跟本不多,每位提款客時間最多在一分鐘左右之數。挑通眼眉的聰明提款客,若見有手持大疊「紙張」者排隊,必定避之則吉。需知一個人做轉帳,可抵五個人提款,而且轉帳者往往「囤積」為數不少的單據才去做轉帳,銀行櫃員機既無限定每位用戶每次轉帳次數,有不少人就一次過過三四次數,所需時間數倍甚至十倍於普通提款者!銀行所謂縮減排隊時間一成,是假設櫃員機用者都只提款,此說必不成立,更有混淆視聽之嫌!

若虛不清楚於技術層面上可有解決辦法,但鑑於過數者需時一般倍於提款者,銀行或可考慮設計專供過數的櫃員機,一如「入票易」機一樣。但過數者數目對比提款者為何將是一考慮,另外當然要看技術、成本及有否空間擺設該機。

又或者銀行可考慮讓客戶每次使用提款機時只能操作一次(無論提款或轉帳或其他...),然後就退出提款卡。當然銀行需配合宣傳讓客戶不要重複入卡。相信不少有公德心的客戶都不會在人龍長列之下不顧眾人目光不斷操作。那亦可鼓勵轉帳用戶於非繁忙時間或非繁忙地方才作轉帳。

這些都是若虛隨便想出來的一些方法,但應比匯豐銀行原方案要好。匯豐除於宣傳中有誤導成分,其方案亦落人口實,讓傳媒政客大肆評擊匯豐漠視基層小巿民利益、妄顧社會責任。匯豐管理層不可能沒想到這點,但有可能低估了輿論的反應。反正沒做好準備就草草公布就是決策者的責任,繼而急急收回亦只是彰顯當初的決定是未經深思熟慮而已。堂堂國際大銀行鬧出如此笑話,真一大敗筆也。

星期五, 12月 07, 2007

台灣文革(後續篇)

近日國際社會認真多新聞題材。台灣文革一浪接一浪,要破四舊、立四新,繼上年中正公行館被縱火、中正機楊易名、中正銅像拆得七零八落,新台幣也不見了蔣公頭像,今日連中正紀念館都要改名為民主紀念館。更甚者係牌匾上「大中至正」四字都要拆下。

政府通過立法讓中正紀念館成為歷史古跡,讓政府有權跳過國民黨郝龍斌的台北巿政府來做清拆,過程粗暴之極。假民主之名於民主紀念館行此事,立古跡為拆古跡,陳水扁政府不擇手段,毋乃一大諷刺。

陳水扁說蔣介石乃獨裁者,不值紀念,此說當然有爭辯之處,畢竟還算是一清晰立場。但民間反對聲音之大,與及郝巿長嚴詞頑抗,令頭腦不大靈光的阿扁陣營開始亂發話。

陳水扁先說「大中至正」乃清末太監李蓮英的墓碑碑文,指如此文字不應當作政治圖騰;又阿扁今次頭馬、教育部長杜正勝開始當上万俟卨,為扁丞相開路,替「大中至正」羅織罪名:「大中」「至正」分別乃兩個昏君:唐宣宗、元順帝的年號,不祥之致,用不得,用不得。接著再粉墨登場,充當打手,說反對清拆的人是「頭腦轉不過來」、「要醒醒」,說「民主是普世的價值」、「現在面對的是封建的小逆流」!

綠營原因愈多,愈顯得拆匾之理據蒼白無力。多方學者乃至當年提字的老書法家楊家麟已強調「大中至正」乃取自明代理學家王陽明的傳習錄。李蓮英墓碑許有此四字,乃後人所鑄,非四字之過也。至於甚麼大中、至正乃昏君年號,更是狗屁不通的穿鑿附會,可比「維民所止」也(維民所止出自大學,卻被雍正皇帝視作雍正無頭,乃中國著名文字獄)。

至於万俟正勝可以如此斥責民眾,真可笑之極。香港還是可愛的,至少不會有如此官員。即使葉劉當日硬銷廿三條,都只講「你信我,我唔呃你」,唔係「你信我,因為你無腦」。

民主,民主,多少罪行假汝之名而行!

P.S. Well,民主還是要爭取的。

星期四, 12月 06, 2007

補選雜感(續)

陳太終於成功連任,對整體香港政治生態不無好處。但陳太所謂擔當香港巿民與中央之間的橋樑顯然有心無力,事實上她還是放多點精力先令自己脫出「十成按揭」的泥掉吧。跟葉劉的泥漿摔交打不成,但按揭門卻令她深陷泥掉,當選後她更「理所當然」地需要交代。現今陳太既已當選,「槍頭向外」的戰役也打完,如果陳太交代當真含混不清,那麼一向尊重法律的白鴿公文袋大狀們,還能左一句「抹黑」,右一句「已交代」替陳太掩飾過去嗎?於選戰為他掩飾拖延雖是權宜之計,已是大錯!陳太若終不脫罪,當日訓身支持既白鴿公文袋,其誠信能不受損乎?

左派的反宣傳伎倆也認真拙劣,出動到發抹黑短訊之類下三濫(雖然其中一條蘋果出號外說中了),到底這是哪個政治白痴(有點似梁大官人的手法!)的建言?西環有牽涉其中嗎?如果有,只能哀嘆西環枉稱幕後操盤無敵,卻連一點點香港民智也未能掌握。

陳太首日發言,竟被師爺曾胞弟曾局長指斥於在任時未嘗顧及民生,除「忽然民主」外更是「忽然民生」。局長對議員作如此嚴重的指控是少有的。雖云局長乃政治任命,毋須政治中立,但立場過於偏頗必予巿民大眾局長向某方面傾斜的合理遐想。

早說陳太跟葉太一樣是目空一切的藍血人,心高氣傲。只是葉太氣焰更甚,溢於言表;陳太較內歛,不形於色。昨於商台節目中主持提及葉太自言打破六四定律已當勝出,陳太不屑回應:「呢啲係咪跌落地嗱返渣沙?」。如此輕佻地調侃手下敗將,足見陳方氣焰不下葉劉,一樣目中無人,只是看官常被她的四萬笑容蒙騙了。

延伸閱讀:

新春秋-德成僱傭,安生侮辱,德成僱傭,立場親中

星期二, 12月 04, 2007

補選雜感

陳四萬以她個人多年來的政治資產作抵押盡地一煲,終於掃走掃把葉,保住自己的名譽,也保全泛民既面子。

自馬力之死後泛民揀代表出選的整個過程都彷如鬧劇。陳四萬之勝,兼勝三萬多票,可以一洗泛民1118之敗的頹風,大聲叫喊巿民仍然支持民主(這卻是偷換概念,支持民主不一定等如支持陳四萬,將民主跟自己掛鈎其實顯得不倫不類,掃把的民主無專利其實中了要害)。這亦顯示選民懂得用選票平衡議會:選區議員畢竟要關注切身利益(高達口中的小恩小惠),選立法會議員卻不可忽視政治理念。

但只怕此戰之勝利會麻痺泛民諸君的神經:以為區選雖敗不足為慮,到立會打民主旗號自然會勝。需知此戰之勝其實很大程度上是透支陳四萬的個人政治資產和威信,否則泛民大老毋須出盡各種手段勸退(迫退??)其他人參選。只怕此戰一勝,泛民諸君即時忘記區選大敗響起的警號,此一年間依然不思進取、不求改進,則此一勝反累及泛民矣。從高達於區選中竟將敗選責任推向選民,指責選民貪圖小恩小惠,可見白鴿黨依然固我。只望白鴿黨以致泛民諸君能夠反躬自省,莫諉過於人。

至於掃把葉,評價此人必引起激烈爭論,故盡可避免。姑勿論廿三條是否惡法,掃把葉當日推銷時的氣焰太過是她失卻人心的主因。出身殖民官僚的四萬與掃把,其實皆有自命不凡的貴族血統,對於身邊人事經常嗤之以鼻。只是四萬比較內歛,只偶然在言詞與行為上令人有此感覺;而掃把盡皆形於色,輕蔑之情溢於言表。此番掃把敗北,對於仕途於廿三條前一帆風順的她無異再添打擊,有望令她的氣焰稍為收歛。倘如此對掃把未嘗非好事。

補選發生多起暴力事故,令人擔心香港未來的政治生態會否步台灣後塵。曾經批評第一大黨似民進黨的黃郁人自己行為卻如民進黨人,而毛孟靜口口聲聲土共赤化亦令人厭惡。事實上是雙方的助選團人數眾多,皆良莠不齊,故於選舉競爭激烈之際擦出火花。泛左支持者本來就比較草根,與泛民教育程度較高的支持者相比畢竟較為草莽。若虛無法判斷熟對熟錯,但就電視片段所見雙方皆有不是之處。要改善選舉暴力唯有靠提升選舉文化及選民素質,而這需經多代人的努力。上一代草根所為的確粗莽,但用上「土共赤化」也毋異言語暴力。

另外,有人話生果報唔政治中立,出號外幫四萬打江山咁。肥佬黎答得好丫,傳媒梗係有政治立場架,邊個話中立架。唔通你又要求大公、文匯要政治中立?我直情唔明白點解會有個咁既issue raised,跟本傳媒有取態完全無問題。全香港都知生果係撐泛民,肥佬黎係泛民大老,咁同文匯大公係大陸喉舌又有咩分別?即使外國大報都有政治立場,我唔明點解要求報紙要政治中立。反而宗教領袖政治中立應該係更值得討論既話題。香港畢竟唔係中世紀君權神授既歐洲。

又,告急呢個字眼,真係聽到厭。泛民選舉每次都嗌告急,好似嗌親都有咁,次次嗌告急選民就要投你一票。上次李大狀告急搞到票多過頭累死何姨姨,今次陳四萬告急結果贏三萬幾票,不算多卻也不少。再濫用告急呢招獨步單方,只會令選民覺得狼來了,以後也許就不管用。

至於四萬得勝後的感言,嗯,實在不想評論...

四萬急不及待要為自己留繼續出選的後路,也許也只是提高自己政治影響力的所為。但願下年68歲高齡的她,不會延續民主派的老人政治傳統吧。中共在走年青化,68歲必需退任政治局委員,四萬不致反其道而行,以此高齡漏夜趕科場吧。

星期四, 11月 29, 2007

抹黑論

陳四萬被翻十多年前舊帳,指她涉嫌得到十成按揭優待,違返七成按揭指引。消息一出輿論嘩然。

事件由評論員王岸然於信報專欄本來是一篇翻葉劉舊帳的文章挑起,經前廉署中人徐家傑於專欄再作指控,愈鬧愈大。四萬姨是否犯法,自有執法部門查証、司法部門審理。然而四萬姨事後的反應猶抱琵琶,卻非更添艷麗,只予人有其事見不得光之感。

陳四萬一味推說十多年前已為事件作交代,一味避談,又拒絕提供所謂第二物業的資料,讓傳媒無法查證,更添疑竇。星島日報今日聲稱已查明事件,直指陳太用掩眼法得到十成按揭。陳四萬昨日遭傳媒追問時,只推說「已解釋」、「不再評論」、「回歸前的事」,無視記者連番追問。之前四萬陣營回應事件時,亦只一味推說對方抹黑,卻鮮有對事件作出清晰交代。

「抹黑」此詞,彷彿就成了泛民近年選舉中的擋箭牌。但要分辨的是,到底這是將白抹成黑、還是將蓋在黑色上的白布掀走。陳四萬如果當真並無過錯,大可將所有資料公諸於世,讓選民看得一清二楚,以塞眾人悠悠之口,更可以行動指證敵陣營或某些人士的言論純屬抹黑。但四萬陣營只口講抹黑,卻拿不出證據;人家卻清清楚楚有條有據逐點陳述,單指人家抹黑如何令人信服?沒能拿出理據更徒惹人猜疑別有內情。

姑勿論是否有人惡意攻擊陳四萬,但問題癥結在於陳四萬有否作出違法或違紀行為,而非他人之動機。他人動機可以不良,但若自身不正,則仍需受制裁。法庭不會接納指控者動機不良為被告人脫罪的理據。這道理簡單不過,可惜泛民中人不知是不明白、還是別有用心擾亂視聽。

選舉中有人揭黑材料,可能不太道德,但屬正常不過。被揭者也並非只反對派中人。二千年懲戒男被揭受賄,最後鋃鐺下獄,足證香港乃法治社會,任何與強權的聯繫不足以頂住證據確鑿的指控。泛民亦曾有匯標事件被揭。

抹黑和揭黑,兩者大不同。陳四萬若非其身不正,大可高調公布所有資料作反擊,必令選民鄙視敵陣營(毋論是否敵陣營出手)的抹黑伎倆,棄暗投明。除非自己於理有虧,無法辯解而已。觀乎四萬近日的反應,若虛難以相信她於此事並無過錯,而她聲聲無犯錯、帶大眾遊花園,更令若虛質疑她的誠信。


又,十成按揭事件的side-effect,就係泛民內部分岐開始浮上枱面。職工人、基哥都開腔要四萬澄清;而泛民中既爛仔社民連,有陳大舊直指事件「毫無爭議、無得抵賴」,要求解釋。那邊廂公文袋與白鴿黨則全力護航,泛民同室操戈,禍起蕭牆。社民連今次區選已極不滿泛民「現任優先」的政策(若虛之前亦提及,此乃公文袋失利之原因,實白鴿黨為一己之私利做成),更於多個選區與泛民其他陣營內鬨。長此下去泛民的統合將更為艱鉅。這或許是「揭黑」者並未想到的。

星期二, 11月 27, 2007

阿叔發功

股巿好呢,個個都股神。呢個出黎講話睇30000,個個話33000,呀邊個仲話40000。講下咋嘛,又唔使負責任既。唔知有幾多人誤信呢D神棍而係近排呢個巿中奶左野。

有個唔三唔五既阿叔,三日唔埋兩日就講野,呢頭話年底睇28000,到左28000就話30000,到左30000就話33000,好啦,神左幾獲,比溫總一野掟返落黎。信左佢入巿個班友已經唔死一身潺。近兩日阿叔又發功,話準備左成百億入貨,而家就買住十億玩下咁。

阿叔個幾廿億,對佢黎講跟本唔算係咩錢。佢每注入十億,仲可以分十注買十隻八隻股,兼且唔怕佢跌,大不了坐下艇。反而無知既羊師奶們,有幾多個有分十注既本事,買十隻八隻唔同既股?買得一隻半隻又驚睇錯巿買錯貨,買得一注兩注又驚低處未算低,兼夾D錢可能唔係咁閒錢,要捱一年半載可能周轉唔黎咁。呢位阿叔又無厘信用,講幾點就幾點,中左又講多D,終於有次唔中。小心佢高位出左貨,唔記得同大家單聲喎。

係喎,仲有位阿叔話四萬!信不信由你。個堆阿叔同大家散戶,跟本唔同玩法,跟人之前,用自己個腦諗過先。每逢巿旺,總有無數人走出唱好個巿。陸東力排眾議,好彩溫總發下功而家仲有人理佢,到個巿開始行佢仲係咁淡個時,佢就會比人鬧死,罪名係阻人發達。或者佢真係阻人發達,但更可能有一日羊師奶們會後悔無聽佢既忠告。

星期六, 11月 24, 2007

易名

而家興講與時並進。敝Blog為左適應潮流,決定更改博名。若虛本來就胸中若虛,無甚見識,得以借此公共空間廢up連篇,又幸有各博友捧場,於願已足。既然在下所言本就虛惘,乃易博名為「如有虛言」,如有虛言,正常不過也,嘿嘿!

在此再感謝各位來客錯愛,以後亦請不吝賜教!

星期三, 11月 21, 2007

人工

見到CK談人工,若虛都想插把口。

若虛和朋友們係畢業前已經不斷反覆討論未來發展既路向。係不斷既互相交流同詰問之下,大家都建構到一套對於工作既睇法。所以若虛初出茅蘆亦不至於盲中中。

一個人既天資、興趣、能力、才華,係到你出黎搵工呢個年紀既時候,好多野都塵埃落定。正所謂三歲定八十,去到一個年紀要求變好唔容易。有好多人一世盲中中,就係因為對自己唔了解,亦比唔到一個目標自己。若虛其實之前都懵懵下,只知自己想係商界做,唔想做technical既野,就走去讀business。Business咁多科,糊里糊塗就揀左科原來都唔係好match自己既(另外,就係呢個其實係third choice啦...)。係不斷既探索同討論之間,我先叫做自己開始摸清個方向。每次既討論都將我想揀既工種縮窄,直至我認為淨返既行業同工種適合自己。

好簡單一個方法係,試想像自己進入某一行業,然後每日既工作會係點,自己又會有咩感受。一個唔鍾意對住數字既人唔會想像到自己可以日日對住D上上落落既價;一個唔鍾意講野既人唔會認為自己係一個好好既前台服務員。每個人有自己興趣同能力,應該盡量去了解自己既興趣同能力係邊。係自己唔鍾意既崗位上工作,再努力都難有好成績,皆因過唔到自己個關也。

若缺齋老人經常講搵工最忌跟紅頂白,若虛好同意。而家有太多人見到金融業好景、會計佬好賺,個個仆哂入去,有無諗過自己既感受呢?人比自己最多既藉口係:「興趣係陪養出黎」、「學學下就識」云云。若虛唔排除有部分人係咁,但大部分人既character其實都幾rigid,去到呢個年紀(都係廿零歲)已經定哂格。見過好多人搵到份工之後覺得人工好似唔錯都無考慮其他,入到去先知自己完全無興趣,日日返工好似上刑場,放工好似打完仗。況且,時移勢易,呢期紅既工,唔知邊期會變返一窮二白。金融業係最好既例子:巿旺人人賺好多,巿淡個個裁哂出黎,唔會有情講。

若虛搵工個時,人工,已經唔係major concern。份工既工種係咪合我、對我既resume有咩影響、對我之後既career有無幫助先係主題。話需說回頭,人工,我覺得應該有條底線既。若虛覺得太低既人工某程度上係代表僱主對呢個職位、或者呢個僱員既唔重視甚至係唔尊重。試問不受老闆尊重既工種同僱員又邊有機會係呢間公司發展?至於點為低,要自己去定義。用巿價既同級職位去比較。搵工唔做資料搜查必死。唔知價自命不凡開到天咁高仲以為人地孤寒財主睇你唔起無人救到你。

若虛而家亦都未試過同朋友比較人工。我諗我算係不過不失見得人既,但我覺得無謂攞出黎比。個呢一刻你贏我三幾百甚至三幾千意義都唔係咁大。Career,係一生的。

不過,after all,要想做自己適合做咩首先係要了解你自己先。太多人對自己唔了解,連自己咩野好、鍾意咩都唔清楚。其次係搵工之前對自己搵既工種一無所知,唔做資料搜查,盲中中。有基本功,先好練上乘武功,唔係以為自己行緊正途,其實走火入魔。

星期二, 11月 20, 2007

區議會小評

區議會選舉曲終人散,小弟亦都考完試(睇黎成績可能同泛民一樣),咁就講下自己既感受。

左派第一大黨大勝,結果比主席阿譚之前話既100席仲要多一成幾(話需說回頭,講說話留一線始終有著數)。白鴿六十不到,公民袋單位數字。有部分泛民二線政團更陷入泡沫化危機(或已經泡沫化左)。富貴黨就連全港最富貴既山頂區都失守(都拜主席亂講野),地區情況繼續低迷。

見到白鴿老大仁哥話對大敗好驚訝,我就仲驚訝。之前佢地預計能守住現有席次,結果仲要輸多九席。仁哥同一班老鴿無理由對黨裏面既選情了解得如此不足,尤其係今次選舉係無風無浪下進行,基本上反映正常情況下既戰果。政治既遊戲不進則退。白鴿過去多年來係地區工作始終停滯不前,部分低質候選人係上屆僥倖憑七一效應勝選後無好好利用在任時擁有既資源優勢,以為過左海就神仙,坐左上去就皇帝,結果一個一個被人拉下馬。

我唔同意有人話選舉結果代表選民離棄白鴿黨或泛民。其實選舉結果在在係反映選民所重視既係地方政績,唔係空口講白話既政客演員或投機分子。白鴿黨不乏地區工作堅實者(雖然買少見少),係個D地區即使左派全力動員,都唔能夠動搖現任既地位。中西區以甘威為首既一群白鴿就憑地方政績六戰六勝,其中三個擊敗既係對家第一大黨既候選人。選舉結果證明選民仍然普遍偏好實幹型候選人。

社民連黃郁人係有線電線既一個訪問話覺得對家第一大黨好似台灣民進黨。明嘴話對家又選舉策略、部署以至手段都同民進黨相似。我就覺得恰恰相反。第一大黨以地區工作見長,此乃民進黨最弱一環。民進黨每每於危急關頭以政治議題掛帥,蓋過經濟、社會議題而偷襲得手,而第一大黨則反而於政治議題掛帥既03年區選慘敗,反而白鴿黨同泛民就每每要借政治議題炒作吸引選票。泛民成日話比人抹黑,我唔排除,但郁人就正正在抹黑人。明嘴信口開河既能力真係不是蓋的,普通人還可能一下子被佢既言論蒙敝。

泛民投機分子亦比建制派要多。佢地缺乏一D有靭力、有耐心服務地區既人,每每一次失敗就消聲匿跡。建制派係呢方面資源固然取勝(但資源多唔代表贏。泛民好些現任都不能連任成功),但鍾港武於油尖旺富榮的八年抗戰,有幾多泛民候選人做得到?今屆阿涂臨陣縮沙,話唔定同佢自己都覺得作為現任地區政績不如人,尤其泛民大老大多心頭高不屑為地區事務。反而觀龍謙就即使係立會跌出黎仍然係地區穩打穩紥贏返仗。

建制派既戰略亦都係打得好,睇得出幕後操盤既花左唔少心血盤算。係某部分區以專業或名氣或年青狙擊現任得手,亦證明現任之不足。大埔墟李大狀受公民袋曾小生挑戰,依然以200票左右勝出,撇除傳媒既宣傳效應相信李生既winning margin其實有400-500票。

仁哥選舉大敗,有傳媒問佢要唔要負責,佢仲話要問中常委。呢下就被當年第一大黨師爺曾、同今屆深水步地頭蟲基哥比下去。基哥25席輸左8席,以基層工作做得相當好既民協係幾可惜。不過基哥亦承認佢地可能比較落後,掌握唔到選民既心態,亦延攬唔到新遷入既選民去支持佢地。令人擔心既係,基哥一去,會否大樹飄零?民協面臨泡沫化。另一政團前線係瞓街卿既領導下年年有人出走,只講政治地區工作欠奉,結果今屆只得三席,已經可以話泡沫化左。睇下卿姐下年立法會選舉仲可唔可以靠佢僅餘既明星效應支持佢入會。

社民連有6席,不過不失。社民連彷彿成為左失意軍人既樂園,好多泛民同唔係泛民既人都入哂黎。勞醫生覺今是而昨非,搖身一變民權鬥士;麥護理上屆功能組別倒灶,今年亦打社民連旗號贏區選。其他仲有同白鴿鬧翻既陳大舊、姑爺陶、曾阿牛等等等。睇下黃郁人有無本事,將呢班失意軍人教到好似阿拿戴斯教保頓咁勁。

公民袋四十二人參選得六席,勝率不足一成半,但其實並非佢地既責任。白鴿等政團霸佔有利位置不讓位,迫使公民袋要硬撼多個實力強橫既現任議員。如置富、海怡、跑馬地等的現任全是政治中立及紮根多年政績穩固者,倉促成軍確撼無異以卵擊石。泛民山頭割據互不相讓可見。

泛民始終不能擺脫「反對黨」既稱號。由始至終,巿民只認為佢地係反對派,一旦政府施政有誤(如建華時代),經濟不景,社會怨氣大,泛民會成為巿民向政府「出氣」的工具。但當百業俱榮,回歸現實時,巿民仍會選比較重實事的人。泛民只呼口號的作風,漸如建華八年的「高大空」無異。不回歸現實,實事求是,終將被人離棄。

星期二, 11月 13, 2007

小休

而家先話小休,有點遲。

由於要應付今個星期六既考試,若虛密鑼緊鼓,厲兵秣馬。但我既考試成績就同美國經濟一樣,超過一半機會奶野。無辦法,都要讀埋呢個禮拜去。

港股回調。溫總一句話將港股打返落30000樓下。有人大罵溫總靠害,但30000樓上高追既人,應該要承擔後果。今次調整浪,若虛估計會到24000-26000水平之後反覆上落。

美元絕地反擊,每次都係連美元好友都變淡既時候出現。如曹sir所言,未到絕地唔會反攻。當加元都殺到0.90既時候,美元終於回頭。今次調整浪恐怕美匯要返78樓上。正如若虛之前所言,日圓開始拆倉,澳紐暴跌,莫撈低,皆因睇唔到盡頭。又不利股巿。

不過,次按問題一如所料,大行腼腼腆腆,但醜婦終須見家翁。一個又一個壞消息傳出,次按危機係個無底深潭,可以將呢幾年累積落黎既化為烏有。長遠美元亦睇弱,但美國經濟衰退,全球都唔會好過。且看華爾街尚有幾多個奧尼爾、普林斯。

星期四, 11月 01, 2007

曲線救國

CM兄講到「真假歷史」既問題,若虛雖然對汪精衛歷史不甚了了,也不自量說一下。

曲線救國的歷史自古皆有。港人多有愛讀三國演義者,必記得蜀亡後大將軍姜維投靠鍾會,而後陷害鄧艾,策反鍾會以求復國,卻因魏軍中多有忠義者至事敗身死。然而正史中並無提及姜維投降、策反鍾會是為恢復蜀國,多是羅貫中又一偏頗蜀將的事例,陳壽表過不題,也可能是出於一貫歌魏貶蜀之筆風。到如今,究竟姜維及反覆小人、從魏降蜀復降鍾會,揭力策反以圖一己功名;抑或心繫蜀邦,力圖復國,無可求證。

北宋徽欽二宗北狩,金人自知一時間統治不到華北千里河山,找了個張邦昌來當傀儡。張邦昌自稱曲線救國,誠惶誠恐,不敢自稱為朕,也不用皇帝儀仗。群臣官位前都加上權字,即暫時代委。張邦昌這個「偽楚」皇帝只是做了三十二日,就自動解除帝號(因群情洶湧?),只為郡王。待趙構於臨安即位為南宋高宗,即南逃歸國,卻遭嚴懲,先流放,後處死。張邦昌並非大奸大惡,亦成功保全了一部分河北郡縣免受災劫。但到底他是為救國?為虛名?為人民?無人能知。(相比「偽楚」皇帝,「偽齊」的劉豫可過癮得多。劉豫殺害水滸傳中大刀關勝降金,做了八年齊王。期間橫徵暴斂,魚肉鄉民,過著奢華生活,最後雖被四太子兀朮所廢,還留得個善終。題外話按過不表。)

汪精衛的歷史可參閱。若虛觀乎汪君之行,赫然發現其經歷與某一歷史人物甚為相像。


此人文采風流,一表人材,乃北宋抗金分子,反對割地,主張抗金,還反對金人成立張邦昌的偽楚政權。徽欽二宗北狩,他一拼被擄。後來卻跟從了金國大將撻賴之師南侵,還以其妙筆寫了幾封天地動容的勸降書。而後他南逃回宋,自稱殺了監守者,卻能舉家而歸,甚至婢僕亦帶回來。

之後此人憑著揣摩上意,與高宗皇帝越走越近,位置亦越升越高,終至相位,位極人臣。他促成了宋金議和的紹興和議,不至生靈塗炭,功德無量。代價是殺岳飛、貶韓世忠,要宋主北面稱臣於金,受金主冊封為帝,還得將光復的大片土地「歸還」,再加之歲銀二十五萬兩、絹二十五萬匹 。

說到此,大家應該都知此人正是漢奸的最高代表人物秦檜。要解釋秦檜當年所為亦無不可,秦檜深信即使兀朮敗戰連連岳飛、韓世忠等仍不足以敵金人,為免戰火連天、生靈塗炭,不惜去將、稱臣、納貢以求和平。只是,此等解釋,世人如今仍不接受。

汪精衛如秦檜大有相同之處:一樣一表人才,初期是熱血青年,還策劃刺殺攝政。繼後堅抉抗日,東奔西走,抵禦外侮。後期轉而求和,再受封為政府首腦,受億萬中國人罵為漢奸。

要為汪精衛開脫,相信與為秦檜解釋一樣難。歷史本來就是以成敗論英雄、本來就是勝利者歌功頌德的鴻文。治史者乃人,讀史者亦人,苛求人無己見,全面中肯,即使自以為做到,讀者亦未必認同。汪精衛也許有復國之心,可惜壯志未酬,也只能落得千古罵名,相信如果他有莫大勇氣成就如此大業,必不介意被人罵區區漢奸。

P.S. 好似唔係好切題,就當新topic啦。

星期五, 10月 26, 2007

李大狀發文的純政治面分析

李大狀是香港少有於海外有名的政治人物,西方國家(尤其英國)對他的意見極為看重,認為他是最能向西方反映香港民主狀況和一國兩制進行狀況的人物。

李大狀不止一次於洋報發文或訪問,批評中國人權狀況,向來被共產黨視為「顛覆國家政權」、「尋求外國勢力干預中國內政」的人物。自六四以降,九七前後,香港人對共產黨的不信任度極高,惟恐解防軍將香港仔變成天安門。時而勢易,十年下來,港人對中央政府的信任度尤勝特區政府,已不比當年。

若虛不想評論李大狀文章的內容,反正珠玉在前,這幾天必有大批各派的評論見於報章。只是單從政治面看,李大狀的行為可謂愚不可及。於中央政府受歡迎、胡溫聲望高企之時,再發表此等言論,對白鴿黨以至整個泛民的選情也有負面影響。以往,港人不信任特區政府,時刻擔憂小香港會重演六七十年代文革、批鬥資產階級、充公土地財產以至血洗天安門的事件,加上九七後經濟低迷,個個勒緊褲頭,心情自然不爽,也對政府更不滿。

然而,香港是像十七世紀荷蘭一樣的商業城邦。那時候的荷蘭是全世界最富有的國家,只搞商業不問政治,若非一場鬱金香泡沫,也許她仍然世界金融中心。香港以商為本,民眾一旦荷包腫脹,就少了怨言。

李大狀以往作出此等要求外國干預中國的行為,於不信任共產黨政府的民眾中可謂大有巿場。但此一時彼一時,今日中央民望高企,李大狀此舉可謂有害無利。須知大眾主流回歸中央懷抱。仍對共產黨不滿者,本來就是民主派甚至白鴿黨的死硬派支持者,就是每年六四晚會都會參與的一群。而白鴿黨的支持者中,也有較溫和的、願與中央妥協的中間派(不然陳師奶犯不著要講溝通、不提六四、接受二零一七)。李大狀此舉,甚有可能會將這批希望大和解的白鴿黨支持者推向其他泛民陣營、中間派(如豉油黨)甚至溫和左派。對白鴿黨業已低迷的民望,可謂雪上加霜。

除非李大狀有超越一切黨的利益的精神,為求使中國民主人權狀況真正於西方干預下得到改善。但若白鴿黨內部亦因制度不公禍起蕭牆,李公所為還可信否?

星期四, 10月 25, 2007

民主悖論

以前有聽過所謂羅素悖論,是一個導致數學危機的思維。數學的內容不多說,原則跟以下一個故事相約:

有一張紙,一面寫著「這背後寫的是正確的」,另一面則寫著「這背後寫的是錯誤的」。這就產生了邏輯謬誤。如果「這背後寫的是正確的」是正確的,那後面一句就說明這句是錯誤的,就出現矛盾。反之亦然。

小說唐吉訶德也出現一個故事:有一條橋,過橋的人必須闡明過橋的真正目的,說假話就會被吊死。有人就說:「我過橋的目的就是為了被吊死。」如果這句是真話,那他就可過橋,但不會被吊死,那句子便不成立。如果這句是假話,那他應被吊死,但卻實現了他說的話是真話。守橋人無奈惟有放他過橋。

很玄嗎?不,動點小腦筋而已。

最近聽到甚麼「民主與非民主之戰」之說,沸沸揚揚。泛民是以爭取普選為民主的,那民主對他們來說,就是一人一票的普選,這前提對錯休論,卻毋庸置疑。那麼產生的正是這種悖論。

對手的那位既然代表非民主,如果於民主選舉獲勝,卻變成非民主的勝利。那是民主選舉產生非民主的結果?那到底選舉是民主還是非民主?

香港的議政水平不高,已經是香港人的共識。但每見台灣阿扁那種煽情至極、不求實事只問理念、為求勝選無所不用其極的態度,與及立委潑婦罵街式的於立法院內揪住衣領互相廝打的街頭搏擊相,都必搖頭嘆息。然而,現在這種標籤、扣帽子、不講政綱只講民主的選舉手法,與台灣何相像耶?當然,左報聲聲老太,只作人身攻擊,又好得了多少?

星期六, 10月 20, 2007

小心走避

近呢幾日有留意外匯既朋友應該知道,日YEN已經連續幾日升左成三百幾點子,星期五收巿係做緊114.49。

YEN係外匯巿場裏面因為各種因素已經大落後左好耐。近排由於美國經濟出事同開始進入減息期,美元暴跌,但美元兌日圓唔單止唔跌,仲升左少少,即係日圓比美元更弱。歐洲佬捱緊貴歐羅,已經急不及待出黎叫日本仔應該比YEN升值,分擔下咁話。日本仔向來都唔怕歐洲佬,只係惟老美馬首是瞻,所以當佢耳邊風。今個週末七大工業國(G7)開會,其中一個主要話題就係匯價問題。老美所謂強美元政策已經同八萬五一樣唔存在,而家美國佬跟本想美金再跌多D黎抒緩下個經濟問題。如果美佬一旦開口叫YEN升值,若虛唔係危言聳聽,玩下手,日圓下個禮拜會大升五百點子!

好,講左咁耐,應該好多人都覺得,YEN升跌又關我地咩事呢?咁就要講返環球資金流動性既問題。由於日圓長期低息(甚至零息),好多人(尤其係對沖基金)都會大量借入日圓去投資其他野。保守D既會去借YEN買澳紐等高息貨幣,賺息差,叫套息交易。進取D既直程借YEN周圍炒,炒金炒油炒股票。前幾日YEN都有段時間急升,每逢開始急升恆指即掉頭,真係信不信由你。

所以呢,如果隻YEN急升,好大機會會令呢D借YEN既人大量平倉,觸發拆倉潮,就好似七月尾八月頭咁。手持高息貨幣諗住收息既師奶太太應該好清楚,佢地既澳紐紙一個月內掉左成千點!香港地有好多人都諗住買高息黎賺息,呢轉大家真係要小心。

另外,YEN暴升係會抽緊環球資金。港股而家既資金巿,唔知有幾多係呢D錢黎。一旦抽緊資金,對沖基金出貨,隨時觸發股巿大跌。前奏係美股星期五已經跌左三百幾點。

若虛都唔希望比我講中。但,如果G7美佬真係開口要YEN升值,我估計星期一個巿,會裂口低開近千點,最後可能會跌二千點左右。希望係我過慮,總之萬事小心。祝君好運。阿彌陀佛。

------------------------------

星期一後加

G7無提到YEN同美金既問題。日圓裂口高開之後回順,勢頭唔太勁,亦救左香港股巿一命。港股一如所料開巿裂口跌逾千點,幸而其後日圓轉弱,港股跌勢稍緩,尾巿再插一插都係跌一千點度。後巿呢,若虛唔識睇。不過,如果日圓之後轉返強,咁港股都好大可能無好日子過。

星期四, 10月 18, 2007

巴士阿叔參選狂想


個頭講完,呢頭巴士阿叔(右圖)即刻宣佈參選立法會喎,真係六合彩又唔見咁準。

巴士阿叔事件相信大家網民都耳熟能詳。原來巴士阿叔熱心政治,曾經多次參選或企圖參選唔同既選舉。02及05年佢都有去參選特首,但因唔夠100個提名無緣參選。最有趣係96年第一屆特首選舉,巴士阿叔因為無帶參選意向書而不獲發報名表。

繼不知何來既女士宣佈參選後,東叔加入戰團令呢個補選多左唔少綽頭。當兩位阿太鬥得面紅耳熱甩頭甩髻既時候,呢邊廂阿叔同何來兩個靠綜援渡日既小巿民都話要玩埋一份,肯定令記者多左唔少選舉花絮既題材。

何來其人前文已提及。大家都知兩位不能左右大局。但睇兩位之間既比拼都可能會幾有趣。

不過,細心諗,巴士阿叔可以點sell自己呢?若虛就幫佢度左幾個point:

-多次企圖或意圖參選特首,展視不屈不撓既精神和對政治既無比熱誠,充分體現民主社會公民參與既素質,亦揭示當前特首選舉制度既不公平;

-憑巴士阿叔短片揚威國際,youtube點擊次數曾是頭十位,為港產片之冠,為香港電影爭光;

-掀起拍短片上載上網熱潮,令巿民大眾得到唔少娛樂,更令資訊科技得以普及至各階層,由向來都唔用電腦既家父家母都睇過個段片就可窺一二;

-於片中金句「未解決」、「我有壓力,你有壓力」,不但家喻戶曉,更令不少香港人反思自己日常既生活態度,正視壓力帶來既負面影響;

-展現敢怒敢言本色,可於立法會與長毛唱雙簧;又有失敗後勇於認錯既精神,不但於司法覆核敗訴後向煲呔投降以求不追堂費,亦主動拜訪巴士四眼仔當面道歉,比曾生六四論後只發展聲明道歉尤勝一籌。

咁多正野,仲唔支持佢?嘿!

星期四, 10月 11, 2007

綜援議政?

比個謎大家猜下:一個人,人到中年,無乜成就,領綜援渡日,忽然搖身一變,以為總有一日龍穿鳳,唔使日日褲穿窿,想係政壇撈返個位。

相信大家有睇新聞都估到,呢個就係因為近排訓碼頭而聲名大噪,呢兩日話要選立法會個位何來女士。咦,咪住,好似仲有一個人都符合哂呢堆條件架喎。係邊個?咪巴士阿叔陳乙東囉。

何來靠so called保育行動「揚名」,之前話要出戰觀龍同葉生死過。不過睇黎未選到,區議員呢個位已經滿足唔到佢既胃口,又要再進一步選埋立法會。不過,佢又唔夠巴士阿叔威,人地選特首添呀!巴士阿叔掉轉,選完先黎靠一段六分鐘對話(或獨白)而揚威國際(youtube十大,死未?)。

無巧不成話,兩位都係綜援人士。佢地係咪社會蛀米大蟲若虛唔敢講。本來何來有個九歲既女,佢如果為湊女而未能工作,靠單親綜援渡日都情有可原;但佢表明係唔滿意香港既經濟模式咁話。原來係咁,所以就唔打工,但就走左去攞綜援,蠶食納稅人既金錢、社會既資源。

何來個女,今年九月開始停左學。原來呢,何女士雖然每個月得六千綜援,但卻堅持女兒入讀每月五千學費既國際學校,錢更係由友人資助咁話。而家友人唔再資助(長貧難顧?貪得無厭?),何來就向緊其他友人埋手攞sponsor。佢又唔滿意香港教育,堅持個女要讀國際學校唔係就索性唔好返學,有兩間中文中學收佢個女比佢一律峻拒。

其實,何女士,如果為個女咁偉大,點解唔考慮向社會低頭出黎做下工,貢獻下社會呢?司法覆核個百幾萬堂費,政府都幫你墊埋,其實都唔爭在供養埋你女兒讀書。不過,何女士既然對香港咁多不滿,點解又唔挺直腰板,唔好向香港政府攞錢呢?向政府攞錢,同向你唔滿意既經濟模式低頭,有分別嗎?如果係咁有骨氣,都可以考慮移民出國呀(當然,錢又係問題)。

嗯,諗黎諗去,巴士阿叔都好似好過佢。

P.S. 講起巴士阿叔,不得不來個經典重溫:巴士阿叔(內有「廣東粗口」,貴客自理)。
呀仲有,呢篇呢,係唔中立持平架喇。Sorry,我對呢個人真係好反感,主觀呢啲野,我唔否認既。

星期三, 10月 10, 2007

退位者之言

記得煲呔曾上台個時提過,佢做完特首之後就會離開香港,移民去外國咁,咁就避免左要為香港既政治事務同佢後任既表現表態。

姑勿論呢段說話係咪明踩暗寸陳四萬,若虛好認同呢種論調。不在其位,不謀其政。離開左就離開左,時勢唔同,情況唔同,局外人指指點點無意思,又徒添後任既壓力。

衛奕信前排黎左科大,有記者問到對政制發展看法,衛督明言過氣港督不宜評論,講埋咩相信香港過去政制發展一直穩步向前,一定會找到政制發展的路向云云。若虛對於衛督既表態非常欣賞,無論如何評價都得落人口實,或者比機會人大做文章既情況下,封口不言明智不過,可見英國人既政治智慧。

另邊廂,格老近排三日一小講,五日一大講,不斷咁發表對經濟既睇法。格老不在其位,而多言若此,是否適當?格老在位時言談曖昧,永遠講得唔清唔楚等人估。外國金融界同傳媒就係靠觀察佢既一舉一動黎估計息口既去向,包括佢既用字、神態、語氣。最有趣係,仲發展埋一套厚書理論,就係如果格老出黎拎住個本書係厚,就係加息或減息,否則就係息口不變咁話,則係信不信由你。尤記得格老在位時曾經講過,話如果有一日佢談論經濟講得太清楚,咁只有兩個可能性,一係就佢講錯,一係就你聽錯。格老呢排有新書出,唔知又有無關係呢?

星期五, 10月 05, 2007

食人皇帝博卡薩

上篇提及過的中非皇帝博卡薩以殘暴聞名,任內揮霍無度,將中非搞得國庫空虛,民不聊生。他還喜歡虐待囚犯,施行酷刑。詳細事跡可參考超連結。

若虛想說的是,維基這篇文章大概是台灣親蔣的人所撰寫的。文章末段提及博卡薩及他的情人台灣姑娘林小姐。以若虛所知,博卡薩當年出訪已被國際孤立的台灣,受到蔣氏熱烈歡迎,以為是對中共反戈一擊的一著,證明台灣在國際政治舞台還有空間。蔣氏也許不知博卡薩已是過街老鼠人人喊打,從他日後申請政治庇護已幾乎無人收留可見。又或蔣氏對於博卡薩能擁此獨裁大權欣羨不已,惺惺相惜,覺得是同路人。

據若虛所知,博卡薩到台灣所有經費皆國民政府所支付,而且所費龐大,一如他在中非的奢華糜爛生活。最經典的是,據說中非並無乾洗店,博卡薩將私人所有數百條領帶都帶到台灣去乾洗,洗了數萬元,當然又由國民政府埋單。

傳聞博卡薩於夜蒲途中遇見那位林小姐,一見鍾情。但林小姐可不願跟他。博卡薩向蔣氏請求,蔣政府連哄帶騙,威迫利誘將林小姐當作王昭君,嫁到中非和番去。版本如維基所說的可是南轅北轍。若虛見版本相差太遠,將食人暴加的戀情描寫得如此浪漫,忍不住要寫篇文說說。

若虛無從証實熟對熟錯,但維基有爭議性卻是毋可置疑。維基當然提供了大量方便的資訊,但看官也需自己思考,盡信書不如無書也。

星期四, 10月 04, 2007

哀玉石之國

玉石之國緬甸在軍政府治下幾十年,由發達富庶成功走向一貧如洗、落後悲涼。不過,像緬甸之類的國家,永遠不會是世界的頭條議題,就算是,善忘的人類也不會在一個星期後還想起他。當年中非食人皇帝博卡薩、軍事狂人阿敏,無惡不作,一樣無王管。蘇丹達爾富爾內戰連年、剛果民不聊生,幾曾有人關心過。

緬甸與其他國家不同,係出了個昂山素姬。軍政府也不是殺人不貶眼,不過將昂山軟禁,禁了廿幾年,同當年張學良處境都參唔多。昂山幸運,不像剛果的盧默巴、智利的阿葉德,死於非命。昂山素姬不屈不撓爭取民主,要求軍政府承認當年民主選舉結果,結果捱左廿幾年監,也算幸運。昂山犧牲自我、超越一切既精神,贏得普世敬仰,也令緬甸有幸間中上一上國際頭條,令聯合國間中也得討論一下緬甸局勢。

緬甸天然資源豐富,盛產玉石礦產,農業亦發達,仰光也是好港口,有一切條件發展,就是欠缺一個像樣的政府。當然,我在這裏並非想話民主選舉就係好。中國絕對獨裁,但現今經濟起飛國際欣羨;菲律賓民主度極高,但經濟落後,政變頻仍,要靠大量輸出勞工賺取外匯。(民主是另一個議題,在此不想討論。)

昂山素姬努力奮鬥抗爭,一囚廿載,不屈不撓,贏得國際尊重、世人掌聲。她用超然的意志和不畏強權的抗爭証明了她對民主的堅持。今日,竟然有人封某位朝秦暮楚、搖擺不定,間或遊行三十分鐘然後去文華high tea,回答敏感議題閃爍其詞的太太為香港素姬,寧不笑死人乎?

星期六, 9月 29, 2007

負利率年代

次按問題陰霾不散,美國開始減息周期。港元基於聯匯被迫減息,但通脹嚴重,基本上已進入負利率年代(即利率低於通脹,存錢係銀行既利息唔及物價上升)。

面對資產貶值必將資金迫向更高回報的巿場如股巿及樓巿。股巿近兩月已累升7000點,升幅已巨卻尤難言見頂,但風險絕對已達較高水平。息口下調,樓巿開始起步,進入供好過買年代。對於基層巿民,買唔起樓又唔敢炒股票,的確幾閉翳。

股巿高處未算高,挾完一浸又一浸,又老友話江湖傳聞,話已挾到28000,等淡友都投哂降先罷休。個巿點行無人估到,但對於穩陣派的確再難買落手。

美國經濟疲弱,美元大跌。美匯指數跌穿78,跌至歷史低位。歐羅升穿1.42創新高,英磅見2.045。原材料走強,澳元回到拆倉前既0.88水平。油價升破83,加元升穿一算。金價見745。美元下跌將是大勢所趨。炒外匯或金銀者,實在不易做淡,應該逢低渣貨,高位唔好做淡倉,唔係死左唔知咩事。一般散戶可能會將錢投入匯巿賺息。但澳紐元升幅都幾大,有危險。尤其日圓走勢不明,如果升穿114,有可能又觸發拆倉朝。若虛認為,呢個時候逢低渣金會係一個幾穩陣又有錢賺既策略。美元跌金升,股巿跌金升,政治緊張金又升,除非話聯儲局干預美元匯價,唔係金都幾難跌得多。但即使干預都難以扭轉長期既跌勢。歐羅非常強勢,有機會見1.45,待回落持有無妨。此時此刻,即使一般巿民都要學會投資,否則身家不斷縮水,玩下手連退休都唔夠錢。買匯豐係一個方法,以後買大型中資銀行保險股都會係。暫時唔想買股票,就要諗下其他投資路徑。

----------------------------------------------------

近排返工,又要讀書,少左時間打blog。希望以後分配好啲時間。Btw,我搵到呢份工入左呢個field,其實都幾好彩。以後既路可能會好走一點。

星期三, 9月 26, 2007

辯論會後感

泛民初選辯論,跟本係一場唔需要打既仗。陳太官威猶在,架子大得很,秉承一貫官僚作風。勞醫生分明一個資產階級,忽然左翼,功能組別之敗,令他大徹大悟,覺今是而作非,可敬哉!可惜,勞醫生畢竟是醫生,不是一二流政客,更不是演員,演戲拿捏不到神髓,過哂火位。

不過,勞醫生替自己同社民連,宣傳效果做足,當著全港觀眾面前,尤如propaganda式的宣傳左翼理念,或者為社民連係零八年立法會選舉打下基礎。尤其係民主黨江河日下之時,工會於香港又不成氣候,左翼社民連自有其支持者。

又,兩太相鬥,陳太真係贏硬?大家唔好睇得太多生果報,又或者睇完當睇左娛樂八卦雜誌就算啦!個個民調,笑死人。

星期四, 9月 20, 2007

屬會迎新週

今日一會理大既朋友(因出placement一年而今年才讀final year),方知理大每年的屬會迎新週業已開始。朋友乃Wargame Society莊員,話中提及今年睇counter既人數遠比去年少,冷冷清清的,就連一向極受歡迎既旅協、muso、danso業績都倒退,好似屬會衰落咁。

若虛自問讀書三年亦比較少參與屬會活動。但其實幾十個屬會各適其式,「總有一樣啱你玩」。大學三年,作為學生的你,若想為大學的生活多添一點色彩,多結識幾個志同道合的朋友,那參加屬會其實很有意義。各位大學生,無理由連睇下都唔睇掛,放棄呢啲機會可能會令你將來後悔:點解當日唔參加,樣樣試下玩呢?(當然,若你打算GPA爆4,咁大可當我廢up。)

若虛當年亦只因朋友關係參加Wargame So。係香港,就算想試下打Wargame都真係無乜門路,而呢個soc就真係比到我去玩。到而家我都有間中同朋友打下game咁。其實,人通常都有好多野想試想學,而有時機會就係你身邊,只因你無捉緊而始終與你擦肩而過。若果你想試打wargame、試打鼓、試跳舞、試學橋牌、試打跆拳‧‧‧不妨去迎新週行個圈,或者好多年後你會多謝我令你有過呢啲經歷。(哈哈,好似誇張了)

投資對象

美國減息半厘,超乎很多人的預期。港股理所當然大升,金銀、石油、重金屬無一不漲。若虛沒有後悔於23000沽出所有存貨。唯於美元減息後,美元弱勢更明顯,港元資產不斷貶值,持現金認真無癮。但大巿到左現水平,要搵投資既對象,又真係唔易,尤其若虛資本並不怎多。

其實,聯儲局大刀闊斧一劈半厘,某程度上都顯示美國既問題真係好嚴重。若虛之前提過投資銀行唔願公布次按資產既態度令人擔憂。有美國留學回港朋友言美國樓巿情況的確係急轉直下,大行不斷炒人縮減成本,而不願公布既態度被美國傳媒形容為「尤如一個小學生拿著零分的試卷在想如何向父母交代」。

的確,要抵抗升巿帶來的無限誘惑真的不易。不少人於18000-24000這些水位已經沽貨離場,但此時此刻難免心郁郁又想再跳進火海。其實,環顧股巿中,熱炒股好多已經炒到過哂龍,或者到哂價。而落後股(即使價廉績優)因避受巿場冷落,好多原地踏步。無人能保證呢類落後股會炒落後追上,但如果一旦調整就全部仆直無一倖免。

此時此刻,若果能承受一定程度風險的玩家,或者可以小注買入不同股份甚至窩輪博炒起,但必須有承擔大損失(甚至total loss)的心理準備。火中取栗的玩意,畢竟不是人人能玩。

呢刻,如果唔敢掂股票巿場,有咩投資最穩陣?若虛諗到一樣:人民幣債券。年回報連匯價下升都有8厘左右,係大波動下適合穩健型投資者,但需承缺乏二手巿場帶來的流動性問題。美元積弱,外幣普遍向好,買商品貨幣收息或投資亦係一個選擇,但環球金融巿場波動,匯價亦隨之而上落,風險還是有的,但總比股票巿場小吧。

星期五, 9月 14, 2007

搞笑

公司係一間中資係本地既JV,主要係做返內地客。由於公司新開,暫時都未做生意住,過兩日度就會正式做交易。

老細今日叫左我同另一個新既同事入去,話公司有內地客戶係做貿易既。人民幣係咁升值,佢地既客仔就用美金找數,仲要幾個月先收到條數,問有咩方法可以對沖呢個匯兌風險咁。

咁佢之前就已經問左關於人民幣期貨架喇,但係因為人民幣有外匯管制,所以即使有期貨,交投都好少,個買賣差價可以去到幾十點子,真係買左唔使旨意走。

咁佢就叫我地係其他貨幣裏面揀隻好既,介紹比客人做對沖喎。

有金融知識既人都知道,對沖係要用相關既產品先做得到既。最好當然用返人民幣對美金既期匯做對沖,但可惜巿場既產品因為中國政策關係而不完善。退而求其次係用掛勾既產品,例如對沖美元可用港幣咁。好簡單咁講,當人民幣匯價上升令你收到既美元價值下跌時,你可以從買入人民幣期匯賺回蝕去既匯價,咁就係對沖。

眾所周知,人民幣係同一籃子貨幣掛勾,而且比例並無公布。所以,人民幣兌美元既走勢基本上同其他貨幣係無明顯既correlation既。點對沖呢?大家都預左美元對人民幣會跌,但如果咁樣就沽美元對歐羅(譬如),萬一美元走強,人民幣更強,咁匯兌又會虧損,對沖又會蝕錢,係兩頭蝕。嚴格黎講,呢個跟本唔係hedging,只係嘗試以其他方法彌補匯兌損失,而兩者係無關係(或明顯既關係)既。

好彩同佢講返佢都明,但佢堅持要我地建議某種(幾種)貨幣咁。咁都好啲。

星期三, 9月 12, 2007

泛民的政治智慧

人言泛民政治智慧匱乏,所言不虛。

馬力死後,若虛已說過對民建聯可謂塞翁失馬焉知非福。何姨姨妄顧中國人傳統道德觀念,人家屍骨未寒就即時宣佈參選,彷彿早已算定馬力命不久矣,先謀後著,謀住個位。如此薄情,本來已令其失分不少。

加之何姨姨好講唔講,早唔講遲唔講,就於此緊要關頭,搞所謂「不合作運動」,叫人唔好交差餉抵制政府。先不論此說有濫用歪曲不合作運動之嫌,就是於經濟掛帥的香港,要人冒被政府罰附加費兼坐監既風險黎支持普選運動;加之於電台主持迫問下對於自己會否帶頭拒交差餉顧左右而言他,講一套做一套,實在最愚蠢不過。除非何姨姨有民主先哲死而後已之決心,為推動民主不惜犠牲一切,一往無前。可惜,她連說說自己將會拒交差餉也不敢。

大老李柱銘楊森這邊廂支持甘乃威為黨內候選人,轉頭變臉說積極勸說陳太,前後言行不一,毫無誠信。初選機制未啟動,已被其一手催毁蕩然無存,不知其如何面對小甘如眾黨員。陳太一貫扭扭抳抳之後宣布參選,成功營造千呼萬喚始出來的氣勢,斷無一朝寵在君王側的福分。眾山寨會否全力輔助殊難逆料。即使贏得議席,李楊輸的能賺回來嗎?難說。

星期二, 9月 11, 2007

開工

渡過漫長的暑假後,終於都要投入工作。

新加入成為中環一族,感覺到中環的氣息。離開校園,更多的時興奮而非緊張。畢竟,我喜歡挑戰。新的生活必將帶來新的經歷。

在中環一家期貨公司上班,公司新而小,氣氛不錯(是正常情況吧)。公司有大陸資金支持,或者以後大有機會發圍。希望我能生於成長中的公司。

新生活,要學習的,還多著。寫Blog的時間可能少了,但希望能保持這種習慣。畢竟,I like it. 呢排個個都話唔寫,快D返黎啦。

Blog名要易名嗎?我不知道耶。

星期二, 9月 04, 2007

股災將至?

若虛前幾日與朋友談及世界經濟及後巿,朋友言股災尚未係時候掩至。

皆因股災永遠都重覆一個過程。一般人會將牛巿分四期而呢一刻大家都知係牛三,到牛四就係雞犬升天再接著股災。但牛三之中都會有啲現象等大家知道大限將至未。

一般係股巿反覆上升到比較高水平既時候,會開始有財經專家、經濟學者、投資猛人出黎警告股巿過高。大眾呢個時候亦都如履薄冰,有股災隨時會來臨既意識,買賣都步步為營。但當股巿毋視專家警告絕塵而去之時,恐懼者就會怨恨當日唔夠膽識去買股票,而開始眾口一詞地指責仍在警告股巿泡沫既專家。當投資者不斷咒罵呢啲專家,並相信經濟真係轉左型,股巿會長升長有既時候,先至係股災來臨既前奏。

好似2000年科網股泡沫,講緊既就係環球經濟將進入資訊世紀既概念,而熱炒既就係一啲勁賺錢既行業龍頭如google, Yahoo!,與及一啲食住個勢,搭一程順風車上巿既科網公司如tom.com。唔少細公司趁呢個時候大搞轉型,拉上科技、網絡,立即點石成金。當大家都深信個巿唔係泡沫,經濟已經轉型既時候,股災湧至,個個奶重野。

而家炒既係中國大陸經濟起飛,講既係香港經濟依靠中國,中國概念股不斷飈升,尤其係幾種行業:資源、環保等。龍頭如中鋁、江銅、神華的確大賺特賺,而好多公司已經轉型,如香港藥業(0182)大搞風力發電、新世界數碼改名蒙古能源(0276)買蒙古煤礦等例子俯拾皆是。不過,巿場仍對利淡消息非常敏感,仍對股災可能接近有一定警覺。巿場應還差一個階段,亦即所有人無懼利淡消息指罵唱淡專家一窩蜂掃高股票,那時才是股災來臨之時。

不過,咁唔代表若虛睇好短期後巿。事實上,如前文所述,若虛對美國次按問題的憂慮蓋過所有如資金自由行的人造利好因素。若虛暫時仍會持淨現金,等待時機。

星期二, 8月 28, 2007

狂潮

股巿再起波瀾。繼一周前急插穿二萬點又迅速彈升後,至今天港股已累升三千點強。每日波幅五百一千若等閒,期指大鱷真係有排玩。

若虛上周趁反彈已全部清倉。理由好簡單,就係對美國次按問題非常悲觀。

關於次按問題經濟、金融層面上既分析評論,各大報章專欄寫手財經猛人已多有論述,若虛亦未夠班去作此等評論。當忍者(Ninja--No income, No Job, No asset)都可買樓時,只要樓價一跌,洗腳唔抹腳既美國佬實供唔起。斷供潮將令大量按揭公司財政出現問題。若虛只用人性化既角度去睇次按問題:歐美各大行對次按危機不肯置評,對手持次按資產數值更是諱莫如深。若虛覺得此舉正是欲蓋彌彰,顯示各大行非常恐懼次按一旦爆煲損失將必鉅大,故此皆有口難言。若次按資產有限,斷可如匯豐、中銀故事,一舉公布所有次按資產、撥備詳情,掃清巿場疑慮。十二大行愈不敢說,危機愈深重,影響也愈大。

而如果次按一旦爆煲,喜歡按樓消費既美國佬一旦房產價格下跌,將大批變成負資產。美國經濟將類香港九七之時,有機會陷入衰退。美國GDP佔全球四分之一,消費力則尤有過之,對全球的經濟影響不可謂不大。

今日港股炒所謂AH股差價。眾所周知A股價值已達甚高水平,全因其特有封閉巿場條件才得以維持。AH股差價收窄,唔一定要H股升,A股跌唔可以咩?自由行資金尚未到,大家就一舉入巿狂炒,正是大眾瘋狂,自己需要恐懼時。而如次按分分鐘又有大獲野爆,需知基金分分鐘又再掀贖回潮,到時又掟多獲貨。低氣壓其實沒有變,只係大家都見秋毫而不見輿薪。如股神言,水退時就知道誰沒穿泳衣。

星期日, 8月 26, 2007

致有意於理大上莊者

就黎又九月開課,新一學年又黎,若虛亦都多左唔少師弟妹。

大學生要做既五件事,相信大家都早有耳聞。應該有唔少新生都希望試下上莊咁既。關於「莊」呢樣野,若虛之前都有提過不少,但都係宏觀黎睇既。對於想上莊既同學可能無乜幫助。若虛係度都想提醒一下希望上莊既同學一啲可能你睇唔到而影響幾大既事。

首先,理工大學既莊主要有四類:學生會及部委、學院學系會、屬會以及宿生會。前三者都係於學生會既架構之中,受學生會所規管。而理大號稱全大學既運作都有學生管理,主要管理既就係學生會同埋旗下十一部委。學生會主管校政、政治等大題目,而部委則主要負責不同範疇的行政工作。學生會工作多吃力不討好,民望向來偏低;而部委則更複雜。前文已提及部委選拔過程黑箱作業,甚多小人拍馬屁能上位;對外則關係錯綜複雜,時有衝突。部委作風大多懶散,或與工作性質或傳統文化有關。如場地及資源部(MADSPAF,場資)就經常被炮轟審批緩慢兼無理彈form。部分部委莊員玩多過做,例如福利部只負責影印場、小賣部及搵sponsor三項主要工作,頭兩項已有全職職員負責,只需間中補貨;sponsor更多是自己搵上門,福記中人日玩夜玩,彷彿無工作可做。部委中要選出一位代表秘書加入學生會幹事會,該秘書工作量可說多得多,但潛莊者亦眾。

學生會外亦有評議會及仲議會組織。理大講究三權分立,行政權在學生會手中,立法就在評議,而司法在仲議。評議會需審批各部委、學院學系會及屬會的不同申請、財務報告、活動報告等,工作繁多卻又人手不足,效率低下。仲議會更經常出現流莊情況(即無人上莊)。

由於理工大學學生會設有「完善」審批程序,所以如果貴會要搞一個區區20人的function,可能要三個月前填報十多分表格,遞交資料,而且常需補 交。評議、部委處事效率通常不高,以至申請經常一拖再拖。而且很多方面審批嚴謹,經常出現活動被否決的情況,令搞手進退兩難。若虛認識屬會朋友搞joint-U function,寧願以參與者身分(但實際是主辦人)參加都不與申請主辦甚至協辦,而將主辦權讓與其他大學學會,皆因審批程序煩到癲也。

學院學系會有固定會員,基礎穩固。但學院會(Faculty society)相對學系會(Department Society)更麻煩。學系會為最低層的組織,比較接近民眾。學生選擇係邊個會蒲,通常都一係揀最大,一係揀最細。最大貪其網絡廣、權力大;最細貪其在內者皆平素常見一齊上堂落堂食飯做project的同學。學院會夾在中間,網絡不及學生會及部委,親民不如學系會,被架空於中間,兩頭唔到岸(當然,亦有出色的學院會風頭蓋過學系會,但屬少數)。但兩者最大的麻煩都係源自學生會的審批制度。

屬會是最無權力的學會。屬會多屬興趣會,由一班人自發組織而成繼而傳承下去。由於屬會無基礎會員,所以需於開學後招攬會員。除了一些有固定fans支持的屬會(如旅協、music society等),其他都需積極招會員,否則會員不足,就連找接班人也有困難,隨時摺埋。而且屬會最無牙力,所以於審批過程中往往遭欺壓。若虛認識屬會朋友提到評議、場資等都無不咬牙切齒齊聲破口大罵四字真言橫飛。

至於宿生會,由於不屬學生會架構,故此審批程序簡單快捷得多。若宿生會逮屬學生會,恐怕搞個飯局甚或糖水會都要審批三個月。宿生會工作相比其他會較為零碎繁瑣,而且經常有工作,因為住既同做既都係同一個地方。由於近年出現多起宿生會行為不檢、濫用公帑等情況,故此審批亦已收緊不少,惟仍是學生會架構外的樂土。

若虛在此奉勸各位有志上莊的準大學生,必需慎重選擇莊,認為莊的文化、工作性質、參與人士相配合方作決定。如果閣下志願在研究、或欲從事需成績上佳的工作,則不宜上莊,因上莊與學業實難兼顧,必需先釐清目標。上莊乃一種承諾,潛莊者實為毫無信用人格破產。希望各位上莊愉快。理大架構實在複雜,拙文一揮而就,結構紊亂,多有遺漏之處難以盡道,還請見諒。

星期二, 8月 21, 2007

水煙


大學生攞正牌放縱,舉世皆然。若虛大學之時,亦都愛上左水煙呢個玩意。

水煙(Shisha/Hookah)係中東傳統既玩意,原理係以水過濾吸既煙草,將部分有害物質濾走。當然,呢味野唔可以話無害,但若虛一向有一套個人哲學:天底下有害既事物何止千萬,適可而止就好。而水煙呢,若虛無吸煙習慣,玩左水煙兩年以來,都未有上癮之感,總之無一般煙民所講既無煙食手騰腳震心悸血壓高。

而水煙既煙草亦有多種唔同既味道,若虛計有試過萍果、橙、茶、芒果、咖啡、椰子、玉桂、雜果賓治(無睇錯,真係fruit punch)等等。吸下味道就與那種味道相類,吸完後滿室該煙草味道的香氣。若虛曾說笑我房間在點香薰,竟然還真有人相信。

水煙唔似一般香煙可以信手拿來,隨身攜帶;其麻煩程度足以令人難以上癮。若虛亦只間中玩下(一個月一次到三次左右)。佢既社交性質其實頗重,通常都係三五知己或者一大班人個時先會點。

近年聽見水煙呢個玩意都開始係香港興起,諾士佛階同老蘭都有,不過價錢就唔多相宜。全面禁煙之後,睇黎經營呢一類外國好流行既水煙吧都有困難。

星期四, 8月 16, 2007

馬力,你死得真合時!

可能有好多人都因為佢個幾句說話,而好討厭呢位路遙先生。始終佢講既野是對是錯,都不免涼薄,有失中國人自稱厚道既優良傳統。所以,我都不避涼薄咁講句:馬力,你死得真合時!

話佢死得合時,並非因為佢講左啲咁既說話而應得報應。佢呢一刻死,反而可以平息對佢本人同佢既言論既爭議。人死為大,入土為安,誰也不得打攪,否則就係不尊重死者,挑戰中國人傳統根深蒂固既道德觀。馬力既死,下年立法會選舉前夕,就唔會再聽到話:「呀,你地既主席又話無屠城,又話咩坦克轆豬,佢到底有無人性架?」之類既攻擊。如果有,輿輪只會批評呢位仁兄唔尊重死者,人都死左仲要攞出黎講,無人性個位係佢就真啦。馬力如今一死,佢既「失言」就再無政治影響,替黨止左蝕。六四係香港始終係大議題,如果比人地捉住痛腳一路講,都咪話唔濕滯。

而家馬力仙遊,仲要補選埋佢個議席。需知左派一向都團結,而且左派係港島出選幾乎無可能打破「六四黃金比例」既宿命。係拼輸黎打之下,要協調一個最佳人選難道不大,而且亦幾乎必定係葉太,因為只有佢先可以既盡攬左派鐵票,又得到中產支持。

反而泛民主派一向山頭割據。民主黨既龍頭大哥地位比公民黨打得搖搖欲墜,已經滿心不是味兒。當年李柱銘亂告急害死何秀蘭,照理點都要讓返佢一次,好還個人情。但何秀蘭今次若勝,則下年呼聲亦高;加上公民黨的競爭及左派復興,恐怕民主黨兩席不保。再者民主黨第二梯隊斷不甘心放棄此大好良機,君不見甘乃威已蠢蠢卻動?再加上社民連搞局,忽然民主既九流政客勞醫生又想分一杯羮,都咪話唔亂。若虛估計,民主黨欠下既人情債始終要還,但要還,支持何秀蘭出選就可以。至於支持力度點樣,恐怕白鴿黨內部又有一番計算。

如一眾左派大老所言,馬力貢獻當真不少!即使死後,也讓我等可以欣賞一場激烈既選戰同鬥爭。

星期四, 8月 09, 2007

ABCDE Vs 54321

會考放榜,今年中英文轉制,由以前分ABCDEFU,變成5*, 5, 4, 3, 2, 1,同埋不予評級。Grading數目其實無變,A=5,U仍然都係unclassified,不予評級。變既係制度,由以前拉curve變成所謂水平參照法。

呢個變化好壞下面講。但有一樣野一定係改好左,就係廢除左一試兩考既syllabus A & B既制度。以往會考分兩個syllabus,A比B大概低兩個grade咁。但無論係A卷定B卷,合左格就叫英文合格,有資格升中六同考政府工,而外面既公司尤其中小企有部分都唔知其中既分別。呢種雙重標準不單混淆視聽,仲令好多英文跟本唔達標既人得以魚目混珠繼續升學,破壞成個教育體制。中六收生要計分數亦要求中英文合格,除左唔合格變合格外,如果考syllabus A既同學,一般就可以拎多2分。如果就係差呢2分達到14分呢個門檻,咁對syllabus B既同學都唔公道。係街巿買餸,你都要知一斤十兩定一斤十六兩架,而呢兩套標準,跟本無理由可以並行既。取消呢種雙重標準可以話係德政。

政府又放言,話新計分方法更能反映學生語文能力云云。若虛對此就不敢苟同。舊制係依據學生比例分grade,例如頭3%學生係A,咁佢地幾多分都會A。呢個對考生既不公之處,就係每年既考生水平可能有所不同。例如今年強,85分有A,明年75就有A,A唔到既唔代表就一定比上年A到既差。意思係,如果你生不逢時,撞著個年人才輩出,咁你就只好怨阿爸阿媽點解要個年生你。

而新制就係劃定分數評級。即係例如定左80分有A,咁只要夠分就A,如果全世界都80分,就全世界一齊A。咁做好似就話,只要達標,就有呢個成績,人地勁好差好,做好自己就攞到成績。

但呢個論點忽略左試卷難度既問題。需知年年試卷難度都有分別,今年既卷,就可能比上年深,咁今年A既人數,就可能要比上年少,可能你既能力足以係上年拎A,但今年就,sorry。

若虛就覺得,每年學生人數愈十萬,人數足夠多既情況下,分配其實都應該唔會偏離normal distribution太遠,每年考生水平應該會相約(當然,呢啲問題可以留比數學家或社會學家)。而水平參照呢,每年分卷唔同,若虛唔清楚標準分會唔 會就住作調整,而要比較試題難度再去計算標準分實行上亦睇黎唔易。

其實呢個問題就係牽涉到絕對標準同相對標準問題。更深層既意思係呢個A既象徵意義。到底呢個A,係代表你係呢群人之中既精英,定係代表你能力達到某個程度?

P.S. 仲有,都唔明點解要轉做54321,混淆視聽。其實grade又係分7個,又係2分英文入到中六,咁用返ABCDE都得丫。我硬係覺得好唔順眼。

星期一, 8月 06, 2007

文明香港人

前幾日睇左一個電視節目,內容大概係講北京要點樣整頓巿民不文明既風氣,教育佢地成為文明新人類咁。

節目裏面北京人插隊、爭上車、隨地吐痰、亂扔拉圾,睇到有啲香港人目瞪口呆,彷彿難以相信世界上仲有一個野蠻人充斥既地方,而呢個仲係自己國家既首都。

國內既公民教育未達水平,係大家都知既事實。香港既上一代仍然都仲有隨地吐痰、亂拋垃圾既呢啲壞習慣,係近年立例嚴打先至收歛不少。

呢一刻大家北望神州,就好似見到一堆無文化既紅毛生番、化外之人,愈發覺得香港人高風傲骨,係華人中既典範。

睇一睇香港,排隊成風,等巴士排隊,提款排隊,買演唱會飛排隊,一排仲可能會排幾個鐘,甚至幾日,好似攞交通銀行IPO表格、漫畫節買硬膠公仔、睇巴塞同傑志愉園聯隊交手、換膠十蚊紙、買「我不是膠袋」,認真膠。

除左人人愛排隊,大家係1500大元既恐嚇之下,吐痰拋垃圾都大為減少。好似一片人人守法有禮,個個自愛文明咁。

不過,香港人對文明(Civilized,港譯文化、修養)既標準,好似來來去去都係只係某啲具指標性既事情上。即係唔排隊,固然會被千夫所指為不文明或無文化,但並唔係所有呢類行為都會受指責喎。

好似近排網上流行一段短片,係一個男人係滿哂人既巴士上生人霸死地,屎忽坐一個腳坐一個位。有位女士當面斥責佢但呢位無文化人士依然無動於衷。旁邊既人不單無加入聲討呢位破壞香港文明形象既茂七,反而勸個位女士去上層搵位。

若虛亦見過有比較躉大既朋友可以一次過坐哂兩個位,又或者有啲個手袋特別矜貴既人,連個手袋都有位坐,但對其他企係度既人就視而不見。

又,見過好多人坐係一啲茶餐廳度食完飲完,見到人地係出面排哂長龍,依然拎部PSP出黎一齊獵龍。如果係cafe咁就ok既,人地開門就預你坐。但茶餐廳之類既,有人等位都唔願走,若虛就覺得有啲太過。

係香港問路,都會有人答既。但未等你開口問就話唔知,甚至見到你朝住佢方向行埋行就踏開兩步耍手擰頭既亦大有人在。

同類既「不文明」行為不可勝數。香港人係嘲笑指責大陸人無文化之際,唔好以為排下隊、掉垃圾掉落垃圾桶就叫有文化。有文化係要從內而外散發出黎,係一種不自私、為人設想既精神。

星期五, 8月 03, 2007

XANGA

XANGA呢樣野興起都唔知係幾耐之前既事喇。若虛只記得,唔知幾時開始,XANGA同MSN(或之前既ICQ)一樣,都係學生必備既證明文件。

MSN作為溝通工具,瘋魔全球電腦用家,係互聯網時代既產物,其作用就好似電報機係大氣電波時代同電話係銅線傳輸時代一樣。

XANGA唔同。XANGA既定位係一部網上日記。咁話明日記啦,照計係應該寫比自己睇架啫。不過,偏偏就有好多人,將佢地自己既私人日記公諸同好,等大家可以深入自己既內心世界,探討摸索究竟你係一個點既人。

聽落,係咪好好呢?可以等人同人之間既了解加深,拉近人與人既距離喎。

但,日記,之所以真實,就係因為寫既人係自己,睇既人亦只有自己。自己忠於自己,自己對自己負責,所以日記裏面既就係最真實既自己,係赤裸裸既。每個人總有啲野唔想比人知,總有啲陰暗面,就好似每個人都唔會赤裸示人。

當如果明知日記係公開既時候,有幾多人仲會將最真實既自己放上去呢?如果明知個地方有人睇住,仲有人會係個度換衫任人睇嗎?Well,唔係個個都咁鍾意跳光管舞掛。

咁既情況之下,XANGA就變左一個比人寫一本比人睇既日記既地方。寫既野,亦都係一個人想比人覺得既真我。偷換左日記呢個概念,XANGA上面既野就令人覺得可信。好多人就用XANGA去塑做一個形象、一個佢想人地覺得自己係點樣既形象。

尤有甚者,XANGA成為左一啲人虛偽、中傷、造謠既地方,是非處處,流言滿天飛。寫過一排,我都對XANGA呢個是非之地敬而遠之矣。

星期二, 7月 31, 2007

浸鹹水

香港睇黎都難脫殖民陰影。一講到留洋學生,總係有種感覺人地係高人一等,尤其係好似陶傑呢類文字販子日夜吹噓英帝。

若虛身邊都有一啲留學英美澳加既朋友。平心而論,如果話佢地有咩優勝,我好認同CK所講,佢地英文的確係好,而講起野上黎亦較有自信。其實呢啲只係互惠因果,當你英文講到喇喇聲,自然有信心,有信心起黎就特別流暢,睇落就好有說服力。

至於思考方面,我都認為平均黎講,留洋學生都比較有世界觀同時事觸覺,起碼就比例黎講,本地學生迷偶像、追漫畫、狂打機既比例睇落較高。

但其實總體黎講,我又唔覺得本地生真係輸留學生咁多。輸既,可能係人脈,可能係外資觀點。

留學生普遍家底都有咁上下厚啦,家族人脈上,點都比藍領階層優勝。需知做生意都係講關係,尤其係中國人社會,鬼佬而家都要講guanxi啦。做生意係,請人都係,中小企或者家族企業固然容易;大機構即使重門深鎖,唔係一個人一把口可以搞掂,但有人事實優勝唔少。

至於香港既外資大行,大部分都對留學生情有獨鍾,至於睇中佢地邊啲素質若虛就無從稽考喇。

浸過鹹水,真係馨香啲架。

咁作為一個本地生,面對咁既情況我又唔係咁洩氣既。可能第一步會比較難走,但只要自己肯自強,素質夠好,有肯努力,條條大路通羅馬。

P.S. 我自己個blog都有講我寫既野係無真憑實據架喇。以上既都係我從為數不少、背景不同既朋友同長輩口中聽返黎既。推測全屬qualitative,你話9up亦得。我唔排除有以訛傳訛既情況。發表意見,我覺得最緊要係有所依恃,理據唔係憑空而立,則任何意見都值得尊重及發表。學大契話齋,我唔係寫論文,唔需要有quantitative data做support。

星期日, 7月 29, 2007

Poly U Hall

近排見到多左人係因為係google yahoo search PolyU Hall入到黎。之前講左好多理工宿舍既壞話,我怕會嚇親之後做我師弟師妹既朋友。作為一個住左3年hall又上hall莊既老鬼,其實對個hall自然係多啲要求,所以想係呢度作為一個全面同中肯既評價,唔好嚇親人唔敢住hall,等我個hall都成個死城咁嘛。

PolyU Hall係八大黎講算係最新既一批宿舍,而就硬件黎講相信係傲視全港。眾人皆知理工宿舍唔使全層分享厠所,而係兩間房共用一個(與城大一樣),去厠所刷牙洗臉沖涼疴屎都可以唔使出房門。另外,每個房間都設有IP Phone,房間打房間只需撥打房號,非常方便。而每個房間亦都有雪櫃一個。垃圾筒亦定期有阿姐清理。宿舍亦有健身室、泳池、桌球枱、乒乓球枱等供使用。理大宿舍有酒店式宿舍之稱絕不為過。

理大宿舍的劃分卻是怪胎式的。每兩層劃為一獨立hall,於香港絕無僅有。由於宿舍成立日子尚淺,故宿生會文化亦頗為幼嫩。宿生會直屬宿舍管理組和學生事務處,不受學生會節制,可算既學生會架構以外的獨立王國。理大學生會屬會程序繁瑣複雜尤如政府,部分部委處事馬虎往往將各樣申請事宜一拖再拖,又或胡亂彈回,非常麻煩;而宿生會則不受此節制,運作上順暢得多。監察的工作一向由各hall tutors負責,不過tutors質素亦參差。此情況做成某些宿生會徒具虛名,名存實亡;有些更使錢貼自己人遊玩,尤如阿松買車。不過由於制肘較少,辦得好的宿生會亦有空間大展拳腳。近年由於出現宿生會亂花錢的情況,管理組於財政上的制肘已大大收緊,這全歸咎於部分宿生會私德有損與tutors監管不力。

至於「屈蛇」呢種係大學宿舍非常普遍的行為於理大則難以發生。事關宿舍有嚴密保安系統,入閘機+看更基本上確保無人可以突破防線,即使入到都出唔到,而被逮捕人蛇更會遭罰款甚至禁止入hall既嚴厲處分,更連累協助屈蛇的hall友遭警告,嚴重者更會被逐出宿舍。近年保安大為收緊,令若虛大感不快,於前文已述及,不贅。

由於理大收內地生愈來愈多,而幾乎全數都被hall吸納,故宿舍中已充斥著內地生。文化上的不同令大家相處並不容易。大部分內地生(亦有部分本地生)似乎接納唔到入hall要玩既多數香港人概念,大家價值觀上不斷沖突。

至於八個hall中,由於本人係hall soc老鬼,身分所限,又怕身分外洩,所以不便說哪個較好。奉勸大家如果有幸(或不幸)獲派理工大學,最好問一問友好朋友或者到counter逐個諮詢,否則入錯hall後悔莫及也。

星期四, 7月 26, 2007

書展

循例都有去書展行左一個圈。感覺就好似一位朋友所講:行書展係一種劇烈運動。

若虛先後去左兩次,買定飛同入場買都有。入場買就慘喇,雖然排隊既地方搬左去室內唔使日曬雨淋,但係個條路行過既人都會躁。係人多如蟻既窄通道度,九曲十三彎,上上落落,參唔多行足半個鐘先可以去到第一號館。入到去真係叫摩肩接踵,大家都一反香港人冷淡既常態,一齊親熱親熱。有啲攤位唔好話企定睇書,直情搵個位攝入去都難。迫出迫入,迫上迫落,消耗既體力都唔好話唔多。我一個後生仔行完三個零鐘,腳仔都軟埋。

此情此景,見到仲以為香港再唔係咩文化沙漠,變成文化綠洲,一片讀書之風蔚然而成。

無錯,開卷有益,肯睇書點都好過唔睇書。

不過,書展呢,某程度上都變成左一個香港人定期既休閒、社交活動,甚至係潮玩。大家可能會聽到:書展一年一次,你唔係無去過下話?好似書展必去,睇書既去睇書,唔睇書既陪人睇書,或者都睇下書,最緊要去左,唔係比人笑。

個場愈黎愈多人,啲書呢就愈黎愈遷就所謂公眾趣味。呢幾年,感覺係文學、歷史、政治既書少左,取而代之係勁受歡迎既明星寫真集+散文、烹飪食譜、旅遊指南,仲有好大大個攤位既少女文學(去睇既,絕對唔止少女,仲有好多少男同師奶)。朋友戲言而家行書展,向少人既方向行,執到好野既機會仲高!劣幣驅逐良幣乎?

當聽到有職員大叫「全部七折,有買趁手」,「十蚊本十蚊本,埋黎睇埋黎揀」,其實,呢個比較似一個書本特賣場,甚至舊書地攤。

國際政治夢工場

國際政治夢工場的圖像

國際政治夢工場 沈旭暉


行書展本來都無乜期望,亦無諗住有咩書想買。但比我偶然係Grand Hall門口見到上書局既細攤位,見到沈旭暉既新書。一向都有睇開沈生既專欄同文章,亦睇過佢之前中東反恐新解讀既一本書,所以無點睇就買左落黎。

本書仲睇緊。沈氏係新晉既國際事務教授,觀點獨到,見解新穎;尤其沈氏文章旁徵博引,旨在由淺入深,即使對國家關係興緻缺缺者亦看得津津有味。之前閱讀沈氏由非洲足球牽扯到的非洲政治已覺功力深厚非常。今次沈氏以50部中外電影為引旨,深入淺出,解構古往今來的國際關係變化,一貫沈氏風格,讀來不嫌沉悶之餘,還覺趣味盎然。

星期一, 7月 16, 2007

大學生就業率

每一年大家都會聽到關於某某大學今年畢業生既就業數字,大概內容都係話有九成幾幾既畢業生都係三個月內升學或搵到工咁。

對於都仲搵緊工既我,有啲感受囉。

其實我既profile係畢業生之中都算阿駝行路中中地咁,唔算太惡劣啦,但到呢一刻,雖然係有offer,但始終去唔到令我滿意到可以即刻止賺離場既程度。

而我認為大部分畢業生既情況都相約。撇走一堆一早accept左offer既學生,實有不多不少一大堆人係個就業巿場度等緊機會。情況就好似有一班人係股巿度投資,有啲人到價上岸,而有一班人始終都係度望緊價。

但當時間一日一日咁過而始終都到唔到價,悲觀情緒就會係呢一班仲係個巿場玩緊既投資者之中蔓延。去到一個臨界點大家覺得再唔離場分分鐘蝕清光既時候,大家就會爭住走,出現恐慌性拋售,本來望緊萬二蚊既大行trainee,而家中小企八十蚊文員仔都頂住先。三個月咁長,無好多人有咁既能耐同決心係個巿度呆落去。所以,個就業率,咪一路頂住咁高囉。

By the way,我自己都唔可以係度長等。有offer,就當係一個止蝕位。即使到唔到價,起碼唔使一Q清袋嘛。巴菲特都話保本、保本、保本。

星期四, 7月 12, 2007

絕版銀紙

前幾日推出左一堆膠十蚊銀紙,竟然有大批蟻民去排隊換領,唔知仲以為又有咩新股招股。

膠銀紙係香港的確係新野黎既,見新奇換黎睇下都無可厚非。但有啲人就話銀紙係絕版,有收藏價值云云。

點絕版法?原來話因為有唐政務司司長既親筆簽名,可一不可再喎。

財政司司長既位子,係特首既左右手、內閣成員,基本上每個特首都會委任自己班子既人出任,以特首五年一任兩任十年咁計,頂多做夠十年都要掛官歸田。回看回歸十年,都已經有四個人坐過呢個位:曾蔭權、梁錦松、唐英年同曾俊華。

記得當年松爺都有簽過新一批十蚊花蟹架喎,有無乜聽過人話有咩價值咁。

唔通真係跟紅頂白,亂買車個啲就唔值錢,下任特首既就可能一登龍門聲價十倍,花蟹都變紅衫魚?

中銀之前劉金寶簽個批銀紙又有無價值呢?睇黎無喇,貪污既人睇怕都唔多會升值。

係香港反智?定係咩都炒得?

你適合炒股嗎?

恆指直撲二萬三,個個炒到不亦樂乎,好多蟻民都想分一杯羹。

曾經聽過話,如果你一個禮拜有三次係交通工具上聽見有人講股巿,就係股災既先兆喎。聽住先啦,告誡下自己都好。

若虛淺見,覺得恆指將於二萬二至二萬四上落,直接零八奧運應該都唔會有大調整。

另外,跟據一啲生活體驗,如果你有以下既特質(愈多愈大獲),就真係唔好炒股喇(長線投資如巿場先生並不等於炒股):

-無睇報紙既習慣;
-有睇報紙既習慣,但只睇娛樂板或風月板;
-睇住個巿升,手唔持股票會成身唔聚財,睇少陣大利巿機都會心跳加速心律不正;
-睇住個巿跌,手持股票會食唔安訓唔落,睇少陣大利巿機都會心跳加速心律不正;
-聽到電視、電台講緊某隻股票就心郁郁,唔跟唔舒服;
-聽到大行出口術唱好就飛身追貨;
-以為中國高速傳動(0658)係做電訊業務或汽車業務既;
-口中成日話係巴菲特教派,東尼fans,但持股從唔超過一年;
-口中成日話自己短炒王,但止蝕位一降再降;
............

星期三, 7月 11, 2007

新商務

星光行商務搬左去美麗華,前幾日係尖咀見完工,就諗住去逛一逛,睇下撞唔撞到渣爺都好嘛。

上到去呢,的確係幾闊落喎,地方大又開揚,都有幾張梳化仔咁,其實都算唔錯,商務都唔興比人坐既。

個日係個度打左兩個鐘書釘度,但係感覺真係好差。

有咩咁差呢?因為當我企係個書架面前睇緊有咩書,或者睇緊本書個陣時,有一位四十零歲師奶打扮既商務員工係度執書。咁本來呢,佢執書都無乜所謂。但個位阿姐唔知係咪心情麻麻,見佢黑起哂口面咁,啲書拎上拎落就嘭嘭聲咁。書局裏面,整埋啲咁既嘈音,真係極度滋擾囉。

仲有,商務有幾百個書櫃,但個阿姐就唔知點解,來來去去都係個十個書櫃左右之間行黎行去,左執執右執執,漫無目的咁,係你身邊係咁掩掩揚揚,煩到抽筋。

有一段時間我拎起本書行開左坐底睇,但返黎又係咁,兩個鐘內,佢就係咁係個幾個櫃同枱度,將啲書排下位,擺啲上去,又執啲落櫃,唔知佢想點,真DLS。

希望下次上去唔會啦,唔係真係要投訴商務。

星期四, 7月 05, 2007

善惡到頭終有報

上次講金匱之盟提到趙光義係燭影斧聲既疑幻下登位,並且迫死金匱之盟中既合法繼承人弟趙廷美、姪趙德昭、趙德芳。當佢以為自己一支既趙氏子孫可以獨霸趙宋皇朝既時候,估唔到都有報應。

趙光義既子孫傳到北宋欽宗趙桓,被金將粘罕、斡離不攻入都城開封府,徽、欽二宗(徽宗即近日有自創瘦金體大作於藝術館展覽之人)北狩(宋人委婉講法,言為向北巡狩,實為被擄)。趙氏宗親或擄或殺,趙光義一支基本上絕後。但康王趙構南逃成功,於臨安建立南宋政權,為宋高宗。可惜高宗子於兵變中被殺,而自己不爭氣,再不能生育。高宗死後傳位太祖一系的孝宗趙眘。百多年後,皇位還是回到趙匡胤子孫手中。

星期三, 7月 04, 2007

恭喜渣老闆!!

恭喜佐敦曹查理渣估老闆大作追渣沽面世!!又一博界猛人出書,必買!

祝一紙風行,一登龍門,一舉成名天下知!

星期日, 7月 01, 2007

冷衫迷思

上地理堂教,香港係亞熱帶地區,四季明顯,夏天會好熱。

英國佬美國佬影響無遠弗屆,其中一樣就係老西文化。香港呢類亞熱帶/熱帶地區,夏天跟本唔適宜著老西,但為左鬼佬為世人建立既專業形象,都係要頂硬上。

但係,係三十幾度既炎炎夏日,揮汗如雨唔著衫都覺熱既時候,竟然有一班人,仲要好大班咁,陪可憐既西裝友一齊熱。

咪係學生囉。

係香港既每一個角落,只要係要返學既日子,就會有一群一群著住通常係過頭笠背心冷衫既學生。其實,有留意既人都應該知道,呢個冷衫潮流都潮左好多年,但係到呢一刻都仲係一啲都唔out。

有時,我都會諗,其實係咪香港人既基因為左適應呢個因為溫室效應而越來越熱既地球同厄爾尼諾現象帶黎既熱浪,慢慢進化,身體變得耐熱成強,皮膚散熱效果快,仲要汗腺都退化埋,唔使汗都散到熱。

睇真啲,又唔係噃,個個都好似鐵木真打仔,大汗揼細汗咁喎。仲要係一返屋企就唔開冷氣唔得既現代都巿人。

若虛為左呢樣野,都有刻意去問一下女性朋友。得返黎既答案相信大家都估到:遮掩下身材喎。

咁對於仲係發緊育既女孩子呢,的確可能有啲尷尬既。但即使係中六七、成人身分證都攞埋既,都係一樣咁著喎。唔通佢地想著個件冷衫著到八十歲?

咁跟住又聽過一個原因喎:原來話女孩子身材太好,係會招致同輩排斥架。

咁都唔出奇既,女仔一向妒忌心重,見到人有我無唔抵得,聯群結黨咁排斥人都唔奇。但係,其實間間中學都要上體育堂喎。想遮,都遮唔成架喎,毋非係掩耳盜鈴。

要講風氣保守呢,六七年前或者得既。六七年前呢,若虛仲係中四五學生既時候,曾經都質疑女更衣室既用途。係沙灘泳池,有大裏全副武裝既女仔係度游水,除左無著鞋襪之外,同係街行無乜分別。但唔知幾時開始,唔著bikini既直情連水都唔敢游。三點式滿目皆是,兩件頭泳衣基本上係最低消費,而且著既唔一定身材一流。著一件頭或者笠件T-shirt係外面實比人恥笑。香港男仔都終於可以係夏天去餵眼睛食冰淇淋。

而且,好多呢啲冷衫黨,平時行街個時就吊帶背心短裙熱褲,又無唔見會著返件褸喎。

當好多女仔都渴望有林志玲咁既身材,亦都唔介意係沙灘泳池、旺角街頭大哂身材既同時,返學既時候又唔知點解會有反射動作,要笠返件冷衫,唔笠唔舒服噃,奇哉怪也。

最最奇怪既係,連男仔都笠埋一份!男仔又點解要笠冷衫,若虛真係一頭霧水,而且身邊朋友亦都解答唔到我。到底冷衫有咩魔力可以令咁多學生當佢地好似劉華、twins一樣咁迷戀呢?

星期四, 6月 28, 2007

金匱之盟

英國首相貝理雅(Tony Blair)終於落台,等待多年的財相白高敦(Gorden Brown)走馬上任,終圓坐鎮唐寧街十號之夢。

傳聞貝理雅當年作總統之前,曾經向白高敦承諾只做一任,然後相讓。貝理雅卻是在第三任首相的中途落馬。

這讓我聯想到宋初所謂的「金匱之盟」。

宋太祖趙匡胤乘五代第一名君周世宗柴榮壯年病亡之機,策劃了陳橋兵變,於稚兒恭帝手上奪走帝位。

五代十國是中國史上政治最混亂的年代。中國陷入割據,皇帝號稱九五之尊,卻是高危職業,死於非命比率甚高。此亦為下剋上的世代,擁兵即擁權,將軍無能屬下廢之、皇帝無能大將廢之,每個王朝都比正常人要短命。

宋太祖為免趙宋重蹈覆轍,費煞思量苦心孤詣的做了好多事,如重文輕武、杯酒釋兵權。然而宋太祖之母杜太后亦非常人,時刻提醒宋太祖皇位從何而來。終於,出現了所謂金匱之盟。

金匱之盟為一歷史懸案,然而近代史學家再三考究確信真有其事。板本亦有兩個,較可信的是宋太祖死後傳位與弟趙光義、再傳三弟趙廷美、然後傳太祖嫡子趙德昭。相傳杜太后促成此盟,以重臣名相趙普起草收於金匱中。

然後就發生了所謂「燭影斧聲」的千古疑案。宋太祖與趙光義於寢室飲酒,忽然從影中見到趙光義企立移動,之後有斧頭擲地聲,太祖大叫:好為之!次日,太祖駕崩,趙光義繼位為宋太宗。

太宗繼位後曾問及趙普應傳位與誰,趙普對曰:「先帝已誤,陛下豈容再誤耶?」堅定了太宗的心。太宗及後先後貶死趙廷美、趙德昭、趙德芳,終使自己兒子趙恆成功繼位。

星期四, 6月 21, 2007

嚴厲譴責有線電視

至有線電視管理層的公開信:


有線電視管理層:

本人自有線電視九三年創台伊始,一直為貴公司忠實粉絲,雖然曾經短暫停用,但總體也已向貴公司納上百多個月的月費。

一直以來貴公司的服務亦頗令本人滿意,遺憾的是近年服務水平似有下降趨勢。

年前家父亦曾因自動續約條款而與貴公司激烈交流了意見,在不得已之下家父只能被迫繳交一個月三百多元的月費才可於之後享受優惠月費。且優惠月費亦比新客戶月費為高。本人竊以為此非待忠實客戶之道也。

自今年貴公司主力英超被奪,實力大為削弱,然已貴公司的強勁基礎與不俗口碑,喪一師實不足以動搖根本。為商者以名聲為重中之重,若口碑之好家傳戶誦,何愁無翻師之力哉?

然貴公司卻於此時藉口升級電話服務令等候接駁時間動輒上一小時,又縱容客服主任對客戶取消服務採拖字訣,顧左右而言他,家父更遭貴公司職員切線對待。此等服務態度,當世未之聞也。客戶既決意取消服務,豈此等下三流方法能挽回耶?貴公司縱多賺一兩個月月費,終難長留客戶。客戶受此等對待,終不回頭,徒令貴公司落得聲名狼藉,無可挽救,豈非得不償失?

竊聞客戶乃為商之本。貴公司如此刻薄老主顧,自毁長城之舉也。況失英超、失一城矣;失聲譽、失根本也,何必為一場戰役的勝負葬送貴公司的整個電視廣播業巿場爭奪戰?

本人對貴公司的做法表示極度失望。祈希貴公司能向本人及家父公開道致歉。

余若虛

星期三, 6月 20, 2007

Online games

六七年前,若虛都曾經為虛無漂渺既online games著迷過一段時間。

個時online game呢樣野先啱啱興起,由於寬頻上網普及化同大眾化,令到普通人都可以玩到呢類傳輸量極大,56k無法support既遊戲。

當時我玩個隻game,叫金庸群俠傳online。

大部分online game,都係要無休止咁賺錢,升lv,賺錢,升lv...玩家需要投入大量時間落隻game到,幸好我都唔算太沉迷,睇我lv唔高間中比人殺就知。

好多人為左打機,放棄左讀書、睇電視、刨twins既新聞、同frd去街甚至係食飯疴屎既時間,全情投入。聽聞,個時有位非常強勁既玩家一家四口輪流升lv,個仔字都未識寫就識幫老豆練功咁。

由於外掛(即係一個program可以幫你自動練功升lv)橫行,係人地一日升幾十個lv既情況下,我覺得無癮就quit左隻game。都可以話迷途知返。係我quit game既時候,大量online game如雨後春筍,而打呢d game既風氣有增無減。

回頭一看,玩呢類game真係極度浪費時間。你唔投入時間就玩得無癮,你想過癮就要訓哂身。不過,就當係年少輕狂啦。

出奇既係,當時認識既一班朋友裏面,竟然以上班族佔大多數。

經常聽到香港上班族生活緊迫,時間少工作多,但我就認識左一群放工就打機,或者返工都打機既玩家。

若虛總結香港人玩online game主因有二:
-實現自己於現實世界夢想但做不到或不敢做的,例如:成為組織領袖、武林高手甚至界女王,滿足個人幻想
-認識圈子外的新朋友,感覺能交心,不致如現實朋友般利益轇轕千絲萬縷,會為一餐飯邊個俾錢而反目

今天online game遍地開花,可惜質素大多低下,甚多遊戲尚未開發完成就推出搵銀。外掛橫行,而發行公司因怕玩家流失影響收入情願隻眼開隻眼閉,令可玩性大為降低。

辦得好既online game多為西方國家主理,而非日韓台等三流發行商。於online game界中口碑甚佳的World of Warcraft就是一例。

World of Warcraft辦得最好的地方就是嚴打外掛,一發現即斬首絕不容情,而於管理上亦非常人性化,會容許玩家於遊戲改動後重新選擇某些參數。於控制通脹方面亦非常好(須知甚多online game因外掛玩家大賺錢而將物價大幅調高至嚴重通脹)。

不過,看完以下一片,愛玩或不愛玩online game的你,會對它敬而遠之吧。

(South Park衰仔樂園 X World of Warcraft魔獸世紀,英文對白,非常搞笑)
http://www.youtube.com/watch?v=3Q49V_ESWE4
http://www.youtube.com/watch?v=RAwctsPi4w0&NR=1
http://www.youtube.com/watch?v=EWL6Ek7vFFQ&NR=1

星期六, 6月 16, 2007

真係會食死人?

近幾年中國大陸食品屢屢被驗含有某某有害成分,搞到香港地成日人心惶惶,呢樣又話唔食得個樣又話有毒。

巿民大眾多愚。但,政府就不能做些事嗎?

近日又有七味粉同燕麥條驗出含大麻成分四氫大麻酚,今次政府就已表明此等食品含該有毒品質含量不至影響人體,算有進步。

記得往年有淡水魚孔雀石綠事件、蘇丹紅鴨蛋事件等等,搞到人生惶惶。以孔雀石綠事件為例,政府首先公布淡水魚含某致癌物質,食用會點樣死云云。過幾日再公布話,其實每日要食八十斤魚,先有機會「奶野」喎。

巿民大眾對呢D個名蹺口杉手既化學物質一無所知,見政府話唔好食,梗係唔會搵命搏啦,尤其係而家呢個樣樣都講健康既社會,師奶們更係避之則吉。到過幾日話食都無問題,佢地淡水魚唔食得既諗法已經入哂腦。淡水魚販魚檔就真係多得政府唔少。

近年就係興埋呢種有少少野就講到死人冧樓既新聞。但無論係特區正苦定係巿民大眾,都好似無諗過最基本既一樣野:一樣野有無毒,除左睇性質,仲要講分量。阿媽都識講,呢啲野食得多無益,咁都要有咁上下多。孔雀石綠如是,蘇丹紅如是。人人皆以為幅射有害,豈不知每件身邊每件物件包括人體本身,每時每刻都在發放幅射。幅射要對人體有害係要到一定劑量。人無水不能活,飲過多水卻會中水毒,正苦又要提醒巿民勿飲水過量耶?

有曰這個社會反智,可謂冰封三尺,非一日之寒。

星期四, 6月 14, 2007

畢業以後

估唔到臨畢業食返舖尾糊,仲要一炮雙響:GPA首次過3、拎第一條A。

以我咁既態度去對待大學既學業,咁樣既結果我以經喜出望外。

仲記得上年係歐洲流浪,咬緊麵包個時都仲諗緊,萬一求其一科core有咩衫長褲短,玩下手都唔可以如期畢業。好彩,又大步檻過。

記得之前有一科,100% course work,交一份project,由week 1做起,我拍著組唔熟兼唔多啱既,諗住有排煩。好彩個位小姐永遠唔信人,咩都攬哂上身,係我每日enjoy緊我既生活既時候,唔經唔覺就誇過呢個大關口。諗返轉頭,都可以話塞翁失馬焉知非福啦。雖然我真係勁唔鍾意呢個人,但都要講聲多謝。

學業完成之後,終於離開左兩樣野:離開左住左三年既hall;離開左成廿年既考試戎馬生涯。我係hall有好多難忘既回憶,實在唔係平時可以經歷到。可惜個hall管治每下愈況,到離開既一刻,竟然無乜留戀,實在係幾可惜。離開以後,都希望以一個過氣宿生既身分officially比返啲意見宿舍管理個班人,至於點比,仲諗緊。

至於戎馬生涯就成功闖過唔使馬革裹屍,都算係咁。要轉型做騾仔,睇黎唔簡單。黎緊呢段日子,應該都要排涯。不過首先要面對既係無限HR既審訊盤問,實在係有啲吃不消。

呢段日子,比較忙。忙住吃喝玩樂,渡過可能係黎緊呢三五七年最後一個假期。忙住比人盤問,希望做騾仔都搵到個好主人,唔使比人虐待。仲有,忙住陪伴呢幾年並不常見既家人。雖然,基本上我每個禮拜都會返,都算係一個幾黐家既年青人。黎緊既日子,我都未必又咁多時間陪佢地喇。屋企,對於我呢個都幾傳統既中國人,同食飯一樣緊要。

星期一, 6月 04, 2007

那年我四歲...

十八年前那個春夏之交的一場風波發生時,我四歲...

那時父母工作都比較忙碌,我對這麼一起震憾了香港以至全球不少人心靈的事件一無所知。

直至年歲漸長,愛讀歷史,才從書中曉得新聞中常出現的那個詞彙是什麼意思。

非親眼見親耳聽,我看這一起事,感覺有些淡然。

中國以至全世界歷史上,屠殺的事件還會少嗎?死千多人,從歷史角度看可謂不值一提。

滿清入關,康雍乾三朝大治,號稱盛世。然而,有史學家提出有力證據,說明明朝末年人口應達近一億,而至康熙年間,人口竟只有約二千萬!歷史,從來都是勝利者的著作。

日軍侵華,單是在南京,保守估計就屠殺了二十萬人。

西班牙征服者佔領美洲時,有學者估計,被屠殺土著上億人。

上面的是可以算是屠殺外族的,那麼自己人打自己人的呢?

同樣是共產國家前蘇聯於斯大林主政期間,或遭屠殺或流放勞改至死蘇俄人民近二千萬,佔蘇聯人口約三分一。

中國歷史暴君的屠殺,更加不勝枚舉。翻開五代的歷史,暴君所行非人能想像。

有名點的,明朝朱元璋登大位,就有胡惟庸、藍玉大冤案,死者五萬餘人。徐達、劉伯溫等無一倖免。世祖朱棣靖難屠殺逾萬,最出名的要算誅殺老師方孝孺九族,方孝孺怒道誅我十族也不怕,世祖就誅其十族,朋友門生皆被處死。

要數近代,文革期間被鬥死的人,不知是一千的多少。

但為何十八年前的那一個風波,令這麼多香港人揮之不去呢?因為,這是人們親眼目睹,真真實實的放在眼前。那個震憾力並非書本上一個又一個的數字所能比擬。

若虛對那一起事,沒有大感受。但對於不尊重歷史的人,亦必須齊聲讉責,人人喊打。否則我等與日日在罵的日本右翼分子何異?

中共的那一夥人,礙於現實,要平反就等多一兩代吧。文革的平反也隔了一代人(華國峰),若非鄧小平崛起,要平反也未必如此輕易。如今小平雖逝,李鵬、老江等一眾猶在,於中共與中國人論資排輩的傳統下,平反談何容易。

星期五, 6月 01, 2007

窄頻在2007

大家上開網既應該都記得上年年尾台灣地震搞到香港網絡大塞車,令全港網民要捱左成半個月時光倒流既56k窄頻服務。各位博客個時都叫苦連天,若虛身在歐洲旅行算逃過一劫。

但其實若虛身在理工宿舍,連線速度其實好唔得56k幾多。一棟入住左先四年,算係香港新一批既宿舍,上網竟然仲衰過其他幾十年歷史既hall。

上網慢呢個問題,其實都係呢一年先開始發生。之前理大hall新落成,每年新年春茗既願望都係常滿,個時位仲多到可以比fresh-grad(剛畢業未夠一年的學生)住,更加免費比校隊(運動員)住埋。

到第三年個hall終於如願塞爆,當hall management staff係春茗一片歌舞昇平慶祝住滿,學生既苦難卻悄悄降臨。

Full House既原因好大程度上並唔係因為本地學生多左報hall,而係內地生數目激增,而且老奉一住四年,結果佔據不少宿位。

潘大師為左爭宿位爭到低聲下氣咁,其實,點解當年個planning咁失敗,foresee唔到之後幾年既學生人數呢?早知如此,宿位都可以起多啲。

或者當內地生湧入係政策轉變,事前無從估計。咁,至少,Full House唔應該影響到學生係hall既生活丫?乜住爆唔係預期中既事咩?

事實上係,而家peak hour等架lift,玩下手要三個字,15minutes!呢個相信唔係可以接受既等候時間吧。

洗衣房長期爆滿,要洗衫最好係深夜三點後否則難以霸到機位。(當然又要多得一啲洗完唔收衫等啲衫係到up到發霉發臭既人)

最嚴重既係上網。Hall裏面既人,下畫五點到凌晨一點左右就好似坐左時光機咁,返返十年前既56k世界,享受住load一個網頁呷一口咖啡既優悠生活。

可惜,趕功課、趕send資料、search sources既人無呢種閒情逸緻。

有位朋友鍾意上網打機,佢四點開game都好順,一到五點即刻見功,夜晚更加係打唔到機。打過機既人應該明白個種感覺。

夾埋Poly個refresh完會唔見哂你打既mail既portal,如果你打封mail唔記得做backup,你一按send,由於太慢佢又會error send唔到,一返轉頭就會無哂D野。呢個致命combo連續技令我同我roommate幾乎一隻杯車埋個mon度。

Youtube更加唔使講,想睇段三分鐘短片,開住browser load三個字先啦。

若虛仲係hall既staff口中得知,之前曾經因為hall太多人,所以將每人既bandwidth都cut左少少咁。

嘩!個hall可以有幾多人?幾多床位咪幾多人囉,數床位都唔識數?床位幾多你知架,而家bandwidth唔夠分,原來個解決辦法係每人分少啲,唔係搵多啲返黎分。

夠哂公道。

係講緊web2.0同10Mb獨享既年代,一班都要上網搵資料、交功課、或者打下機既學生仲係活係10年前56k既時代。

星期四, 5月 24, 2007

閉路電視Vs宿舍管理

POLYU HALL裏面每一個角落(除左房間、厠所同後樓梯),基本上都係閉路電視(CCTV)既覆蓋範圍。

我唔知香港仲有邊個地方係咁,除左酒店同監倉。

基本上,由你踏出房間既一刻,你既所有行縱都會被紀錄。而且,閉路電視既清晰程度,足以係特定資料庫裏面辨別某人既樣貌。

若虛唔係好搞得明,一套咁監倉既監視系統放係一所大學宿舍所為何事。

Hall係有好多形形式式既guidelines,例如唔准食煙飲酒賭博喧嘩滋擾他人,11-7唔可以留係異性樓層等等。我唔明白呢堆guidelines係依據咩標準去set,但hall management點執行呢套guidelines其實可以探討下。

我既意見係,如果係影響唔到人既情況下,其實,又需唔需要管得咁嚴重呢?

即係我係我自己房夜晚同幾個男女性朋友飲酒,飲完酒各自返房訓覺,係無嘈到隔離左右又無醉酒鬧事滋擾他人既情況下,其實又需唔需要去管呢?又或者,我地係房喧嘩,但隔離左右並唔介意,仲可能嘈埋一份大家開心,咁,又需唔需要去管呢?

當然,係法律上,每個學生入hall都已經係contract度簽左名接受呢堆條款,咁應該係要跟既。有人會覺得既然hall有咁既rules,又唔可以有法唔執既。呢個論點當然無錯。

我想講既係合理唔合理既問題。撇開所有合唔合法既野黎講,大學宿舍,究竟需唔需要咁樣限制、監視、管促學生。除左CCTV,仲有看更不定時巡樓(約莫一至兩個鐘一次),實行睇到你實。

大學生基本上都係十八歲以上,手持三星香港永久居民身份證既成年人。佢地有自己既自由意志、思想,亦都需要為佢係社會上所作所為負上刑責。大學係咪應該要好似董腳痛治港咁,實行家長式教育,好似阿媽教仔咁,話埋比你聽邊樣做得邊樣唔做得?

大學係培育學生獨立思考既地方,可惜大學宿舍偏偏要壓抑學生既個人意志,立下不平等條約,禁止學生做社會同法律接受佢地做既事。

當然,自由意志不等於為所欲為。學生所做既事必須合法,而且不影響他人。

所以,有看更見到你飲酒都唔會理,in case你無醉酒鬧事嘈喧巴閉,我覺得係好事喎,有人情味!不過,管理公司(外判左)同看更講人情味定請佢食無情雞就唔知喇。

好似飲酒、賭錢(有限度)呢類合法活動,若虛覺得實在無理由禁。唔係個個飲完酒都醉酒駕駛、醉酒鬧事架喎。如果因為有人會飲完酒鬧事而禁酒,咁應該全香港都要禁酒啦。

至於吸煙,由於二手煙不能避免會擴散影響其他人,所以禁係有道理既。硬係要講既,咁可以劃吸煙區既。(不過,咁做個社會又會發癲亂吠)

好似夜間探訪異性房間呢類行為,其實應唔應該禁呢?走到街上求其捉幾個師奶阿叔問,都應該會話:「禁啦禁啦,唔係佢地咪亂咁黎?」

但其實同hall共住,有時坐埋一齊傾計、一齊玩、飲酒,好平常架喳喎?日頭要返學,咁梗係夜晚先坐埋啦。你幾時見人地會朝早係酒吧開party架?

唔講玩,夜晚相訪可以係傾功課、做project架嘛。你知啦,有好多野唔到最後一日都唔識黎急。但如果問hall management,佢會答你:要做project,出common area做。大佬,我要用電腦,部desktop點算呢咁?

好喇好喇,的確有男女真係夜晚係房幽會,翻雲覆雨。但係,佢地都係成年人喎,咁做又無犯法,點解要禁呢?你話驚搞出事,拿,呢D咪家長囉!要出事,駛乜夜晚,日光日白照搞可也,又管到幾多?難道要男女全面禁止互訪?係唔影響同房宿友既情況下,其實有咩問題呢?係婚前性行為合法並已經被普羅大眾接受(當然會有人唔同意呢個論調,但至少大家認同係毋可避免),其實,係咪應該好似外國宿舍咁加部condom售賣機先係正途呢?相信而家賣condom唔會再比人話係鼓吹性行為喇掛?如果有唔知X光社會唔會又要出招呢。

到底,香港既大學係想教D點樣既學生出黎?係咪要以six-sigma標準倒模一批佢地覺得合格既?

星期二, 5月 22, 2007

告別,開始,再上路

考試完結,象徵我對理大的告別。三年大學生活,轉眼即逝。回頭一看,A-Level彷彿昨天。我卻,沒有多大的感覺。

如果說有,應該是面對就業巿場的龐大壓力的無助感吧。

之前說的畢業宴,若虛卻不過幾位好友的邀請,始終也去了,就當是一個階段最後的記憶吧。當晚一如所料,各自各精彩,也沒什麼好提的。宴罷與幾位好友餘興,感慨良多--如此一聚,他日難再。

總有一些人的友誼你希望能維持下去,但最終卻不知為何,疏遠了。希望三年後,還能與這些朋友對坐而談,飲酒作樂。



每年各大院校都會發些關於學生就業情況之類的數據云云。理大數據三個月內97%畢業生就業或升學,平均月薪近萬二。

若虛三年來,燃燒青春,同時燃燒GPA,成績只是不過不失。這一刻開始感受到就業巿場的壓力了。

我開始質疑數字的含義。所謂97%就業升學率之中,到底有多少人得償所願,拿到一分dream job,又有多少人受不住時間的壓力,自降身價但求返工?

若虛深信「男怕入錯行」,盡量不想亂揀工。不過時間與搵工壓力成反比,不能無止境等待坐食山崩。

還有一點時間,做該做的吧。

----------------------------------------------------------------------------
考試已罷,疏懶幾天,放縱幾天,人流都降了幾天。

講起人流,呢度人流就快突破一千大關喇(車,一千都好提?)。都算係一個里程碑嘛。

多謝CK,Justin,渣估等等名blogger睇得起,將我呢個blog既連結放係毫不顯眼既一角已經為呢度帶來大部分既人流。

但,諗諗下,死啦!我都畢業喇,個blog係咪要跟住改名呢?要改,改D咩好呢?

點都好,學凸手話齋:我要寫好呢個Blog!

星期三, 5月 16, 2007

三年一宿

大學教育資助委員會(UGC)主要負責哂所有大專院校既撥款事宜。其實,呢啲野教統局做埋都得,又要多個咁既會好有問題,但呢度暫時唔討論住。想講既係,UGC出錢起左好多hall,包括理大宿舍。係UGC既guidelines入面有一條,係話要盡量保證所有同學都能夠三年一宿,即係讀三年大學至少住一年宿舍,感受下hall life咁話。

然則咩叫做hall life呢?若虛並唔知道UGC既諗法係點,但我認為hall無自己既culture,無自己既spirit,無自己既tradition,就唔叫一個hall。若虛唔係想講要好似港大既hall咁有咁強既文化精神傳統同性格,但一個hall點都要有啲屬於佢而又可以令佢唔同於其他hall既一啲野。Poly既hall日子淺,文化根底薄弱,其實樣樣都要靠一代一代既人,一點一滴咁打造出黎。咁呢一代一代既人亦要將自己既理念灌輸落去、傳承落去。文化係需要經年累月去沉澱,只有咁樣先可以慢慢打造出一個hall獨有既文化。

係呢度需要講一講,若虛既意思並非要後人必需依據前人既做法不敢稍違,唔同莊既作風、做法、手腕可以好唔同,亦無需要削足就履,只要套方法同支莊八字夾而又行之有效就得。但係個大方向黎講,就每一屆莊必需要一樣,唔可能一年一個topic,星期美點次次新款。如果對個hall既大方向唔認同,其實跟本就唔應該去參與佢既內部運作。

咁樣,要慢慢去建立一個hall既文化,最基本既當然就係人啦。新入黎既宿生,就係靠呢啲已經係hall打滾一兩年,受左個套文化感染既人,將舍堂既文化傳落去。而呢個受感染再傳染比人既團體呢,一定要有返咁上下size先夠影響力。小貓三四隻,點感染到百幾人呀?

而事實上係整個hall呢幾年既運作上,每年都有一定既quota比hall asso去選人留低,呢群人當然就係最能夠將個舍堂既文化傳落去既人啦。可惜,近幾年宿位越黎越緊張(內地生越黎越多,仲一定讀四年就住足四年,霸左大量宿位),沙皇又反口唔肯批地起hall,潘生畏首畏尾,惟恐得罪沙皇就要求斬一部分hall asso揀人既位,比返多啲人有得住咁。

咁樣做就令到有經歷過個hall既文化既人越黎越少,亦越黎越難將呢啲文化精神傳統傳落去。到最後個hall就出現文化斷層,好似慢性自殺咁,越黎越無生氣,嗚呼!

係科大有類似既情況發生過。傳聞因為科大校方不滿部分樓會(每層樓都有一個soc)好似六樓兄弟、猛男會咁太活躍,影響學生讀書,就想整冧呢啲樓會。結果就度左個quiet hall既政策出黎,將個啲強既樓劃做quiet hall,assign個啲自己報hall時declare自己做quiet student既人入去。同你一獲過打一大劑麻醉劑,仲唔整死你?

一個hall無文化、無傳統,講咩hall life丫,只不過係一間酒店啫。

星期一, 5月 14, 2007

二級不雅

中大學生報情色版經審裁被評定為二級不雅。

有睇過原文既讀者應該都見到,全篇情色版,純文字創作,最敏感既係「問」過幾條「踩界」既問題。的確,如人獸交、亂倫等都係呢個香港社會道德標準所不能接受既,但文章中只係詢問相關問題,最多只去到討論層面,同鼓吹沾唔上邊。

有論者話呢類討論可能會令一啲心智無咁成熟、意志唔敢堅定既人誤入岐途,對此說若虛實不敢苟同。學生報既讀者都假設係十八歲以上既大學生,而香港法律就假定過左十八歲為一個界線,就當你心智成熟意志堅強(除非你有醫生證明係智商有問題咁),並需為自己所作所為負上刑事責任。

而家中大學生報被評為二級不雅,有幾嚴重?劉嘉玲裸照係二級不雅;鍾欣桐被人偷拍係二級不雅。大家閱畢個篇情色版,覺得佢真係比得上呢種程度嗎?

拎呢單野同當年「新亞桑拿」,其實,情況仲好。當年個單野係書院為互片而創作純粹下流式、品味低俗式既口號,而侵犯到某啲人,況且參加者都係被迫接受呢類行為,參加後無選擇餘地。但今次係討論式既性問題研究(你可以覺得學生背後動機兩次都係一樣,但起碼佢今包裝到),而且大眾係有選擇睇唔睇既權利。如果你覺得唔鍾意,咪唔好睇囉。

中大校方既做法一如以往,又係打壓。迅雷不及掩耳式咁係未有定案之前就作處分,仲盛傳會踢人出校,太令人失望。一間大學就係咁容易被輿輪撼動嗎?

畢竟又係社會標準問題。社會永遠只想倒模出一個樣式既大學生而壓制佢地既空間。


---------------------------------------------------------------------

尚有水準高呢度幾十皮既好文:

刁民公園

新春秋
刁民公園2

星期六, 5月 12, 2007

香港痴Q左?

港聞
A04
明報2007-05-11


網上貼淫相超連結判罰款網友認罪留案底成首宗案例


 【明報專訊】警方首次檢控以超連結於網上發布淫褻照片的網民,該名48 歲的網友,去年在「Uwants」網站討論區的成人貼圖區以超連結方式內發放8 張色情照片,網民可透過小圖片聯繫外國色情網站,其後影視處接獲投訴後,裁定有關圖片屬三級色情照,遂把案件轉介警方。網友昨承認發布淫褻物品罪名,裁判官指涉案相片是淫褻物品,但考慮相片內容不涉及變態,故只判罰款5000 元,但網友從此留有案底。

被告求情:不知行為犯法

辯方律師求情時指出,於物流管理公司工作的被告胡大偉(48 歲),現與女友及女友的3 歲兒子同住。律師又指出,被告不知道自己的行為是犯法,因該網上討論區內有不少由網友發布色情相片,而被告的動機純粹是與網友觀賞及分享照片,並無任何經濟利益,律師要求裁判官考慮到涉案相片並無小朋友或動物出現,內容只是男女性交及生殖器官,而且屬初犯和後悔、是不了解法例才犯案,盼獲輕判。

案情指被告於去年11 月註冊為Uwants 討論區的會員,並一直使用「fireman1324」的會員代號。同月15 日,被告在外國網站複製了8張色情照片,然後在Uwants 的「成人貼圖區」內發布該批照片。這些色情照片均包含了超連結,可聯繫到外國的色情網站。

相片不涉變態罰款5000

直至去年11 30 日,影視及娛樂事務處接獲市民投訴,指有人在Uwants 討論區內發放淫褻相片。其後淫褻物品審裁處把該批照片評為三級淫褻物品,遂轉介警方跟進。警方根據討論區網主提供紀錄,發現被告是發布者,於是在本年3 14 日前往被告位於深水埗汝州街寓所拘捕被告。被告當時承認在Uwants 討論區發布色情照片,但指不知這樣會觸犯法例。

商業罪案調查科總督察周七根昨於庭外指出,本案是首宗透過超連結發布淫褻相片而被定罪的案例。他強調,警方有信心透過定期巡查及市民舉報,再偵破其他同類案件。據了解,警方已要求該討論區的網主刪除涉案相片,並定期檢查網頁。

周又表示,尊重法庭判決,希望市民日後提高警覺︰ 「在現實生活不應做的事,在互聯網上也不應干犯。」

根據香港法例,以任何形式發放淫褻物品均屬犯法,最高可以被判罰款100 萬元及監禁3 年。【案件編號︰ KTCC3075/07

港聞
A04
明報2007-05-11

上載色情網址也違法

對於有網民因為利用不雅相片作超連結被定罪,有法律界人士表示,即使沒有照片,只是把一些載有淫褻或不雅相片的網址放至網頁讓其他人士瀏覽,亦有機會觸犯 有關法例。他指出,就算發布者沒有上載照片作超連結不代表不會犯法,因他們也是間接「發布」不雅物品,瀏覽的網友也只是「多走一步」,最終「有心」網友都 會看到這些色情網頁上的照片。

間接「發布」不雅物

他又補充,是否會被檢控亦要考慮那些照片的不雅程度,網頁是容易進入還是需要密碼等等各方面。他表示,由於現時網上罪行日新月異,目前並沒有類似的案例作參考。他又認為是次案件中,被告把淫褻照片放在討論區內,讓其他人士連結到色情網頁,明顯已符合「發布」的定義。




---------------------------------------------------------------------------


本來想寫其他野,睇完呢單,真係唔寫唔得...

香港係咪痴Q左?

原來而家既香港社會,真係講下都唔得,講下都有罪,仲要真係上庭審個隻。中大學生報問卷問「你有無諗過同家人做愛?」就比報紙話係「鼓吹亂倫」,咁第日問人 「你覺得台灣應唔應該獨立」就係鼓吹台獨;「美國打伊拉克啱唔啱」就係鼓吹戰爭啦。咁不如話埋要對有呢種思想既人予以批判,並必需取諦,且要以勞動洗滌佢地既心靈。

我唔知咩係所謂發放淫褻物品,不過如果你話showhyperlink出黎都要坐監罰錢留案底,我諗,如果差佬要捉,真係識用電腦既就捉得。

假設我個網頁有hyperlink連左去uwant論壇,跟住輾轉連到去個幅「淫褻物品」,咁我咪都有「間接發布」?「有心人」「多走幾步」一樣都可以 access到呢d野架喎,咁我係咪又要比人告呢?可唔可以,有d專業律師既意見,唔好引述一位「法律界人士」呢?我而家好驚喎!

咁不如香港政府學大陸咁搞網路管制,block哂所有色情資訊,再告埋所有可以連結到去呢D資訊既網站,Google、Yahoo!、百度,無人漏網,一條資訊罰五千,咁咪肥到癲?

香港真係癲左啦!

---------------------------------------------------------------------------
延伸閱讀:(希望唔會比人告)

CK
尹思哲
新春秋
新春秋2

---------------------------------------------------------------------------

仲有,各位網民,如果想聚集一下群眾力量就黎呢度啦,雖然我地呢D蟻民都係不值一晒。希望唔會又比人告啦



星期三, 5月 09, 2007

一個故事

今日聽到朋友講佢一位朋友既故事,同渣估講個位命途各異但皆多舛。呢個仲十足電視劇個啲悲情主角添。

個位朋友,自幼父母離異,阿媽就掉抵左佢跟佬走,老豆就窮途潦倒,最後失埋踪。咁佢就同佢阿(女麻)相依為命啦。自己讀書成績又麻麻咁,讀過四間中學,考過幾次會考,屢敗屢戰,又比佢過到關,仲係理大搵到個副學士讀。咁諗住有書讀下,第日都可以搵份好工,唔使捱得咁辛苦啦。

佢死慳死抵,又做超巿執貨,又做馬會接線生,仲要做夜更,貪佢有多兩百蚊的士錢。卒之今年行年廿五,都叫等畢業喇。但係好景不常,以為搵到份好工啦,點知左撲右撲都係得個吉,先知原來政府報紙話咩經濟好轉易搵工係呃人。咁頹頹地,咩都要試下架啦,就走左去sell保險囉。

保險公司你一入職,佢都會比course你讀,但考IIQE咁呢,唔該自己出喇。咁翻箱倒籠,湊埋副身家考左個試,叫做入左職。但係做保險,裝身梗係唔少得啦,先敬羅衣後敬人喎。咁又要再使一筆裝身,仲買埋對袖口鈕。點知保險公司就同佢講,呢兩個月probation呢,我地都會出糧比你,但係你要簽到十二萬單,咁先比你過probation噃,唔係連份糧都要退返比公司。嘩,一出道就要撲十二萬單啦,以經好大壓力喇。

點知真係福無重至,禍不單行。同佢相依為命既阿(女麻)係呢個時候兩腳一伸,就咁去左西方雲遊。白事要洗一筆之餘呢,轉頭仲收到信。原來話層公屋係老婆婆既名租既,而家婆婆過左世,咁房署就要收番層樓,請早日執包袱走人咁話。

無可奈何,就走左出去租間板間房住。到而家,兩個月限期過左四分之一,單就簽得一萬唔夠。搞到有份糧都唔敢洗呀陰公。

個日佢就約左我位朋友係中環某茶餐廳傾基金,落足咀頭但都係唔掂,事關我個位朋友都未畢業。佢臨走個時灰到,係茶餐廳裏面逐個派卡片,sell人買基金保險呀。如果閣下近日有遇過咁既一件事,相信主角就係呢位仁兄喇。

而家佢都係靠超巿執貨同馬會頂住架咋。

前路茫茫...

聽完呢個小城故事,個心都有啲酸酸地。香港地,都仲有好多可憐人呀。

星期一, 5月 07, 2007

蘇揆顯風範

民進黨第一輪黨內初選結束。謝長廷壓倒蘇游呂三人得勝。謝長廷於十餘萬選票中贏蘇貞昌萬五票強,游呂二人得票遠被拋離。

然而,跟據民進黨初選機制,黨內初選只佔百分之三十,第二階段的民調佔百分之七十。蘇貞昌如果能於餘下時間逆轉民調一直落後的劣勢反勝謝約百分之五選票,則能勝出初選。明顯地,這並不是沒可能的事。政局瞬息萬變,加諸謝弊案纏身,蘇並非無翻盤的可能。

但蘇貞昌卻於初選結果公布後第一位站出來承認失敗,將尊重黨員意願及退出初選。於「未輸實」既情況之下,能夠果斷地化解初選帶來爭鬥,退選以顧全大局,讓謝長廷能騰出手來籌備競選總統而毋須再區區糾纏於黨內「自己人」的鬥爭,實顯風度。蘇貞昌一退,遠遠落後的兩位,也不好意思厚著臉皮纏鬥下去。

在此無意、亦無力分析謝勝蘇敗的原因。只是若蘇要翻盤,難免要跟謝繼續互相攻訐,無所不用其極的鬥法,對黨的形象亦非美事。蘇能於此刻斷然引退盡顯風範,與得票不過萬、最初堅持「走完整個初選過程」的呂秀蓮相比高下立見。

民進黨能如此尊重初選與展示團結實難能可貴。二千年連宋若能如此,則民進黨豈能承虛而入。民進黨之福,卻是否台灣人、中國人之福乎?

----------------------------------------------------------------------------------

剛剛於justin那裏到方卓如blog一看,發現迷失中環已經重開了!各位方卓如迷萬勿錯過。

星期五, 5月 04, 2007

最低工資

justin同咁多人講最低工資,支持反對各有所恃。雖然我工都未有著落,但都想講下。純粹門外漢之見,既唔專業亦唔係自身感受。

香港比起好多歐美所謂資本主義國家其實更資本主義。歐美國家好多都實行福利主義,即係抽重稅,但政府就提供好完善既福利同社會安全網。基本上,係呢啲地方無野做,唔會餓死之餘仲可以維持幾令人滿意既心活水平添。某程度上,都幾discouraging,即係如果你對生活要求比較低,平平淡淡就好,咁唔做野等政府養就搞掂。

samsara話齋,其實勞工,係傳統經濟學都係一種商品。勞工既價格,亦都係由巿場調節,透過個交叉黎搵一個平衡點而定出黎。所以,好似justin咁講,而家既問題係太多低技術勞工供應,搞大左個supply。你諗下,而家每個月有差唔多成萬人係大陸落黎香港,十個有九個半都係會同地盤佬、洗碗阿姐、掃地阿嬸同酒樓侍應爭飯碗,咁點樣唔做爛巿丫。

咁,如果真係有最低工資,就會干預左個巿場運作,明明三千蚊請到既人,家下要四千五,咁做老細既,自然又會揀肯接受四千五條件最好個個。婆婆,我地都係請個識兩隻英文字既後生仔喇,下?你想收三千?坐監架喎!呀李啅人成日話要幫D老婆婆爭最低工資,可能爭到既結果就係婆婆可以返去享清福囉,有錢既話。

又,如果真係有最低工資喇,咁D老闆自自然就比多左錢,成本高左喇,老闆要keep個利潤,咪最多加價囉,橫掂你班友人工都高左,比得起丫。咁唔多唔少又有通脹壓力係度喇。加完價,到頭來,加左人工既可能消費力無變,但失業既或者拎綜援既就慘啦。

又又,老闆們唔想比咁多錢,可能寧願請少個人,要其他人分埋佢個份野做:「你地加左人工喎,好應該做多少少野丫。」咁D工人負擔可能又高左,可能又要無償OT,變相都係一樣。

仲有仲有,最低工資玩下手,好似外傭咁,變左最高工資。因為有個咁清楚既benchmark係度,咁自然就會有人跟住黎set,有部分工種可能搞到最低工資=最高工資,咁就好心做壞事咯。

唉,鬼叫香港咁多人湧黎爭飯碗咩,低技術勞工人工低係巿場造成。政府夾硬搞個巿場,最怕越搞越彎咋。我既思想始終右D,好難支持最低工資。

星期三, 5月 02, 2007

檸檬茶

我又嚮應思哲兄既檸茶寫作大行動!呢一篇隨心而作,一揮而就,自問拙文水準不高,只望比蕭天王肉麻造作的行文要好。(如得思哲兄親筆簽名大作,幸甚!)

---------------------------------------------------------------------

檸檬茶

「西多士,凍檸茶!」溜口而出的這一句說了十多年。

小時候跟著老媽,差不多天天都到樓下這間茶餐廳吃下午茶。一吃,便吃了十多年。

少不更事,也別說享受什麼。總之食來張口,有你吃的便吃好了,反正又不是難吃。日復一日,對那熟悉的味道也沒什麼特別感覺。

上中學了,就少了跟老媽到處逛,免得被嘲作「裙腳仔」。那茶餐廳,間中還是會去的。那片西多士、那杯凍檸茶,還是老樣子。

有一個你,曾經問過我,那杯熟悉的檸檬茶是什麼味道。我沉吟半响,尋遍腦袋每一個角落,卻像找不到什麼可用的詞彙形容,淡淡的答了一句:「挺甜的。」

自己熟悉的,卻竟然說不出個詞來。是我墨水不夠,還是感受太少?可惜,年輕的我沒有這種覺悟。

直至那一天,那一個你跟我坐在那茶餐廳裏,在難堪的沉默圍繞下,你丟低了那一句傷透了我心的。強忍著不讓淚水流出眼眶的我,呷了一口凍檸茶,第一次讓那檸檬茶在我的口中徘徊。第一次,我覺得檸檬茶是苦的,苦澀得令人窒息。

那一次以後,我才曉得去細嘗面前那一杯,相對十多年的凍檸茶。呷一口檸檬茶,甜酸交織、酸中有甜,百般滋味,此刻都上心頭。當此時候,是否應淡然說句「天涼好箇秋」?

星期三, 4月 25, 2007

粉飾太平

轉眼就快到學期終,三年既大學生涯眼學將要過去。近日有同學開始高調籌備畢業宴,收集聯絡資料、問意見、搵場地,於學期終將考試之時忙個不亦樂乎。若虛實在敬佩如此用心盡力,無償無酬為大家籌備活動既搞手。

只係回頭一看,三年以來,我地呢一個class既山頭,唔單止星羅旗布,仲互有派系,或有在明互片,更多在暗放箭。是非無日無之,真真假假盡由人說,散布者有如榕樹頭講古佬,描述生動活潑,高潮迭起,聽得人津津有味,唔信十足都信左九成。就好似三國演義咁,真假難辨,但一般人只懂接收懶於思考求證,都照單全收。

自從year1頭一個學期左右到既一段蜜月期以降,全個class都開始建立自己既山頭。其實一班咁多人,有山頭實在正常不過,但山頭之間明爭暗鬥是非不絕,係無咩好爭既情況之下,若虛又覺得無乜謂。你話好似辦工室咁,鬥死一個就少個爭升職都仲make sense。理大仲要轉左制,計分唔拉curve,即係你有幾分,就比屬於個分既grade你,同其他人高低分無關。咁樣鬥死人有咩著數?自己要爭成績咪讀書囉,人地差左你都唔會升grade。若虛一向認為,損人利己既事,即使不道德,但係起碼我可以明白,人有所為利己心,好logical,好make sense。損人不利己既事,若虛唔能夠理解,亦唔會接受。

始終若虛個class係讀business既,女生佔多數,女生多自然是非多,相信無多少人會反對。讀business既普遍心機較重,亦較自利好鬥。但爾虞我詐,卻又於己無益,唔知為乜。之前睇過渣沽講左我都好認同既一句:是非精一日唔講是非,係會腦溢血死既。可能好多人都只係咁啫?

咁,如果真係有有心人,想一班人和氣團結,應該一早就有所行動喎。若虛自問有心無力,只好歸隱一隅,冷眼旁觀。多年來唔覺有人做野去gather埋班人,就算話咩大function去燒野食咁,都係你有你搞,我有我搞。到今日有人走出黎搞grad din,我覺得,個grad din意義真係唔大。可以想像,到時候大家都係你有你一堆,我有我埋堆。一齊影張相,擠出個尷尷尬尬既笑容,就算係為自己大學生涯既終結,粉飾太平,作結留念。呢D野,太假,有咩價值?

CK近日講識於微時既朋友,若虛同CK差一兩個decade,都有同樣既諗法。大學認識既朋友,能真心相交既鳳毛麟角。人大左係有更多計算,友誼亦都越難建立。只有從小建立起來既,至經受得起風霜。

星期一, 4月 23, 2007

放水疑雲





港聞
A08
蘋果日報
2007-04-12


理大副系主任涉洩露測驗題目

【本 報訊】為令學生在中期考試獲得高分數,理工大學物流學系一名副系主任竟於測驗前夕把將於測驗期間出的題目及答案,預早供應考學生溫習;並於上月舉行的中期 測驗以開卷形式,讓學生應考該科。多名考生狂轟情況猶如集體出貓抄答案,失去考核意義,強烈要求重考。該教授昨日向逾百名考生道歉,並將安排重考。理工大 學的「物流與管理」學科上月舉行中期測驗,約有100多名二及三年級來自物流學系及管理學系的學生應考,該科主要是考計數及物流管理知識,由理工大學物流 系副系主任Dr Ng Chi--to(Daniel)任教。

學生不滿要求重考

有份應考的學生表示,他們於測驗前已收到吳教 授派發的課堂練習及答案。至上月初,考生應考該科時均可翻閱參考書及課堂練習。試卷共設三條題目,其中一條佔總分三分一的試題,卻與練習一模一樣。該考生 指,部份同學赫見該試題後,即迅速抄模擬答案,但亦有部份考生對教授處理方法感不滿,有感如同供學生抄答案,失去考核意義,強烈要求重考,或索性取消該測 驗成績。該名教授昨日向所有考生發出電郵,指自己犯了不小心的錯誤,並答應安排重考,希望學生見諒。理大學生民主牆昨晚已貼滿學生不滿的大字報,但亦有一批學生聯署要求考試維持原判,以免對一些已溫習的考生不公平。Ng Chi-to教授昨晚稱,今次只是一時疏忽出錯題目,「聖人都有錯」,今日將宣布重考。理大學生會會長余耀東稱,有關手法不恰當,亦不認同該做法,認為這樣處理會失去測驗的意義。






如果大家有留意生果報校園板新聞(雖然若虛都無),應該記得上面呢單放水指控。

生果報擅長既手法大家都心裏有數。若虛湊巧修讀該科(可恨無印那試題,嘿!),以旁觀者又局中人的角度去睇呢件事,會話其實呢件事係:

考完mid-term之後個個禮拜返學,就發現有人開始係lecture度鼓噪,話條試題有個tutor有派,有個無派,搞到唔係個個有,仲有得照抄,好唔公平咁話。我都未搞清楚咩事,問問隔離甲同學先知,原來話第二題條題目同exercise一個餅印黎。乙同學仲話其實tutor都有張條題目擺上去網上比同學download,唔係好似前面條茂利講話有D人有有D人無。我就發up瘋話,梗係前面個幾條友知道自己舔左野,又唔知係邊度聽到話有得抄但自己無,覺得笨左,都未搞清件事就先搞風搞雨。

甲同學一面點頭,一面就話梗係佢地睇死個lecturer又無膽又怕事,先咁聲大夾惡啦,你睇,哎,人做lecturer佢做lecturer,一D威嚴都無,聽住班友大大聲淆哂底咁,企到直直玩手指,連講野個口都震哂。乙同學就話,出返條題目有咩問題呢?你地考cert,A-level,未試過遇到一模一樣既past paper題目咩?唔比翻炒架?不過open book就砸使D,有D人有得抄有D人無。

我咪話,車,擺明係一D考唔掂既就要重考,既得利益既就打死都唔制啫,無解架喎。個阿sir閃閃縮縮,一面又話唔好意思其實佢唔知tutor有expose過呢條題目,對要求重考既就千依百順唯唯諾諾,對反對既就輕輕帶過。我地無抄既,梗係唔要又再讀多次mid-term啦!好得閒咩?甲同學連連稱是,仲話比Dproject砸死咁濟,唔好搞埋咁多野。乙同學就話,班友考個時又唔見投訴,考完先黎嘈,擺明自己衰左玩野啦。

講多兩講阿sir就叫投票,咁好明顯件事就好似頭先咁講,攞到分死都唔制,衰左既就梗要考過。民主係咁既情況係行唔通架!搞多兩搞都搞唔掂,下回分解。

可能個lecturer以為拖下拖下就會過到骨,點知係民主牆張單野愈鬧愈大,不過都有彈有讚咁。之後個禮拜D同學仲係lecture度罵戰,但始終莫衷一是。民主牆愈貼愈勁,無幾可會有咁多post,貼到要加塊board係隔離,仲開哂名咁指人鬧。Dr.Ng仲想問人可唔可以拆左Dpost落黎咁。回答梗係官腔既推搪啦。

終於見報喇,見報個日咁啱就要上堂。返到去,見到企係台到既換左個人,原來係個科個department既head收到風,見愈搞愈大,要落黎拆掂佢喎。佢就有威嚴得多喇,一上堂就list哂成堆論據,講明無話唔准翻炒,又話點解有D同學考個時明知試題有問題都唔出聲,一論嘴講左半粒鐘有多。最後就叫我地自己一班人compromise到個結果再搵幾個代表上黎同佢講咁,重考唔重考都得。之前幾日也文也武個班友,到呢一刻鴉雀無聲,唔知係佢地無返學定見知呢個阿head唔好恰呢?個head仲要加句,張呢D事鬧上報紙,非常不智,有損學校名聲,報紙又會亂寫咁。講完喇,其他人走左,Dr.Ng拎返起支咪講野既時候,身子僵直,目無表情,雙手合什攞住個咪,嘴唇微顫,遠遠仲見到佢好似眼泛淚光咁,有一刻真係好擔心佢會自我了斷,又多一單教授跳樓自殺案,咁沙皇同飯焦又多單野煩。

跟住幾日民主牆不斷有撐Dr.Ng同批生果既貼,仲收到好多支持Dr.Ng既email。最後個D唔知邊個class reps決定左唔使考,都算告一段落啦。



理大一向都話自己係實用既大學,連D學生都非常實際,政治冷感之餘,淨係識日日做兼職補習搵銀。民主牆長期丟空,間中都係得幾篇學生會自己寫既時事評論上去,路人視而不見。今次竟然出現少見既幾十人堆係民主牆前睇貼,而且回應熱烈,其實亦非壞事。

可惜,民主牆上既貼同回應質素認真有問題。一個幾百字既貼,錯別字既逾雙位數,兼且部分文理不通,行文不順,讀來甚難。回應者亦有不少只作謾罵而不說明其理據,或只當改作文般圈錯別字詞,甚少理性討論及回應。若虛聽聞其他院校情況亦大同小異,是香港大學生語文質素低下之故嗎?

順便一提,生果報既寫新聞手法係點我唔想評論,但係其實佢係有個專責係八大院校(定九大?)搜刮新聞既記者,每日盯住各大院校既民主牆,又有線人通風報信咁。所以阿head可能搞錯喇,未必有人爆料比報館架。

星期四, 4月 12, 2007

唔明=勁?

近排如果大家有搭roadshow,應該都睇過張藝謀導演個專訪。

張大導演講,黃金甲呢套戲有幾偉大,又有深度,又刻劃人性,仲要好有教育意義咁,聽到我都呆呆地。

講真,張大導演D戲,我真係睇唔明。講到底,我都只係個外行。外行評論內行無乜謂,可能係我程度未夠,或者部戲都唔係拍比我睇啦。係度無意貶底張大導既成就同造詣,不過都係講下我自己一D小小既意見。

自從十年前到王家衛個D戲攞完獎,我就唔多明咩叫好戲。好似套2046咁,拍左成五年,睇完都唔知佢講乜,真係好彩唔使拍到2046。個票房連一個演員既薪酬都比唔起,搞到偉仔都話唔收錢為藝術。

我知道,藝術要用時間雕啄,藝術唔可以用錢去量度。但係,呢套戲,問心,有幾多人覺得係正野?

有位仁兄曾經講過類似既野:「名著,係人人都會讚,但人人都唔會去睇既。」無記錯係美國文學家馬克吐溫。

我成日都覺得,會唔會連D評審都唔多明套戲想點,又怕比人白眼,話佢地唔識野。結果大家係咁既心態下,就局住讚到套戲天上有地下無:極有深度,深刻地刻劃出人性既善良同醜惡面,係後現代主義既最佳表現云云。

好似莎劇咁,你求其執件英國佬問,佢都會讚到天上有地下無。但係,又有幾多人真係睇過?(只係一個例子,無意質疑莎劇既文學地位)

小弟睇戲唔多,但好似Godfather,Casablanca甚至無間道呢D戲我都覺得值得流芳唔好話百世都百載既。

相信大家都認識一d人,平時講野喜歡加dspecific terms落去,唔深唔舒服,越難越過癮。總之你聽完佢講一句就要問返佢幾句先明。

喂,大佬!說話係用黎溝通架!你同一個人講野,最基本就係要佢明白你所講既野,唔明講到佢明至係嘛。你講大堆野,人地聽唔明,唔係代表你勁,係代表你完全唔識咩叫溝通。你對住唔識雞腸既媽媽,會唔會一句野夾九十幾個英文字落去?

電影、藝術其實都一樣。你部電影係比觀眾睇既,仲話要教育觀眾既,最基本就係令人明白。當然,藝術要到尖端難免曲高和寡,不為世人所認同。

張大導睇黎都應該要諗諗個定位:到底要做D令觀眾明白教育到觀眾既電影,定係要追求純粹藝術?兩者並非完全對立,但多少要有個取捨。若果唔係只怕兩面不討好。

星期一, 4月 09, 2007

台灣文革

前幾日睇新聞,見中正公行館都被人燒埋,真係唔知好嬲定好笑。台灣叫自己做民主政體,號稱華人地區最民主既地方,雖然無証據話係扁政府所為,但司馬昭之心路人皆知。

台灣近排開始「去蔣化」運動。蔣者,蔣介石也,蔣中正為其筆名。桃園中正機場被易名為桃園國際機場;全台大大小小蔣介石銅像被拆了不少;如今行館被燒,好難單純相信係一場意外。反正阿扁既事永遠都係咁啱得咁橋,三年前咁啱又有兩粒子彈,咁啱又火燒行館。咁樣做同文革真係無乜分別。

民進黨有幾識選舉相信大家都見識過。三年前連宋聯手,形勢大好,竟然就輸左係兩粒子彈之下。上年年尾巿長選舉,阿扁弊案纏身,招來天下圍攻,聲名掃地,但民進黨竟然保住高雄,謝長廷係台北得票更勝上屆。民進黨既拿手好戲:抹黑、賣悲情、搞族群針對,適當既時候就會搬出黎,力量足以翻盤,邊個敢講國民黨有馬英九必勝無疑?

睇返國民黨,百年老店,可惜有選舉以來就有分裂。李登輝出選令新黨出走,二千年連戰出選,宋楚瑜出走,直接令國民黨失去政權。國親懊悔莫及,零四聯手竟再鎩羽。如今馬英九呼聲雖高,然而王金平亦不願退讓,彷彿二千年既翻版。馬英九既外省籍的確令佢難以得到本土頑固原住民既支持,然而於台北既壓倒優勢可彌補。王金平號稱本土派,可惜在北不及馬英九既魅力,在南不如民進黨旗號鮮明要爭本土派支持,可謂兩頭唔到岸,巿場定位失敗既人辦。但王金平年事已高,如果今屆做唔成,相信以後都無希望。野心作祟之下睇黎都會扭盡六壬要同馬英九鬥爭到底,或者迫不得已都會放手一搏,退黨出選,甚至與野心不死既宋楚瑜聯手亦未可知(即使宋楚瑜台北巿長之敗應已為其政治生涯劃上句號)。

陰謀論去睇,王金平同李登輝私交甚篤,話唔定係李登輝既間諜,話唔定有把抦係李登輝手上,要以摧毁國民黨為己任。李登輝多年來無所不用其極,唔可以排除有咁既可能。

照咁睇,王馬合則兩贏,分則兩敗。但跟據博奕論,雙方都唔會退讓,因為一但退讓就蝕底,最終就會雙輸。不過,有人話廿一世紀係後博奕年代,因為大家了解呢一套,所以大家會去應對。君子協定馬英九讓王金平一屆會係一個option嗎?不過見到Tony Blair同Golden Brown可能都無人再敢講咩君子協定。馬英九無左王金平,或者王金平出選打對台,會有幾大影響?好難估計。但歸跟結底,係因為國民黨內唔尊重初選機制,致有今日咁既田地。

國民黨初選機制本來就唔成熟,二千年連勝宋敗,宋卻不甘而出走。係咁既先例之下,仲有邊個會去尊重呢個經唔起考驗既機制?連戰無辦法去重新調整,到今日王馬互鬥,如果大家尊重初選必然唔會再導致分裂或爭奪。民進黨山頭林立,又有四大天王明爭暗鬥,不過佢地有尊重初選呢個傳統,大家都會服從。美國兩黨幾時會話拗要出邊個選總統?國民黨若果再敗,都係敗係自己手上。不過民進黨再執政,後果可能不堪設想。

民進黨打住台獨旗號上位,再執政唔多唔少代表理念被認同。民進黨既文化清洗同教育恐怕會令呢一代既年青人深受影響。如果佢地執政十二年甚至更長,咁就會令更多既年青人受到佢地既思想教育,到呢班人長大,就會更加認同民進黨傳授既價值觀同理念,台獨可期。北京會唔會容許咁既情況發生?未可知也。

星期三, 3月 14, 2007

所謂「薪火相傳」

之前已經談過「莊」既基本構成。其實莊可以話係成間大學構成既基本元素,大學學生活動與部分行政運作,不少都係莊既工作範圍。理大多數莊都有一種特點,就是鍾意由上莊挑選下莊,過程黑箱作業,絕無透明度可言。咁做或者係想為左薪火相傳,不致傳統文化無以為繼。

然而,呢種比特首選舉更黑暗既挑選方法注定會帶來強烈的後遺症。老鬼權力過大以至逾越莊期界限使新一屆既幹事受多方制肘難有作為。

係人選方面既影響係最基本可見既。由於上唔上到莊基本上都係睇上莊既意思,所以好多投機者都會去搵有勢力既上莊,希望得到有如江握手既祝福上位。如是者呢個就變左基本既遊戲規則,到最後所有既人要上莊都要走呢條路。呢個現象係某D由並非自由組莊參選而係經上莊閉門造車提名下莊參選既莊會更明顯。

呢個情況會出現點樣既結果顯而易見。投機者泛濫既情況下,選人既亦多時會被蒙敝,畢竟只幾個月的時間要認識透徹一個人本就不易,可況並非每位選人者皆精明。懂惴摩上意者易於上位,往往出現如劣幣驅逐良幣的現象,有為者或不屑於如此的競逐,退出這個競爭。係adverse selection既情況下,只有能奉承、認同上莊路線者才得茍存,反對派皆遭掃地出門。間或有有能者出現,然而呢D有能者既要表現出認同、奉承上莊,又要面對如consultation day等既洗腦教育;即使能順利捱過,如想自己既旨意得以奉行,還需面對眾老鬼既壓力,而共事者多有憑關係上位者,亦慣於奉上莊意思為金科玉律,不敢稍違。長久以往,一支莊的路線與性格都定型,再難有所改變。而每一屆莊都被迫於既有空間內活動,難有作為。

除左人選,老鬼權力過盛,間接壓抑左新一屆幹事既發展空間。新莊經驗尚淺,難免有所錯漏,於老鬼眼中固然有所不及,但咁樣唔代表係新莊能力問題。好多老鬼會對下莊既錯誤猛烈開火,下莊亦無反駁餘地。須知上莊乃無償工作,做得無成就感,無人認同仲要受氣,好多人會心灰意冷,慢慢就會出現有莊員潛莊(即潛水、逃避莊務)。無人會鍾意局外人不斷插隻手黎干預,老鬼若果係善意既比意見,當然對新莊運作有幫助;但若越俎代疱,恐怕只會惹人反感。

老鬼之間既恩恩怨怨,亦會通過咁既機制注入下莊,令到好多莊成為世仇,你爭我鬥不知為何。好多莊花大量心力去鬥爭,結果就係令辦事效率低下。學生會既O'camp(既大O)規模甚大,動員逾百,然而四區之間各有恩怨,明爭暗鬥,明槍暗箭,招招毒辣,野野攞命。而且恩怨並非只在O'camp中出現,而是一路持續不休;大家亦互相攻訐,纏鬥不休。

薪火相傳,繼承左好野,繼承埋衰野。生物學黎講,之所以要兩性交配,就係各取所長,創造更好既新一所基因。然而莊既基因唔變,持續落去不知進步,仲要連帶大量side-effect。咁樣既制度,真係好嗎?

星期一, 2月 12, 2007

Hall life

大學生流行一個講法:入大學要做五件事--走堂、上莊、補習、拍拖,仲有住hall。住hall,講真,若虛係入U之前就幾期待。感覺係可以有一段自己生活既無負擔亦無制肘,可以活在當下及時行樂既美好日子。雖然最後有D未如人意咁黎左呢度,同我屋企亦距離唔遠,但我都實現左我當時既願望,而且一住就住左三年。

PolyU既hall歷史至今僅五年,既然無深厚既歷史根底,自然亦缺乏人地既傳統文化。要同HKU幾十甚至上百年既hall比當然係無得比,但無歷史既包袱亦表示我地可以有較大自由度去發展,唔需要受前人既諸多規條所限。HKU既hall或者仲帶有殖民地時代精英教育要挫新人銳氣既色彩,十日十夜體力化甚至不人道既o'camp仍然係非參與不可既function,凌晨三點唔跟大隊去食糖水要小心間房被淋水。係呢個大學生已經無乜所謂精英地位既身分保證既年頭,唔見得入本地大學有幾巴閉,大學生係就業巿場都唔見得有幾得天獨厚既時候,仲有無必要去挫所謂銳氣?歷史文化有其正反兩面,墨守成規,自以為優厚傳統不謀寸進終至不合時宜而遭唾棄。

你要我去好仔細咁figure過去兩年幾既hall life我又做唔到,正如我要你講出你平日既生活你都應該會口啞啞不知從何說起。hall life係我呢兩年幾每日要experience既野,習慣都成自然。想當日入黎仲戇居居,家陣已經係一個資深hallmate,心中都有D感受。

記得year1住hall既時候,好鍾意一大班人一齊玩。個時做最多既就係以前唔可以咁痛快既飲酒。年少氣盛,恃住有幾分酒量,就經常同人挑燈夜戰,劈到至死方休。飲酒既經驗,嗯,我覺得都係幾寶貴架。一來,我學識左之前我唔識既玩法;二來又了解到自己既酒量,同埋自己飲緊酒時既狀態,咁對於我日後要出去玩或者應酬都有返D幫助。

咁除左飲酒之外都有好多野玩既,但我既感覺係,係hall最開心既地方係有一班人陪住你一齊,無論玩又好食飯又好出去又好。即使一班人坐埋傾計都可以係一件賞心樂事,往往坐到天光而不自知,仲落去食早餐飲早茶。望住D揹住個書包等車返學既學生哥,有一刻鐘都覺得自己好頹廢架。

自從我year3返黎之後,住hall既感覺都唔同左。一來可能係呢屆宿生會做得差啦。差成點?唉...真係失禮。二來有幾多好朋友都離開左呢個hall喇,缺少左朋友既hall同一棟酒店真係可以係無乜分別。三來自己既心態都好似變左個過客咁,匆匆而去,反正都就走。四來就係hall management變得越來越無人情味,變得凡事都管,而且管得甚嚴,令我地有時都幾無癮。

Side track一下,PolyU hall係一個高度保安既地方,全hall每一個公眾地方(除後樓梯)都裝滿閉路電視,而出入口閘機亦都經精心設計加上看更把守,絕對能杜絕屈蛇。一向以來hall既作風都係外緊內寬,對外人入hall好緊,對外宣揚既regulations好緊,但對內既執行就一向寬鬆。有時,regulations都係為左迎合社會大眾所謂既道德期望姐。大學生有獨立思想,應該自愛,如果佢地既行為只係影響自己,並無影響其他人既正常生活,咁management其實又何必插手呢?定係要management每事管,將個hall塑造成理想既居住環境,培育出,或者叫倒模出符合社會期望既大學生?

仲有幾個月就曲終人散。自己變左好多自己都知。由以往鍾意大圍人一齊玩一齊劈,到而家鍾意三幾個人靜靜地坐底開支紅酒摸酒杯底。至少好多玩法我試過,多左經歷人生先會豐富。

星期二, 2月 06, 2007

明星補習

本來想講大學生,諗諗下發現追源溯始,禍根始終係成個制度個度,所以想先講一講個爛鬼教育制度。

所謂高分低能既考試。填鴨教育只會硬塞硬填,對所謂學以致用一概不問。近年香港學生經常被批評水準下降。有人歸咎母語教學,有人歸咎教師質素,有人歸咎大學水平下降,所持理據不一但結論俱同。然而,若虛覺得元兇始終離唔開本來爛透既制度,而近年有一樣野令情況更為惡化,呢樣野叫補習社。

香港本來既制度就係exam-oriented,學生無論平時點醒都好,過到考試呢關先叫掂,唔係你就算好似愛迪生咁勁發明好多野都係中五畢業(有好多人係唔同方面有陳易希既才華,但無佢既運氣)。所謂實際應用都係得個講字,話就話改革教試制度,但換湯唔換藥,只係做樣。例如預科近年有個叫Teacher assessment scheme(TAS),就係由Science既老師去評估學生實驗既成果,以取代以往既實驗試。但TAS佔比分既少,由於每間學校水平不同或師資不同,教統局就跟據該學校學生當年既考試成績去「調整」分數。咁樣又係繼母語教學後再reinforce個名校效應,考得好更好,考得差更差。結果,考試掂個班(唔排除有好叻既人)仍然係拉高個分,考試唔掂既就睇你間學校點,差既話你個實驗做到愛因斯坦級都無用。

制度有咩問題可能大家咁多年都聽到厭,但補習社之興起其實係更加惡化香港既教育生態。係巿場經濟下,既然香港既學生成績係咁考試主導,而考試模式又係方法主導,題目要求有跡可尋,教人點考試既補習社就應運而生。然英皇、當代等出現就好似肥佬黎於香港報業。肥佬黎改變左香港報業生態,繼而影響全香港巿民既preference;英皇、當代就改變左補習社既生態,繼而改變埋成個教育環境。

補習社係變得越來越靠公關、教考試不重內容既時候,又的確令到去補習既學生成績好左。現實使然,令越來越多學生投向所謂補習天王。姑勿論那些補習天王係咪夠quali教書,但佢地成功咁搵到考試制度既後門,提升左佢地學生既成績--可能係事實上或只係心理上。Perception is truth.只要大家覺得真係成績好左,就會繼續補,而word of peers' mouth會令到更多人投向補習。

由此衍生左兩個問題。第一個係令到更多學生只係依靠補習既應試方法去考試,令佢地成為考試機器。佢地既無以往學生既勤學苦讀,自然學問上有所不及;而只靠應試方法亦令佢地缺少所謂思維既訓練,個腦用少左,退化都快D。或者呢個就係點解近年香港老闆或者所有人都覺得香港學生水平下降既原因。

第二個問題更嚴重,涉及既係隔代貧窮。由於個個都補習,補習社有D必教既基本知識,若虛聽聞有老師會因為種種原因(可能係要同補習天王劃清界線,或者趕進度之類,須知A-level既課程分量極重,好多比較差既學校甚至會選擇一D難既topics放棄唔教),而assume班裏面個個都識,由此輕輕帶過,花更多時間係其他地方。咁樣就間接迫都未了解呢D基本知識既人去補習。但大家都好似忽略一個問題,就係補習都要錢,而且一D都唔平。清貧既學生有部分可能跟本負擔唔起呢筆錢,咁對佢地黎講要追就比較辛苦同蝕底。呢個問題,放大少少黎睇,就係無錢既讀書會難左,間接做成窮人平均學歷低下,越難打破隔代貧窮。

若虛唔知道補習呢一個行業究竟有幾大,但觀乎近年既大廣告攻勢,睇怕一D都唔細。英皇、當代等既出現,將補習由以往握緊重點既教學(好多人都可能經歷過,有好多老師可能自己好有料,但真係唔識教書),變成掌握考試方法既教學。佢地以企業經營既手法,以舖天蓋地既宣傳攻勢,塑造出一個又一個既補習名師,比你「唔補就笨」感覺。

若虛以上所講好多都係身為學生個人觀察既體會。到底實際情況有無咁壞,或者更壞?

星期三, 1月 17, 2007

畢業旅行(二)

好似之前講,若虛對個旅行的確係有好多感受。歐洲人原來朝早唔係點出街。聖誕係佛羅倫斯,行左一個下午,只覺得成個城巿人都唔多個,越行越灰,決定坐低抖抖。突然開始人多起上黎,我地跟住人行,發現原來個度既人四五點先開始蒲頭,同埋都係聚係個好似維園咁上下大小既範圍既街同廣場。除夕係維也納情況一樣,黃昏左右人先開始出現。

而有趣既係,整個旅行都好似呢類經歷咁,有起有落,之後更大起大落,唔多唔少令若虛有少少領會到老子所講既:福兮禍所倚,禍兮福所伏。福禍相隨,是福是禍豈吾等凡人所能參透?

講開維也納,除夕既慶祝活動認真唔錯。成個巿中心步行街區,設左五個台,每個大約相隔數百米,表演節目各有不同,有古典音樂,有pop music,有民歌,連disco既都有,可謂各自各精彩。全巿既人彷彿聚集哂係呢個街區,男男女女都隨音樂起舞,氣氛熱鬧非常。比起維港巨星匯之類,相距何止萬丈。

歐洲人可能因為富有,大部分都幾識享受人生,唔會太勞碌。歐洲一般勞工法規定工人每周工時不超過三十到四十個鐘(法國為三十五個鐘),所以歐陸既店舖通常五六點就收檔,七點到成條街基本只剩食肆。見到有好多街邊檔,檔主開唔開好似隨心咁,有時開有時唔開,有時遲開有時早收,好似唔憂食咁。英國情況例外,英國人勤奮得多,超巿好多都開到夜晚十一點甚至有廿四小時營業,睇黎香港真係學足英國佬個套。

有好多感覺,一時之間難以言喻。去旅行的確令人見識唔少。今次出國都算有所得著,希望下次再去既時候可以有更多時間感受當地既生活,同埋唔使好似今次咁辛苦啦。

星期一, 1月 15, 2007

畢業旅行

剛剛去完歐洲十九天自由行,走遍英法意德瑞奧,總算還自己一個心願。錢方面係餐風飲露之下,總支出成功控制係二萬銀以內,有四成既晚上係火車上渡過,有時仲無床位齋坐!揹背囊既旅行就係咁,都別有一番風味。不過我諗,再去既時候,我一定唔會係咁既身世先得喇。無錢去旅行,有時都幾灰。

呢個旅行真係令我有唔少啟發,想講既野可能要分幾篇先可以講得完。

第一樣感受到既,當然就係兩地文化既差異。歐洲人(主要係白人)樂於助人,基本上只要你肯開聲,佢地幫到都會幫。我地買左兩盒牛奶但撕唔開,走入咖啡店到搵人幫手剪,個伙計竟然仲笑笑口咁好樂意幫我地剪開佢。比著係美式價值既香港,呢類搞搞震無幫襯既混吉行為相信即刻比人黑面兼掃走。

到過法國既朋友可能不太認同,覺得法國人孤高冷酷目中無人。其實,只要你肯嘗試用法文同佢地溝通,佢地都會好樂意幫你。同行既朋友係法國留學一個學期,識返幾句法文,係法國行即刻順利好多。法國人一向睇唔起英國人同英文,雖然佢地通常識英文但多數都唔願講。佢地希望遊客會尊重佢本國既語言,嘗試用法文溝通。不只一次我地用法文問,佢地會用英文答我地。

係歐陸,大部分公共交通都係用自助打飛既形式,即係買左飛自己係巴士上或地鐵站度打飛。我係歐陸十五日,搭車無數次,無遇過有查飛,可見查飛頻率頗低。或者係顯示歐洲人既自律。聽聞佢地都係買飛一買就係半年。有朋友係德國讀書,遇過兩次查飛,個個都有飛係身。若虛打聽到無飛一般都係罰數十歐羅,即忽發奇想:既然查飛次數咁疏,如果長期唔買飛,間中比人捉一 兩次,in the long run,玩下手仲有賺!哈,經濟學話risk taking既人in the long run係會贏架嘛,雖然凱恩斯會答你:in the long run, we are all dead.

另外,若虛對歐洲既飲食文化都幾有感受。去完歐洲之後,完全感覺到香港的確係個美食天堂,廣東人的確係數一數二識食同敢食既人。歐洲人整野食好奇怪,來來去去都係三幅被,無黎變化。好似整魚,唔係煎就係炸。肉就成日拎去整香腸同煙肉,反而好少食鮮肉。菜就永遠只有salad dish有,以我地窮到褲穿窿既情況跟本唔會食到,好彩之後係超巿自買自整,唔係隨時火燒後欄。

其實,香港人真係好幸福。係香港呢個彈丸之地,既可以搵到中國各菜系既名菜,又有得食世界各地基本上你講得出地方既菜。歐洲人既食譜,我覺得,真係太單調啦。