星期四, 12月 07, 2006

搞年宵

挨年近晚,雖然試還未考,好多大學生已經三五成群,商量他們一年一度的發財大計--搞年宵。

年宵,若虛未搞過。如果你問我為何不搞,我倒要一問:搞年宵為了什麼?

如果說為賺錢,噢,I'm sorry,我沒興趣。錢當然想賺,但年宵能不能賺?賺得幾多?一般如果巿道好,大部分舖都會有錢賺。但付出十晚八晚通頂捱更抵夜,賺到既怕唔夠睇醫生買補品。

為聯誼嗎?的確,有很多人是這樣想。如果大家都覺得賺錢與否不太重要,一萬幾千過眼雲煙的話,的確是挺不錯的聯誼方法。但人心不同有如其面,你視錢財如糞土,佢可能視錢財如珠寶。年宵就像一個玩一個月既創業遊戲,價值觀不同相信拍擋間衝突必多,玩下手朋友都無得做。

入大學後見過不少人搞年宵。講真,搞年宵賺錢與否,很大程度視乎閣下運氣如何。認識有一支莊上年度曾賣浮水燈賣到開巷賺到笑,一年後食髓知味想重溫舊夢,豈料此一時彼一時,到最後一日割價求售才清貸成功,結果唔使蝕都偷笑。當時有位朋友抱住賺錢心態掟幾千銀落去,存心翻佢一番,結果整個年宵期間但見朋友眉頭緊皺鬱鬱不歡。

另外一堆朋友賣毛公仔,生意不佳,僅靠另外(違規)兼賣的麥牙糖餅回本。年宵賺不賺,端視乎你的貨是否當時得令,而大眾的的口味卻不斷在變難以捉摸。一個好彩比頭條新聞或星期日檔案,或者蘋果日報搵中你去檔攤,要賺個盤滿砵滿實不難。若果閣下捕捉大眾口味失敗,我想你只能望回本了。

年宵不是賺不到錢,但濕貨賺的遠比乾貨多。朋友搞年宵有十年八年,乾濕貨都有做過。朋友說,要賺錢,乾貨賺不了多少,濕貨才重要。好景時動輒六位數字,就算零三年SARS,乾貨蝕錢,濕貨賺的還是可彌補過去。

說到聯誼,事實上,有很多理大的「莊」都喜歡以年宵作維繫並加強成員與freshmen關係的方法。對不少莊來說,freshmen投資參加該莊的年宵某程度上等於對該莊的承諾,將令他接續成為該莊莊員機會大增。那類型帶政治目的的年宵攤位,一般由二三十人經營,想賺錢也無謂從此入手。

若虛覺得搞年宵因財失義機會不低。俗語都話講錢失感情,有人對錢看重,有人看輕,於做生意過程中,難免有衝突。例如A擅自接受三成講價,B卻覺得有失生意原則蝕左,拗撬隨之而來。相見好,共事難,要一起做生意若非志同道合必多糾紛,一接觸到錢父子都可以反目何況朋友。

搞年宵,玩票性質還好;要聯誼必須搞清大家對這盤小生意的態度;要賺錢就要問清楚自己:成功率有多高、值不值博了。

沒有留言: